Wehọmẹ Yẹwhehọluduta Tọn lẹ Dohia Dọ Jehovah Yiwanna Mí
JEHOVAH wẹ ‘Nuplọnmẹtọ Daho’ mítọn. (Isa. 30:20) Owanyi wẹ nọ whàn ẹn nado plọnazọ́n mẹdevo lẹ. Di apajlẹ, owanyi sisosiso wẹ whàn Jehovah nado nọ do “nuhe ewọ lọsu to wiwà lẹpo hia” Jesu. (Joh. 5:20) Na Jehovah yiwanna mí mẹhe yin Kunnudetọ etọn lẹ wutu, e na mí “odẹ́ nuyọnẹntọ tọn,” dile mí to vivẹnu lẹpo do nado gbògbéna ẹn bo gọalọna mẹdevo lẹ.—Isa. 50:4.
To apajlẹ owanyi Jehovah tọn hihodo mẹ, Wedegbẹ́ Mẹpinplọn tọn he Hagbẹ Anademẹtọ lọ zedai nọ yí wehọmẹ yẹwhehọluduta tọn ao zan nado plọnazọ́n mẹhe tindo ojlo bọ ninọmẹ yetọn na yé dotẹnmẹ lẹ. Be hiẹ nọ pọ́n wehọmẹ ehelẹ hlan taidi kunnudenu dọ Jehovah yiwanna mí ya?
Pọ́n nudọnamẹ delẹ gando wehọmẹ yẹwhehọluduta tọn lẹ go po nuhe mẹhe yì delẹ dọ po. Enẹgodo, kanse dewe dọ, ‘Nawẹ n’sọgan mọaleyi sọn nuplọnmẹ he wá sọn Jiwheyẹwhe dè ehe mẹ gbọn?’
MỌALEYI SỌN AZỌ́NPLỌNMẸ YẸWHEHỌLUDUTA TỌN MẸ
Na Jehovah yin “Jiwheyẹwhe owanyi tọn” wutu, e nọ na mí azọ́nplọnmẹ he nọ zọ́n bọ gbẹzan mítọn nọ tindo zẹẹmẹ, bo nọ gọalọna mí nado duto avùnnukundiọsọmẹnu lẹ ji podọ nado tindo ayajẹ susu to lizọnyizọn mítọn mẹ. (2 Kọl. 13:11) Taidi devi owhe kanweko tintan tọn lẹ, mí pegan nado gọalọna mẹdevo lẹ, “bo nọ plọn yé nado payi nuhe” yè degbe etọn na mí lẹpo go.—Mat. 28:20.
Dile etlẹ yindọ mí sọgan nọma pegan nado yì wehọmẹ lọ lẹpo, mí sọgan mọaleyi sọn dopo kavi humọ mẹ. Podọ mí sọgan yí nuplọnmẹ sinai do Biblu ji he mí nọ mọyi lẹ do yizan mẹ. Mí sọ sọgan tindo kọdetọn dagbe dogọ to lizọnyizọn lọ mẹ eyin mí nọ wazọ́n dopọ hẹ devizọnwatọ Jehovah tọn he ko mọ azọ́nplọnmẹ vonọtaun yí lẹ.
Kanse dewe dọ, ‘Be ninọmẹ ṣie na mi dotẹnmẹ nado tẹnpọn bo yì depope to wehọmẹ ehelẹ mẹ ya?’
Sinsẹ̀n-basitọ Jehovah tọn lẹ nọ mọ ẹn taidi lẹblanulọkẹyi de nado yì wehọmẹ họakuẹ enẹlẹ bo plọnnu. Na azọ́nplọnmẹ he a mọyi lẹ ni dọ̀n we sẹpọ Jiwheyẹwhe dogọ bo hẹn we pegan nado hẹn azọngban he e zedo alọmẹ na we lẹ di, titengbe gbedide niyaniya tọn lọ nado dọyẹwheho wẹndagbe lọ tọn.
