Tulinamẹ ‘sọn Onù Yọpọvu lẹ Tọn Mẹ’
To décembre 2009, Whẹdatẹn Daho Hugan Russie tọn kọngbedopọ hẹ nudide whẹdatọ delẹ tọn; enẹ zọ́n bọ azọ́n Kunnudetọ Jehovah tọn he tin to Taganrog to Russie lẹ tọn yin alọhẹndotena, Plitẹnhọ Ahọluduta tọn yetọn yin hihòyi podọ nulila de yin bibasi dọ 34 to owe mítọn lẹ mẹ yin owùnu. Linlin nujijọ lọ tọn gọna fọto Kunnudetọ he go nudide lọ gando lẹ tọn po ovi delẹ tọn po yin zizedo nọtẹn Internet tọn Kunnudetọ Jehovah tọn lẹ tọn ji.
To osun delẹ godo, whẹndo Kunnudetọ tọn he nọ nọ̀ Queensland to Australie bo mọ linlin nudide Whẹdatẹn lọ tọn de do agbàn po wekanhlanmẹ de po hlan pipli he nọ deanana azọ́n Kunnudetọ Jehovah tọn lẹ tọn to Russie. Wekanhlanmẹ lọ dọmọ: “Mẹmẹsunnu Vivẹ́ lẹ emi, yise po whlepọn mẹmẹsunnu mítọn Russie tọn lẹ po tọn yinuwado ovi mítọn lẹ, Cody po Larissa po ji taun. Yé wleawuna kalti po wekanhlanmẹ delẹ po, podọ mí wleawuna nunina kleunkleun delẹ he mí jlo na dohlan yọpọvu Taganrog tọn lẹ, na yé nido yọnẹn dọ yọpọvu devo lẹ lọsu to Jehovah sẹ̀n po nugbonọ-yinyin po to fidindẹn lẹ bo nọ flin yé. Yé to nudọdomẹ owanyi tọn yetọn dohlan yemẹpo.”
To whenue yọpọvu Taganrog tọn lẹ mọ nunina lọ lẹ yí godo, yé kàn wekanhlanmẹ voovo he bẹ yẹdide lẹ hẹn hlan whẹndo lọ to Australie nado do pinpẹn-nutọn-yinyọnẹn yetọn hia. Hogbe tulinamẹ tọn he wá “sọn onù yọpọvu” lẹ tọn mẹ enẹlẹ whàn Kunnudetọ de he nọ wadevizọn to alahọ Russie tọn mẹ bọ e kanwehlan Cody po Larissa po dọmọ: “E vẹawuna yọpọvu lẹ po mẹho lẹ po taun nado jiya nuhe yé ma wà tọn. Mẹmẹsunnu po mẹmẹyọnnu mítọn lẹ po to Taganrog ma wà nuylankan depope, ṣigba yè hò Plitẹnhọ Ahọluduta tọn yetọn yí sọn yé si. Ehe vẹna yé taun. Lehe e na yin tulinamẹnu na yé nado yọnẹn dọ mẹhe to awà aigba tọn devo lẹ ji lẹ nọ flin yé do sọ! Mì wanu na owanyi po gbigbọ alọtútlú tọn mítọn po!”—Ps. 8:2.
E họnwun dọ pipli mẹmẹsunnu lẹdo aihọn pé tọn de wẹ mí yin, podọ owanyi mítọn na ode awetọ nọ gọalọna mímẹpo nado pehẹ nuhahun po whlepọn gbẹ̀mẹ tọn lẹ po. To whenue whẹdatẹn lẹ to nudọn nado yọnẹn eyin owe Kunnudetọ Jehovah tọn lẹ tọn nọ fọ́n wangbẹna dote, ovi mítọn lẹ to ode awetọ yetọn lẹ tọn hòpọn mahopọnna otò kavi aṣa he mẹ yé wá sọn bo to nugbo-yinyin hogbe Jesu tọn ehelẹ tọn dohia dọmọ: “Gbọn ehe dali wẹ mẹlẹpo na yọnẹn dọ devi ṣie lẹ wẹ mì yin, eyin mì tindo owanyi to mìdelẹ ṣẹnṣẹn.”—Joh. 13:35.
[Yẹdide to weda 32]
Yọpọvu Russie tọn lẹ he mọ nunina yí sọn yọpọvu Australie tọn lẹ si