DỌNSẸPỌ JIWHEYẸWHE

“Jiwheyẹwhe Mẹhe to Ogbẹ̀ lẹ Tọn Wẹ Ewọ”

Be okú tindo huhlọn hugan Jiwheyẹwhe wẹ ya? Paali! Okú, kavi “kẹntọ” devo depope ma sọgan do huhlọn hugan ‘Jiwheyẹwhe Ganhunupotọ’ lọ. (1 Kọlintinu lẹ 15:26; Eksọdusi 6:3) Jiwheyẹwhe tindo huhlọn nado jla nuhe okú hẹngble lẹ do gbọn fọnsọnku gblamẹ, podọ nuhe e dopagbe nado wà pẹpẹ niyẹn to aihọn yọyọ etọn mẹ.a Naegbọn mí sọgan dejido opagbe enẹ go? Jesu, Visunnu Jiwheyẹwhe tọn lọsu yí hogbe he sọgan na mí todido lẹ zan.—Hia Matiu 22:31, 32.

To whenue Jesu to hodọna Sadusi he ma tindo yise to fọnsọnku mẹ lẹ, e dọmọ: “Gando fọnsọnku oṣiọ lẹ tọn go, be mì ma ko hia nuhe Jiwheyẹwhe ko dọhlan mì, dọmọ, ‘Yẹn wẹ Jiwheyẹwhe Ablaham tọn, Jiwheyẹwhe Isaki tọn podọ Jiwheyẹwhe Jakọbu tọn’? Jiwheyẹwhe mẹhe to ogbẹ̀ lẹ tọn wẹ ewọ, e ma yin oṣiọ lẹ tọn gba.” Tofi, Jesu to alọdlẹndo hodọdopọ he Jiwheyẹwhe tindo hẹ Mose to ogbé he to miyọ́n ji lọ kọ̀n to nudi owhe 1514 J.W.M. (Eksọdusi 3:1-6) Sọgbe hẹ nuhe Jesu dọ, hogbe he Jehovah yizan na Mose dọ, “Yẹn wẹ Jiwheyẹwhe Ablaham tọn, Jiwheyẹwhe Isaki tọn podọ Jiwheyẹwhe Jakọbu tọn,” dohia dọ opagbe fọnsọnku tọn lọ na mọ hẹndi dandan. Gbọnna?

Jẹnukọn whẹ́, mì gbọ mí ni lẹnnupọndo lẹdo hodidọ enẹ tọn ji. To whenue Jehovah dọhona Mose, tọgbo Ablaham, Isaki po Jakọbu po ko kú sọn ojlẹ dindẹn die—e ko yì owhe 329 he Ablaham kú, owhe 224 he Isaki kú, podọ owhe 197 he Jakọbu kú. Etomọṣo, Jehovah dọ dọ “Yẹn wẹ” Jiwheyẹwhe yetọn, e ma dọ dọ emi yin Jiwheyẹwhe yetọn dai gba. Jehovah dọho gando tọgbo atọ̀n he ko kú enẹlẹ go taidi dọ yé pò to ogbẹ̀ wẹ nkọ. Etẹwutu?

Jesu dọmọ: “Jiwheyẹwhe mẹhe to ogbẹ̀ lẹ tọn wẹ ewọ [Jehovah], e ma yin oṣiọ lẹ tọn gba.” Lẹnnupọn vude do onú titengbe he hogbe enẹlẹ to pinplọn mí ji. Eyin fọnsọnku de ma tin, be Ablaham, Isaki po Jakọbu po na gbọṣi yọdò mẹ kakadoi. Eyin mọwẹ, be Jiwheyẹwhe oṣiọ lẹ tọn wẹ Jehovah yin niyẹn. Humọ, enẹ na zẹẹmẹdo dọ okú do huhlọn hugan Jehovah—taidi dọ ewọ ma penugo nado fọ́n devizọnwatọ nugbonọ etọn lẹ sọnku.

Tadona tẹ kọ̀n wẹ mí sọgan wá lo na nuhe dù Ablaham, Isaki, Jakọbu, po devizọnwatọ Jehovah tọn nugbonọ he ko kú lẹ po? Jesu yí hogbe he dutomẹji ehelẹ zan dọmọ: “Yemẹpo wẹ to ogbẹ̀ na ewọ.” (Luku 20:38). Jehovah deji dọ emi na hẹn lẹndai emitọn nado fọ́n devizọnwatọ nugbonọ emitọn he ko kú lẹ sọnku lọ di sọmọ bọ ewọ nọ pọ́n yé hlan taidi mẹhe tin to ogbẹ̀. (Lomunu lẹ 4:16, 17) Jehovah na hẹn omẹ enẹ lẹpo do oflin madodogbó etọn mẹ kakajẹ whenue ewọ na gọ̀ yé wá ogbẹ̀ to ojlẹ dide etọn mẹ.

Be nukundido lọ nado vọ́ mẹyiwanna towe he ko kú lẹ mọ ma fọnjlodotena we ya? Eyin mọ wẹ, nọ flin dọ Jehovah tindo huhlọn tlala hugan okú. Nudepope ma sọgan glọnalina ewọ nado fọ́n oṣiọ lẹ sọnku. Naegbọn hiẹ ma na plọn nususu dogọ gando opagbe fọnsọnku tọn po Jiwheyẹwhe he na hẹn opagbe enẹ di lọ po go? Mọwiwà na gọalọna we nado dọnsẹpọ Jehovah dogọ, yèdọ “Jiwheyẹwhe mẹhe to ogbẹ̀ lẹ tọn.”

Biblu hihia

Matiu 22-28–Malku 1-8

[Nudọnamẹ odò tọn]

[Nudọnamẹ tangan lẹ to weda 13]

Jehovah tindo huhlọn tlala hugan okú