[Apotin to weda 13-17]
BLADOPỌ WEHỌMẸ YẸWHEHỌLUDUTA TỌN LẸ TỌN
Wehọmẹ Lizọnyizọn Yẹwhehọluduta Tọn
Lẹndai: Nado plọnazọ́n wẹnlatọ lẹ nado yin yẹwhehodọtọ wẹndagbe lọ tọn po mẹplọntọ kọdetọn dagbenọ lẹ po.
Ojlẹ: Ma nọ doalọte. Nọtẹn: Plitẹnhọ Ahọluduta tọn mẹ.
Nọtẹn: Plitẹnhọ Ahọluduta tọn mẹ.
Nubiọtomẹsi Lẹ: Mẹhe nọ kọnawudopọ hẹ agun lọ to gbesisọ mẹ lẹpo, he kẹalọyi nuplọnmẹ Biblu tọn lẹ bọ gbẹzan yetọn tin to kọndopọ mẹ hẹ nunọwhinnusẹ́n Klistiani tọn lẹ.
Afọdide Lẹ: Dọna nugopọntọ Wehọmẹ Lizọnyizọn Yẹwhehọluduta tọn.
Sharon, he hò plibọ na azọ̀n sclérose latérale amyotrophique tọn wutu dọmọ: “Wehọmẹ Lizọnyizọn Yẹwhehọluduta tọn ko plọn mi lehe yè nọ basi dodinnanu do po lehe yè nọ ze nudọnamẹ lẹ donukọnnamẹ to aliho he sọgbe mẹ do po. N’ko sọ plọn nado nọ ze ayiha do nuhudo gbigbọmẹ tọn mẹdevo lẹ tọn ji—e ma yin do ṣie kẹdẹ ji.”
Arnie, he to sinsẹ̀n taidi nugopọntọ tomẹyitọ sọn whenu dindẹn die dọmọ: “Sọn ovu whenu ṣie gbọ́n wẹ n’nọ kúkúdẹ́ podọ e nọ vẹawuna mi nado pọ́n nukunji na mẹdevo lẹ. Wehọmẹ ehe gọalọna mi nado mọdọ yẹnlọsu yin nujọnu. Jehovah gọalọna mi gbọn azọ́nplọnmẹ ehe gblamẹ bọ n’ko plọn nado nọ yiagbọji bo nọ ze ayiha do fidopo. Homẹ ṣie hùn taun dọ n’penugo nado nọ pà Jiwheyẹwhe to agun mẹ podọ to lizọnyizọn ṣie mẹ.”
Wehọmẹ Mẹhe Wá Bẹtẹli Yọyọ lẹ Tọn
Lẹndai: Nado gọalọna mẹhe ṣẹṣẹ wá Bẹtẹli lẹ nado tindo kọdetọn dagbe to sinsẹ̀nzọn yetọn mẹ.
Ojlẹ: Nukunwhiwhe 45 to osẹ dopodopo mẹ na osẹ 16.
Nọtẹn: Bẹtẹli.
Nubiọtomẹsi Lẹ: Dona yin hagbẹ whẹndo Bẹtẹli tọn tẹgbẹ tọn kavi mẹdezejotọ whenu-gli tọn he ko yin alọkẹyi nado sẹ̀n to Bẹtẹli na owhe dopo kavi humọ.
Afọdide Lẹ: Hagbẹ whẹndo Bẹtẹli tọn yọyọ lẹ nọ yì wehọmẹ lọ to ojlẹ etọn mẹ.
Demetrius, he ko yì wehọmẹ ehe to owhe 1980 lẹ gblamẹ dọmọ: “Wehọmẹ ehe gọalọna mi nado hẹn aṣa nupinplọn tọn ṣie pọnte podọ nado wleawudai nado to sinsẹ̀n to Bẹtẹli zọnmii. Mẹplọntọ lọ lẹ, nuhe mí plọn lẹ, po ayinamẹ yọ́n-na-yizan lẹ po hẹn mi kudeji dọ Jehovah nọ hò ṣie pọ́n bo jlo na gọalọna mi nado tindo kọdetọn dagbe to sinsẹ̀nzọn ṣie mẹ to Bẹtẹli.”
