Gbehosọnalitọ Bibasi Nọ Hẹn Haṣinṣan Mítọn hẹ Jiwheyẹwhe Lodo
“[E yọ́n] nado nọ jihàn pipà lẹ hlan Jiwheyẹwhe mítọn.”—PS. 147:1.
KANBIỌ AYIHAMẸLẸNPỌN TỌN LẸ
Nawẹ gbehosọnalitọ bibasi sọgan hẹn haṣinṣan he a tindo hẹ Jehovah lodo gbọn?
Eyin gbehosọnalitọ de wẹ hiẹ yin, etẹwẹ na gọalọna we nado zindonukọn to sinsẹ̀nzọn he nọ hẹn dona wá ehe mẹ?
Eyin hiẹ ma ko yin gbehosọnalitọ de todin, vọjlado tẹlẹ wẹ a sọgan basi nado lẹzun gbehosọnalitọ?
1, 2. (a) Etẹwẹ sọgan yin kọdetọn lọ, eyin mí nọ lẹnnupọndo mẹhe mí yiwanna de ji bo nọ dọho gando ewọ go? (Pọ́n yẹdide he tin to bẹjẹeji hosọ ehe tọn.) (b) Kanbiọ tẹlẹ wẹ mí na gbadopọnna?
EYIN mí nọ lẹnnupọndo mẹhe mí yiwanna de ji bo nọ dọho gandego, haṣinṣan he mí tindo hẹ ẹ nọ lodo dogọ. Nudopolọ wẹ gando haṣinṣan mítọn hẹ Jehovah Jiwheyẹwhe go. Taidi lẹngbọhọtọ de, Davidi nọ pọ́n sunwhlẹvu olọn tọn lẹ to zánmẹ bosọ nọ lẹnayihamẹpọn do lehe Mẹdatọ lọ jiawu do ji. Ewọ wlan dọmọ: “Whenuena yẹn lẹn olọn towe lẹ pọ́n, azọ́n alọviyẹyẹ towe tọn lẹ, osun po sunwhlẹvu lẹ po he hiẹ ko zẹ̀ali dai na; etẹwẹ gbẹtọ, bọ hiẹ do to nuflin jẹ e go? Podọ ovi gbẹtọ tọn, bọ hiẹ do to didla ẹ pọ́n?” (Ps. 8:3, 4) To whenue apọsteli Paulu lẹnnupọndo aliho jiawu he mẹ lẹndai Jehovah tọn gando Islaeli gbigbọmẹ tọn go to hẹndi mọyi te ji godo, ewọ dọmọ: “Lehe dona susugege, nuyọnẹn po oyọnẹn Jiwheyẹwhe tọn po siso do sọ!”—Lom. 11:17-26, 33.
2 Dile mí to mahẹ tindo to lizọnyizọn lọ mẹ, mí nọ lẹnnupọndo Jehovah ji bosọ nọ dọho gando ewọ go. Enẹ nọ hẹn haṣinṣan mítọn hẹ ewọ sinyẹn deji. Susu mẹhe penugo nado yin gbehosọnalitọ lẹ tọn ko mọdọ dopo to dona he yé nọ mọyi sọn whenu susu yiyizan to sinsẹ̀nzọn Ahọluduta lọ tọn mẹ lẹ mẹ wẹ yindọ, owanyi yetọn na Jiwheyẹwhe nọ siso dogọ. Vlavo hiẹ tin to lizọnyizọn whenu-gigọ́ tọn mẹ todin kavi to vivẹnudo nado jẹ yanwle enẹ kọ̀n, lẹnnupọndo kanbiọ ehe ji: Nawẹ lizọnyizọn whenu-gigọ́ tọn sọgan hẹn haṣinṣan towe hẹ Jehovah lodo gbọn? Eyin gbehosọnalitọ de wẹ hiẹ yin, kanse dewe dọ, ‘Etẹwẹ na gọalọna mi nado zindonukọn to sinsẹ̀nzọn he nọ hẹn dona wá ehe mẹ?’ Eyin hiẹ ma ko yin gbehosọnalitọ de, kanse dewe dọ, ‘Vọjlado tẹlẹ wẹ n’sọgan basi nado yin gbehosọnalitọ?’ Mì gbọ mí ni gbadopọnna aliho voovo he mẹ lizọnyizọn whenu-gigọ́ tọn sọgan hẹn haṣinṣan he mí tindo hẹ Jiwheyẹwhe lodo te.
