Kanbiọ lẹ sọn Wehiatọ lẹ Dè

Be e sọgbe dọ mẹjitọ Klistiani lẹ ni sinai dopọ po ovi yetọn he yin mẹdesẹ sọn agun mẹ po to opli agun tọn lẹ whenu ya?

n▪ Mí ma dona nọ hanú zẹjlẹgo gando fie mẹdesẹ sọn agun mẹ de dona sinai do to Plitẹnhọ Ahọluduta tọn mẹ go gba. Whlasusu wẹ owe mítọn lẹ ko na tuli mẹjitọ Klistiani lẹ dọ eyin ovi yetọn he pò to whégbè po yé po de yin mẹdesẹ sọn agun mẹ, yé ni gọalọna ẹn to gbigbọ-liho eyin e sọgbe nado wàmọ. Dile e yin didohia to Atọ̀họ̀-Nuhihọ́ lọ Tọn 1^er octobre 2001, weda 16 jẹ 18 mẹ do, mẹjitọ lẹ tlẹ sọgan plọn Biblu hẹ ovi aflanmẹ yetọn he yin mẹdesẹ sọn agun mẹ bo gbẹ́ pò to whégbè po yé po. Todido lọ wẹ yindọ, ovi lọ na gbọnmọ dali mọ tulinamẹ he jẹ yí nado diọ walọ etọn.

Na nuhe dù aisinsin to Plitẹnhọ Ahọluduta tọn mẹ, e na yọ́n dọ ovi aflanmẹ he yin mẹdesẹ sọn agun mẹ de ni nọ sinai whii to apá na mẹjitọ etọn lẹ. To whenue e ma nọ yin bibiọ to mẹdesẹ sọn agun mẹ lẹ si nado sinai do oján godo tọn lẹ ji to plitẹnhọ mẹ, nude ma ylan to e mẹ dọ ovi he yin didesẹ sọn agun mẹ de ni sinai to apá na mẹjitọ etọn lẹ, mahopọnna fidepope he yé sinai do. Dile mẹjitọ lẹ to nukunpedo ovi yetọn go to gbigbọ-liho, ayihaawe ma tin dọ yé na hẹn ẹn diun dọ ovi lọ nọ duale opli lẹ tọn to gigọ́ mẹ. To whẹho ehe mẹ, nuhe na gọalọna mẹjitọ lọ lẹ wẹ nado sinai dopọ po ovi aflanmẹ lọ po, kakati nado jo e do bọ e na sinai edeṣo.

Ṣigba etẹwẹ lo, eyin ovi he yin didesẹ sọn agun mẹ lọ masọ to whégbè po mẹjitọ etọn lẹ po? Be to ninọmẹ ehe mẹ, ovi lọ ma sọgan sinai dopọ po mẹjitọ etọn lẹ po wẹ ya? To ojlẹ de mẹ wayi, owe mítọn lẹ ko na nudọnamẹ he họnwun gando lehe Klistiani de dona dovivẹnu nado nọ yinuwa do go na nuhe dù gbẹdido hẹ hagbẹ whẹndo tọn he yin didesẹ sọn agun mẹ bo masọ topọ hẹ whẹndo etọn.a Ṣigba, onú dopo wẹ e yin dọ mẹdesẹ sọn agun mẹ de ni sinai whii to apá na hagbẹ whẹndo etọn tọn lẹ to opli lẹ whenu, ṣigba onú devo pete wẹ e yin dọ hẹnnumẹ etọn lẹ ni tẹnpọn nado dogbẹ́ he ma yin dandan tọn hẹ ẹ. Whẹwhinwhẹ́n de ma tin nado hanú, eyin hagbẹ whẹndo lọ tọn he pò to nugbonọ yin lẹ tindo pọndohlan he sọgbe gando mẹhe yin didesẹ sọn agun mẹ lọ go bo nọ dovivẹnu nado hodo anademẹ Owe-wiwe lẹ tọn gando gbẹdido hẹ ẹ go.—1 Kọl. 5:11, 13; 2 Joh. 11.

Enẹwutu, vlavo mẹdesẹ sọn agun mẹ de sinai to apá na hẹnnumẹ etọn de kavi hagbẹ agun lọ tọn devo, enẹ ma dona yin nuhahun eyin ewọ gbẹ́ yinuwa to aliho he sọgbe mẹ. Nado ze osẹ́n dai gando fie mẹdesẹ sọn agun mẹ de na nọ sinai do go sọgan fọ́n nuhahun dote to ninọmẹ voovo lẹ mẹ. Eyin mẹlẹpo he wá opli kakajẹ hẹnnumẹ he pò to nugbonọ yin lẹ ji nọ dovivẹnu nado setonuna nunọwhinnusẹ́n Biblu tọn he gando mẹhe yin didesẹ sọn agun mẹ de go lẹ, podọ eyin fihe mẹdesẹ sọn agun mẹ de sin ma hẹn mẹmẹsunnu lẹ dahli, whẹwhinwhẹ́n de ma tin nado nọ hanú gando fie mẹhe wá opli Klistiani tọn lẹ na sinai do go.b

[Nudọnamẹ odò tọn lẹ]