Kaitlyn dọmọ: “N’mọ alọgọ yí nado ze ayidonugo do nuhe yin nujọnu hugan lẹ ji—yèdọ nado yin gbẹtọ gbigbọnọ de. Wehọmẹ Mẹhe Wá Bẹtẹli Yọyọ lẹ tọn hẹn pinpẹn-nutọn-yinyọnẹn ṣie na Jehovah, owhé etọn po titobasinanu etọn po jideji.”
Wehọmẹ Lizọnyizọn Ahọluduta Tọn
Lẹndai: Nado plọnazọ́n nugopọntọ tomẹyitọ, mẹho, podọ to whedelẹnu devizọnwatọ lizọnyizọnwiwa tọn lẹ na yé nido hẹn azọngban nukunpedonugo tọn po titobasinanu tọn yetọn lẹ po di. (Owalọ 20:28) Ninọmẹ, nuyiwa, po nuhudo niyaniya tọn agun lẹ tọn po nọ yin hodọdeji. Wehọmẹ ehe nọ yin bibasi to owhe sọha de gblamẹ sọgbe hẹ nudide Hagbẹ Anademẹtọ lọ tọn.
Ojlẹ: To owhe agọe tọn lẹ mẹ, wehọmẹ ehe yin bibasi na azán awe kavi awe daa na nugopọntọ tomẹyitọ lẹ, azán dopo daa na mẹho lẹ podọ azán dopo na devizọnwatọ lizọnyizọnwiwa tọn lẹ.
Nọtẹn: E nọ saba yin Plitẹnhọ Ahọluduta tọn kavi Plitẹnhọ Plidopọ tọn.
Nubiọtomẹsi Lẹ: Dona yin nugopọntọ tomẹyitọ, mẹho agun tọn kavi devizọnwatọ lizọnyizọnwiwa tọn.
Afọdide Lẹ: Nugopọntọ lẹdo tọn nọ basi oylọna mẹho lẹ po devizọnwatọ lizọnyizọnwiwa tọn lẹ po. Wekantẹn alahọ tọn nọ basi oylọna nugopọntọ tomẹyitọ lẹ.
Quinn (he tin to nukọn) dọmọ: “Dile etlẹ yindọ wehọmẹ lọ bẹ nudọnamẹ susu lẹ hẹn bo ka nọ yin bibasi to ojlẹ kleun de mẹ, e nọ whàn mẹho lẹ bo nọ gọalọna yé nado hẹn ayajẹ yetọn go podọ nado ‘hẹn yede di sunnu’ to sinsẹ̀nzọn Jehovah tọn mẹ. Mẹhe ṣẹṣẹ jẹ sinsẹ̀n ji taidi mẹho po mẹhe ko to sinsẹ̀n sọn whenu dindẹn die lẹ po nọ plọn nado yìn lẹngbọ lẹ po kọdetọn dagbe po podọ nado tin to kọndopọ mẹ mlẹnmlẹn to ‘aliho nulẹnpọn tọn dopolọ’ mẹ.”
Michael dọmọ: “Azọ́nplọnmẹ ehe gọalọna mí nado yọ́n lehe mí sọgan nọ jlẹkaji to gbigbọ-liho do bo na mí avase gando owù lẹ go gọna ayinamẹ yọ́n-na-yizan lẹ nado penukundo apó lọ go. Dagbe nankọ die Jehovah wà na mí!”
Wehọmẹ Sinsẹ̀nzọn Gbehosọnalitọ Tọn
Lẹndai: Nado gọalọna gbehosọnalitọ lẹ na yé nido ‘hẹn lizọnyizọn yetọn di to gigọ́ mẹ.’—2 Tim. 4:5.
Ojlẹ: Azán ao.
Nọtẹn: Wekantẹn alahọ tọn wẹ nọ de; e nọ saba yin to Plitẹnhọ Ahọluduta tọn de mẹ.