LIZỌNYIZỌN WHENU-GIGỌ́ TỌN NỌ HẸN HAṢINṢAN MÍTỌN HẸ JIWHEYẸWHE LODO
3. To lizọnyizọn lọ mẹ, nawẹ hodidọ do dona he Ahọluduta lọ na hẹnwa to sọgodo lẹ ji nọ wà dagbe na mí gbọn?
3 Hodidọ na mẹdevo lẹ gando dona he Ahọluduta lọ na hẹnwa to sọgodo lẹ go nọ dọ̀n mí sẹpọ Jehovah. Wefọ tẹwẹ hiẹ yiwanna nado nọ yizan to lizọnyizọn whédegbè jẹ whédegbè tọn mẹ? Be Psalm 37:10, 11; Daniẹli 2:44; Johanu 5:28, 29 wẹ ya kavi Osọhia 21:3, 4? Whedepopenu he mí dọhodo opagbe mọnkọtọn lẹ ji hẹ mẹdevo lẹ, mí nọ flindọ Jiwheyẹwhe alọtlútọ mítọn wẹ nọ namẹ “nunina dagbe lẹpo gọna nunina pipé lẹpo.” Ehe nọ hẹn mí dọnsẹpọ ewọ dogọ.—Jak. 1:17.
4. Naegbọn mí nọ yọ́n pinpẹn dagbewà Jiwheyẹwhe tọn dogọ eyin mí mọ lehe mẹdevo lẹ ma yọ́n nude to gbigbọ-liho do?
4 Eyin mí mọ lehe mẹhe mí nọ dọyẹwheho na lẹ ma yọ́n nude to gbigbọ-liho do, mí nọ yọ́n pinpẹn nugbo lọ tọn dogọ. Mẹhe tin to aihọn mẹ lẹ ma tindo anademẹ dejidego he na gọalọna yé nado tindo kọdetọn dagbe po ayajẹ po. Mẹsusu nọ hanú gando sọgodo go bo ma nọ tindo todido de. Yé nọ dindona lẹndai ogbẹ̀ tọn. Mẹhe tlẹ yin sinsẹ̀nnọ lẹ ma nọ tindo oyọnẹn Owe-wiwe lẹ tọn sọmọ. Yé taidi mẹhe nọ otò Nineve hohowhenu tọn mẹ lẹ. (Hia Jona 4:11.) To whenue mí hẹn alọnu mítọn ján to lizọnyizọn lọ mẹ, mí nọ mọ vogbingbọn he tin to ninọmẹ gbigbọmẹ tọn mẹhe mí nọ dọyẹwheho na lẹ tọn po omẹ Jehovah tọn lẹ tọn po ṣẹnṣẹn hezeheze. (Isa. 65:13) Ehe nọ flinnu mí dọ Jehovah ma nọ penukundo nuhudo gbigbọmẹ tọn mítọn lẹ kẹdẹ go gba; e basi oylọna mẹlẹpo nado mọ kọfanamẹ yí to gbigbọ-liho bo tindo todido nujọnu tọn.—Osọ. 22:17.
