Kanbiọ Wehiatọ Mítọn lẹ Tọn

Be Yọnnu Lizọnyizọnwatọ lẹ Tin to Kunnudetọ Jehovah Tọn lẹ mẹ Ya?

▪ Mọwẹ, yọnnu lizọnyizọnwatọ livi susu lẹ tin to Kunnudetọ Jehovah tọn lẹ mẹ lẹdo aihọn pé. Yọnnu he to yẹwheho wẹndagbe Ahọluduta Jiwheyẹwhe tọn dọ lẹ sù taun. Psalm 68:11 dọ dọdai gando yé go dọmọ: “[Jehovah] wẹ ohó lọ dọ: Yọnnusi he to owẹ̀n lọ lá lẹ wẹ agun daho de.”

Ṣigba, lizọnyizọn he yọnnu Kunnudetọ Jehovah tọn lẹ nọ wà ma yin nudopolọ hẹ dehe sinsẹ̀ngán yọnnu he tin to sinsẹ̀n devo lẹ mẹ lẹ nọ wà gba. Yé gbọnvo taun na yedelẹ. Gbọnna?

Mẹhe yé nọ wà lizọnyizọn yetọn na kavi plọnnu lẹ gbọnvo. Sinsẹ̀ngán yọnnu lẹ, titengbe Mẹylọhodotọklisti tọn lẹ nọ didá azọngban nukọntọ tọn to agun yetọn lẹ mẹ, podọ hagbẹ agun lọ tọn lẹ wẹ yé nọ plọnnu. Ṣigba, na nuhe dù yọnnu lizọnyizọnwatọ Kunnudetọ Jehovah tọn lẹ tọn lẹ, mẹhe tin to gbonu agun lọ tọn lẹ wẹ yé nọ dọyẹwheho na, yèdọ mẹhe yé nọ dukosọ hẹ to lizọnyizọn whédegbè jẹ whédegbè tọn yetọn mẹ podọ to fidevo lẹ.

Aliho devo he mẹ yọnnu lizọnyizọnwatọ Kunnudetọ Jehovah tọn lẹ gbọnvo na dehe tin to sinsẹ̀n devo lẹ mẹ te gando nuwiwa yetọn to agun lọ mẹ go. Sinsẹ̀ngán yọnnu Mẹylọhodotọklisti tọn po sinsẹ̀n devo lẹ po tọn lẹ nọ deanana hagbẹ agun lọ tọn lẹ bo nọ plọnnu yé sọgbe hẹ sinsẹ̀n-nuplọnmẹ sinsẹ̀n yetọn tọn lẹ. Ṣigba, yọnnu lizọnyizọnwatọ Kunnudetọ Jehovah tọn lẹ ma nọ plọnnu agun lọ to whenue sunnu he yí baptẹm lẹ to finẹ. Sunnu he yin dide taidi mẹplọntọ lẹ kẹdẹ wẹ nọ wàmọ.—1 Timoti 3:2; Jakọbu 3:1.

Biblu dohia dọ sunnu lẹ kẹdẹ wẹ tindo azọngban lọ nado nọ penukundonugo to agun mẹ. Doayi apajlẹ he apọsteli Paulu zedai go to whenue e to wekanhlan nugopọntọ hatọ etọn Titu dọmọ: “Na whẹwhinwhẹ́n ehe wutu wẹ yẹn do jo we do Klete, na hiẹ nido sọgan . . . nọ de sunnu mẹho lẹ to tòdaho dopodopo mẹ.” Paulu yidogọ dọ sunnu he yin dide lẹ dopodopo dona “tin matin whẹsadokọnamẹ, asu yọnnu dopo tọn.” (Titu 1:5, 6) Paulu na anademẹ dopolọ Timoti dọmọ: “Eyin mẹde to vivẹnudo na azọ́ntẹn nugopọntọ tọn, azọ́n dagbe de wẹ ewọ jlo. Enẹwutu, nugopọntọ dona yin mẹhe ma tindo ovlẹ, asu yọnnu dopo tọn, . . . mẹhe pegan nado plọnmẹ.”—1 Timoti 3:1, 2.

Naegbọn sunnu lẹ kẹdẹ wẹ dona nọ penukundonugo to agun mẹ? Paulu dọmọ: “Yẹn ma nagbè yọnnu de nado nọ plọnmẹ, kavi nado nọ paṣẹ do sunnu ji gba, adavo nado nọ nọ̀ abọẹ. Na Adam wẹ yin didá jẹnukọn, enẹgodo, Evi.” (1 Timoti 2:12, 13) Jiwheyẹwhe dá sunnu jẹnukọn na lẹndai etọn wẹ yindọ sunnu wẹ dona hẹn azọngban mẹpinplọn po anadenanu po tọn di.

Lizọnyizọnwatọ Jehovah tọn lẹ nọ hodo apajlẹ Nukọntọ yetọn Jesu Klisti tọn. Devi Luku wlan gando lizọnyizọn Jesu tọn go dọmọ: “E zingbejizọnlin sọn tòdaho de mẹ jẹ tòdaho de mẹ podọ sọn gbétatò de mẹ jẹ gbétatò de mẹ, bo to yẹwhehodọ bosọ to wẹndagbe ahọluduta Jiwheyẹwhe tọn lá.” To nukọn mẹ, Jesu do hodotọ etọn lẹ hlan nado wà azọ́n dopolọ. Luku dọmọ: “Yé gbọn aigba lọ pete ji sọn gbétatò de mẹ jẹ gbétatò de mẹ, bo to wẹndagbe lọ lá.”—Luku 8:1; 9:2-6.

To egbehe, lizọnyizọnwatọ Jehovah tọn lẹ—sunnu po yọnnu po—nọ tindo mahẹ zohunhun tọn to azọ́n he Jesu dọ dọdai etọn wiwà mẹ dile e dọ do dọmọ: “Yẹwheho wẹndagbe ahọluduta lọ tọn ehe na yin didọ to aigba fininọ lẹpo ji taidi okunnu de na akọta lẹpo; podọ whenẹnu wẹ opodo lọ na wá.”—Matiu 24:14.