Nubiọtomẹsi Lẹ: Dona yin gbehosọnalitọ whepoponu tọn na owhe dopo kavi humọ.a
Afọdide Lẹ: Nugopọntọ lẹdo tọn nọ na nudọnamẹ gbehosọnalitọ lẹ eyin yé yin oylọ-basina nado yì wehọmẹ lọ.
Lily (he tin to adusi mẹ) dọmọ: “Wehọmẹ enẹ ko gọalọna mi nado duto nuhahun lẹ ji to lizọnyizọn lọ mẹ podọ to gbẹzan ṣie mẹ. Aliho he mẹ n’nọ plọnnu bo nọ plọnmẹ bosọ nọ yí Biblu zan te ko pọnte taun. N’ko wleawufo nado nọ gọalọna mẹdevo lẹ, nọgodona mẹho lẹ, bo yidogọna nukọnyiyi agun lọ tọn.”
Brenda, he ko yì wehọmẹ lọ whla awe dọmọ: “E gọalọna mi nado nọ ze ayidonugo ṣie lẹpo do onú gbigbọmẹ tọn lẹ ji, nado hẹn ayihadawhẹnamẹnu ṣie lodo, podọ nado ze ayidonugo do alọgigọna mẹdevo lẹ ji. Na nugbo tọn, Jehovah jọmẹ taun!”
[Nudọnamẹ odò tọn]
a Eyin gbehosọnalitọ yọyọ lẹ ma sù sọmọ nado pé klasi dopo, gbehosọnalitọ he ma yì wehọmẹ ehe to owhe atọ́n agọe tọn mẹ delẹ sọgan yin oylọ-basina nado yì wehọmẹ ehe whladopo dogọ.
Wehọmẹ Mẹho Agun Tọn lẹ Tọn
Lẹndai: Nado gọalọna mẹho lẹ nado hẹn azọngban yetọn lẹ di to agun lọ mẹ podọ nado mọnukunnujẹ nuhe Jehovah sinsẹ̀n biọ to yé si mẹ to gigọ́ mẹ.
Ojlẹ: Azán atọ́n.
Nọtẹn: Alahọ wẹ nọ de ehe; e nọ saba yin to Plitẹnhọ Ahọluduta tọn kavi Plitẹnhọ Plidopọ tọn de mẹ.
Nubiọtomẹsi Lẹ: Dona yin mẹho agun tọn.
Afọdide Lẹ: Wekantẹn alahọ tọn wẹ nọ basi oylọna mẹho lẹ.
Nuhe mẹdelẹ he yì klasi 92tọ to États-Unis dọ die:
“N’mọ ale susu yí sọn wehọmẹ lọ mẹ, e gọalọna mi nado gbeje dee pọ́n bo mọ lehe n’sọgan penukundo lẹngbọ Jehovah tọn lẹ go do.”
“N’ko wleawufo nado nọ na tuli mẹlẹpo gbọn nùzinzindo nuagokun he tin to Owe-wiwe mẹ lẹ ji dali.”
“N’na yí azọ́nplọnmẹ enẹ do yizan mẹ to pipotọ gbẹzan ṣie tọn mẹ.”
Wehọmẹ Nugopọntọ Tomẹyitọ lẹ po Asi Yetọn lẹ po Tọn
Lẹndai: Nado gọalọna nugopọntọ lẹdo tọn po agbegbe tọn lẹ po nado tindo kọdetọn dagbe dogọ to devizọnwiwa na agun lẹ mẹ dile yé to ‘azọ́n sinsinyẹn wà to hodidọ po mẹpinplọn po mẹ.’—1 Tim. 5:17; 1 Pita 5:2, 3.
Ojlẹ: Osun awe.
Nọtẹn: Nọ yin dide gbọn wekantẹn alahọ tọn dali.
Nubiọtomẹsi Lẹ: Mẹmẹsunnu lọ dona yin nugopọntọ lẹdo tọn kavi agbegbe tọn.