5. Nawẹ alọgigọna mẹdevo lẹ to gbigbọ-liho nọ gọalọna mí nado duto nuhahun mítọn lẹ ji gbọn?
5 Alọgigọna mẹdevo lẹ to gbigbọ-liho nọ gọalọna mí ma nado hanú zẹjlẹgo gando nuhahun mítọn lẹ go. Trisha he yin gbehosọnalitọ de tindo numimọ ehe tọn to whenue mẹjitọ etọn lẹ gbẹ́ yede. Ewọ dọmọ: “Ehe yin dopo to nujijọ he hẹn awufiẹsa wá na mi hugan to gbẹzan ṣie mẹ lẹ mẹ.” To gbèdopo, ewọ tin to awubla mẹ bo ma jlo na yì kunnudegbe, etomọṣo e tẹnpọn nado yì deanana oplọn ovi atọ̀n delẹ tọn he tindo nuhahun susu to whẹndo yetọn mẹ. Otọ́ yetọn gbẹkọ yé go, podọ mẹdaho yetọn sunnu nọ yinuwa hẹ yé po kanyinylan po. Trisha dọmọ: “Nuhahun kavi awufiẹsa depope he n’to pipehẹ ma sọgan yin yiyijlẹdo yetọn go. Dile mí to nuplọn, nukunmẹ yetọn jẹ hinhọ́n ji podọ yé jẹ nuko ji bo gọ́ na ayajẹ. Ovi lọ lẹ yin dona de na mi sọn Jehovah dè, titengbe to azán enẹ ji.”
6, 7. (a) Nawẹ yise mítọn nọ yin hinhẹn lodo gbọn to whenue mí plọn nugbo Biblu tọn mẹdevo lẹ? (b) Eyin mí mọ plọnmẹ Biblu mítọn lẹ to nunọwhinnusẹ́n Owe-wiwe tọn lẹ yizan bo to vọjlado lẹ basi, nawẹ enẹ nọ yidogọna pinpẹn-nutọn-yinyọnẹn mítọn gbọn?
6 Nugbo Biblu tọn lẹ pinplọn mẹdevo lẹ nọ zọ́n bọ yise mítọn nọ lodo. Apọsteli Paulu wlan gando Ju azán etọn gbè tọn delẹ he ma nọ yí nuhe plọnmẹ yé te lẹ do yizan mẹ go dọmọ: “Be hiẹ mẹhe to mẹdevo plọn ma plọn dewe wẹ?” (Lom. 2:21) Lehe whẹho gbehosọnalitọ lẹ tọn gbọnvo to egbehe do sọ! To paa mẹ, yé tindo dotẹnmẹ hundote susu nado plọn nugbo lọ mẹdevo lẹ bo deanana plọnmẹ Biblu lẹ. Nado wàmọ po kọdetọn dagbe po, e nọ biọ dọ yé ni wleawuna oplọn dopodopo bosọ basi dodinnanu nado na gblọndo na kanbiọ lẹ. Gbehosọnalitọ de he nọ yin Janeen dọmọ: “Whedepopenu he n’tindo dotẹnmẹ hundote nado plọn nugbo lọ mẹdevo lẹ, n’nọ mọdọ nugbo ehelẹ nọ yinuwado ayiha po ahun ṣie po ji sisosiso. Taidi kọdetọn de, yise ṣie ma nọte do fidopo, ṣigba e to whinwhẹ́n deji.”
7 Eyin mí mọ Biblu plọntọ lẹ to vọjlado basi gbọn nunọwhinnusẹ́n Biblu tọn lẹ yiyizan dali, pinpẹn-nutọn-yinyọnẹn mítọn na nuyọnẹn Jiwheyẹwhe tọn nọ jideji. (Isa. 48:17, 18) Enẹ nọ gọalọna mí, bọ mí nọ gbọnmọ dali magbe nado to nunọwhinnusẹ́n enẹlẹ yizan to gbẹzan mítọn mẹ zọnmii. Gbehosọnalitọ devo he nọ yin Adrianna dọmọ: “Gbẹzan gbẹtọ lẹ tọn sọgan dekọtọn do nuhahun susu mẹ, eyin yé nọ dejido nuyọnẹn yetọn go. Ṣigba, eyin yé dejido nuyọnẹn Jehovah tọn go, yé nọ mọaleyi to afọdopolọji.” Mọdopolọ, Phil dọmọ: “Mí nọ mọ nugopipe Jehovah tọn nado diọ gbẹtọ lẹ to whenue yé ko dovivẹnu nado diọ bo ma penugo nado wàmọ.”