Afọdide Lẹ: Wekantẹn alahọ tọn wẹ nọ basi oylọna nugopọntọ tomẹyitọ lẹ po asi yetọn lẹ po.
Joel, he yì klasi tintan to 1999 dọmọ: “Wehọmẹ lọ gọalọna mí nado yọ́n pinpẹn tatọ́-yinyin Jesu tọn do titobasinanu lọ ji tọn dogọ. Mí mọdọ mí dona na tuli mẹmẹsunnu he mí to lizọnyina lẹ bo hẹn pọninọ agun dopodopo tọn lodo. Mí plọn nado hẹn do ayiha mẹ dọ eyin nugopọntọ tomẹyitọ de to ayinamẹ na bo tlẹ to vọjlado basi to ojlẹ delẹ mẹ, yanwle tangan etọn wẹ nado gọalọna mẹmẹsunnu lẹ nado mọdọ Jehovah yiwanna yé.”
Wehọmẹ Biblu Pinplọn Tọn Na Mẹmẹsunnu Tlẹnnọ Lẹ
Lẹndai: Nado plọnazọ́n mẹho po devizọnwatọ lizọnyizọnwiwa tọn tlẹnnọ lẹ po na yé nido sọgan penukundo azọngban susu go dogọ to titobasinanu Jehovah tọn mẹ. Susu mẹhe mọ gbedewema yí lẹ tọn na yin azọ́ndena nado yì sẹ̀n to fie nuhudo sù te to otò yetọn mẹ. Mẹdevo lẹ sọgan yin azọ́ndena nado yì sẹ̀n to otò devo mẹ eyin yé tin to gbesisọ mẹ. Delẹ to mẹhe mọ gbedewema yí lẹ mẹ sọgan yì sẹ̀n taidi gbehosọnalitọ titengbe whenu-gli tọn nado bẹ azọ́n yẹwhehodidọ tọn jẹeji bo gbloada na ẹn to lẹdo he to olá lẹ mẹ.
Ojlẹ: Osun awe.
Nọtẹn: Wekantẹn alahọ tọn wẹ nọ de; e nọ saba yin to Plitẹnhọ Ahọluduta tọn kavi Plitẹnhọ Plidopọ tọn de mẹ.
Nubiọtomẹsi Lẹ: Mẹmẹsunnu tlẹnnọ he tindo owhe 23 jẹ 62 lẹ bo tindo agbasalilo bosọ jlo nado sẹ̀n to fidepope he nuhudo tin te. (Malku 10:29, 30) Yé dona to sinsẹ̀n madoalọte taidi gbehosọnalitọ whepoponu tọn podọ taidi mẹho kavi devizọnwatọ lizọnyizọnwiwa tọn e whè gbau na owhe awe.
Afọdide Lẹ: Opli de nọ yin bibasi to plidopọ lẹdo tọn whenu nado na nudọnamẹ mẹhe tindo ojlo nado yì wehọmẹ lọ lẹ.
Rick, he yì klasi 23tọ to États-Unis dọmọ: “Na n’jo dee do na nupinplọn lọ wutu, gbigbọ Jehovah tọn basi diọdo ayidego tọn lẹ to gbẹtọ-yinyin ṣie mẹ. Eyin Jehovah ze azọngban de do alọmẹ na mí, e nọ nọgodona mí. N’plọn dọ eyin n’ze ayidonugo do ojlo Jiwheyẹwhe tọn wiwà ji kakati nido yin do dee ji, ewọ na hẹn mi lodo.”
Andreas, he to sinsẹ̀n to Allemagne dọmọ: “N’wá mọdọ aliho he mẹ titobasinanu Jiwheyẹwhe tọn nọ yinuwa te to egbehe taidi azọ́njiawu de. Azọ́nplọnmẹ lọ gọalọna mi nado wleawudai na azọ́n he to nukọn ja lẹ. Humọ, n’plọn nugbo titengbe ehe sọn apajlẹ Biblu tọn susu lẹ mẹ: Devizọnwiwa na mẹmẹsunnu ṣie lẹ po Jehovah po nọ hẹn ayajẹ nujọnu tọn wá na mi.”
Wehọmẹ Biblu Pinplọn Tọn Na Alọwlemẹ Lẹ
Lẹndai: Nado na azọ́nplọnmẹ vonọtaun de alọwlemẹ lẹ na yé nido sọgan yin yiyizan to gigọ́ mẹ gbọn Jehovah po titobasinanu etọn po dali. Susu mẹhe mọ gbedewema yí lẹ tọn na yin azọ́ndena nado yì sẹ̀n to fie nuhudo sù te to otò yetọn mẹ. Mẹdevo lẹ sọgan yin azọ́ndena nado yì sẹ̀n to otò devo mẹ eyin yé tin to gbesisọ mẹ. Mẹhe mọ gbedewema yí lẹ sọgan yì sẹ̀n taidi gbehosọnalitọ titengbe whenu-gli tọn nado bẹ azọ́n yẹwhehodidọ tọn jẹeji bo gbloada na ẹn to lẹdo he to olá lẹ mẹ.
Ojlẹ: Osun awe.
Nọtẹn: Wehọmẹ ehe ko to yinyin bibasi to États-Unis, podọ bẹsọn septembre 2012, e na nọ yin bibasi to aigba-denamẹ alahọ delẹ tọn ji lẹdo aihọn pé, ehe nọ saba yin to Plitẹnhọ Ahọluduta tọn kavi Plitẹnhọ Plidopọ tọn de mẹ.
Nubiọtomẹsi Lẹ: Dona yin asu po asi po he tindo owhe 25 jẹ 50 bo tindo agbasalilo podọ dona yin mẹhe tin to ninọmẹ dagbe mẹ nado yì sẹ̀n to fihe nuhudo suhugan te bosọ tindo ojlo nado dọ: “Yẹn die; do mi hlan.” (Isa. 6:8) Yé dona ko basi e whè gbau owhe awe to alọwle mẹ bosọ dona tin to sinsẹ̀nzọn whenu gigọ́ tọn mẹ madoalọte e whè gbau na owhe awe. Asu lọ dona ko to sinsẹ̀n madoalọte taidi mẹho kavi devizọnwatọ lizọnyizọnwiwa tọn e whè gbau na owhe awe.
Afọdide Lẹ: Opli de nọ yin bibasi to plidopọ agbegbe tọn whenu nado na nudọnamẹ mẹhe tindo ojlo nado yì wehọmẹ lọ lẹ. Eyin opli de ma yin awuwlena to plidopọ agbegbe tọn whenu to otò mìtọn mẹ bọ mì jlo na doalọwemẹ, mì sọgan kanwehlan wekantẹn alahọ tọn mìtọn na nudọnamẹ dogọ.
Eric po Corina po (he tin to adusi mẹ), he yì klasi tintan to 2011 dọmọ: “Lehe nupinplọn osẹ ṣinatọ̀n tọn ehe nọ diọ gbẹzan alọwlemẹ lẹ tọn bo nọ hùn dotẹnmẹ daho dote na asu po asi po he jlo na wà susu dogọ to sinsẹ̀nzọn Jehovah tọn mẹ lẹ do sọ! Mí magbe nado zan gbẹzan jlẹkaji tọn de he na gọalọna mí nado nọ yí whenu mítọn zan po nuyọnẹn po.”
Wehọmẹ Biblu Pinplọn Watchtower Giliadi Tọn
Lẹndai: Nado plọnazọ́n wehọmẹvi lẹ nado yin mẹdehlan he nọ sẹ̀n to aigba-denamẹ ji to lẹdo he mẹ gbẹtọ sù te, nado yin nugopọntọ tomẹyitọ, kavi hagbẹ whẹndo Bẹtẹli tọn. Yanwle lọ wẹ nado hẹn titojininọ dagbe go to alahọ mẹ podọ to otò lọ mẹ.
Ojlẹ: Osun atọ́n.
Nọtẹn: Nọtẹn Wepinplọn Watchtower tọn to Patterson, New York, États-Unis.
Nubiọtomẹsi Lẹ: Asu po asi po he to sinsẹ̀nzọn whenu-gigọ́ tọn vonọtaun de mẹ, taidi mẹdehlan he to aigba-denamẹ ji bo ma ko yì wehọmẹ lọ lẹ, gbehosọnalitọ titengbe lẹ, nugopọntọ tomẹyitọ lẹ kavi hagbẹ whẹndo Bẹtẹli tọn lẹ. Yé omẹ awe lẹ dona ko tin to sinsẹ̀nzọn mọnkọtọn mẹ madoalọte e whè gbau na owhe atọ̀n. Yé dona nọ do Glẹnsigbe, bo nọ hia ẹ, bosọ nọ kàn ẹn ganji.
Afọdide Lẹ: Wedegbẹ́ Alahọ tọn wẹ nọ basi oylọna asu po asi po lẹ nado doalọwemẹ.
Lade po Monique po wá sọn États-Unis bo to sinsẹ̀n to Aflika todin. Lade dọmọ: “Wehọmẹ Giliadi tọn plọnazọ́n mí nado yì fidepope to aihọn lọ mẹ bo tin to gbesisọ mẹ nado wazọ́n dopọ hẹ mẹmẹsunnu vivẹ́ mítọn lẹ.”
Monique yidogọ dọmọ: “Dile n’to nuhe n’plọn to Ohó Jiwheyẹwhe tọn mẹ lẹ yí do yizan mẹ, n’nọ tindo ayajẹ daho to azọ́ndenamẹ ṣie mẹ. N’nọ mọdọ ayajẹ enẹ yin kunnudenu dọ Jehovah yiwanna mi.”
Wehọmẹ Hagbẹ Wedegbẹ́ Alahọ Tọn lẹ po Asi Yetọn lẹ po Tọn
Lẹndai: Nado gọalọna mẹhe tin to Wedegbẹ́ Alahọ tọn mẹ lẹ na yé nido penukundo owhé Bẹtẹli tọn go bo na ayidonugo whẹho sinsẹ̀nzọn tọn he gando agun lẹ go bosọ penukundo lẹdo lẹ po agbegbe lẹ po go. Yé sọ nọ plọnnu gando azọ́n lẹdogbedevomẹ tọn, wezinzin tọn po owe didohlan tọn po go.
Ojlẹ: Osun awe.
Nọtẹn: Nọtẹn Wepinplọn Watchtower tọn to Patterson, New York, États-Unis.
Nubiọtomẹsi Lẹ: Mẹmẹsunnu lọ dona yin hagbẹ Wedegbẹ́ Alahọ tọn kavi Wedegbẹ́ Otò tọn kavi na yin dide do otẹn azọngban tọn enẹ mẹ.
Afọdide Lẹ: Hagbẹ Anademẹtọ lọ nọ basi oylọna mẹmẹsunnu lẹ po asi yetọn lẹ po.
Lowell po Cara po yì klasi 25tọ bo to sinsẹ̀n to Nigéria. Lowell dọmọ: “Wehọmẹ lọ flinnu mi dọ mahopọnna lehe alọnu ṣie na ján sọ kavi azọngban depope he yin zizedo alọmẹ na mi, eyin n’na hẹn homẹ Jehovah tọn hùn, n’dona nọ wà nulẹ sọgbe hẹ ojlo etọn. Nupinplọn lọ sọ zinnudeji dọ mí dona nọ do owanyi hia devizọnwatọ Jehovah tọn lẹ dile ewọ nọ dohia yé do.”
Cara yidogọ dọmọ: “Dopo to nuhe n’ma wọn lẹ mẹ wẹ yindọ, eyin n’ma sọgan basi zẹẹmẹ nude tọn to aliho he bọawu mẹ, be n’dona plọn hosọ lọ ganji whẹpo do plọn mẹdevo lẹ.”