8. Dagbe tẹwẹ azọ́nwiwa dopọ hẹ Klistiani hatọ lẹ to lizọnyizọn lọ mẹ nọ wà na mí?
8 Mí nọ yin hinhẹn lodo to whenue mí wazọ́n dopọ hẹ Klistiani hatọ lẹ to lizọnyizọn lọ mẹ. (Howh. 13:20) Suhugan gbehosọnalitọ lẹ tọn nọ yí whenu susu zan hẹ wẹndagbe-jlatọ hatọ lẹ to lizọnyizọn lọ mẹ. Ehe nọ hùn dotẹnmẹ “tulinina ode awetọ” tọn susu dote. (Lom. 1:12; hia Howhinwhẹn lẹ 27:17.) Lisa he yin gbehosọnalitọ de dọmọ: “To azọ́nmẹ, gbẹtọ lẹ nọ saba whlẹnagbà bo nọ whànwu mẹdevo lẹ. Egbesọegbesọ yé nọ dọmẹnu bosọ nọ yí hogbe gbigble lẹ zan. Yé nọ jlo na yin nukọntọ mahopọnna awugble he yé sọgan hẹnwa mẹdevo lẹ ji. To whedelẹnu n’nọ yin homọdọdego kavi yin ṣinṣanko, na walọ Klistiani tọn ṣie wutu. Ṣigba, eyin n’wazọ́n dopọ hẹ Klistiani hatọ lẹ to lizọnyizọn lọ mẹ, e nọ jlọ mi dote. Lizọnyizọn lọ nọ fakọna mi, mahopọnna obá he mẹ nuṣikọna mi jẹ to whenue n’lẹkọwa whégbè to vivọnu azán lọ tọn.”
9. Nawẹ gbehosọnalitọ bibasi taidi asu po asi po sọgan hẹn kanṣiṣa alọwle tọn lodo gbọn?
9 Gbehosọnalitọ bibasi taidi asu po asi po nọ zọ́n bọ kanṣiṣa alọwle tọn nọ lodo. (Yẹwh. 4:12) Madeline he ewọ po asu etọn po yin gbehosọnalitọ dọmọ: “Yẹn po asu ṣie po nọ yí whenu zan nado dọhodo nuhe mí wà to lizọnyizọn lọ mẹ to azán lọ gbè kavi nude he mí hia to Biblu hihia mítọn whenu, ehe mí sọgan yizan to lizọnyizọn mítọn mẹ ji. To owhe dopodopo he mẹ mí yin gbehosọnalitọ te, mí nọ dọnsẹpọ míde dogọ.” Mọdopolọ, Trisha dọmọ: “Mí omẹ awe lẹ nọ tẹnpọn ma nado duahọ, enẹwutu mí ma nọ do whẹgbè gando akuẹ go. Mí tindo tito-to-whinnu dopolọ na sinsẹ̀nzọn lọ, enẹwutu mí nọ basi gọyìpọn po plọnmẹ Biblu ode-awetọ tọn po dopọ, ehe nọ gọalọna mí nado dọnsẹpọ míde po Jehovah po dogọ.”
10. To whenue mí ze Ahọluduta lọ do otẹn tintan mẹ bo mọ godonọnamẹ Jiwheyẹwhe tọn, nawẹ enẹ nọ yinuwado jide he mí tindo to Jehovah mẹ ji gbọn?
10 Jidide mítọn to Jehovah mẹ nọ jideji eyin mí ze Ahọluduta lọ do otẹn tintan mẹ, bo mọ godonọnamẹ Jehovah tọn, bosọ mọdọ ewọ nọ na gblọndo odẹ̀ mítọn lẹ. Nugbo wẹ dọ Klistiani nugbonọ lẹpo wẹ nọ dejido Jehovah go. Ṣigba, mẹhe tin to lizọnyizọn whenu-gigọ́ tọn mẹ lẹ nọ mọdọ jidide do Jehovah go sọgan gọalọna yé nado zindonukọn to gbehosọnalitọ bibasi mẹ. (Hia Matiu 6:30-34.) Curt, he yin gbehosọnalitọ bosọ nọ pọ́n tẹnmẹ na nugopọntọ lẹdo tọn, yigbe nado yì dla agun de pọ́n, ehe dẹn do owhé etọn gbè taun. Nado jẹ finẹ, e dona basi gbejizọnlin po mọto po na gànhiho awe daa. Asi etọn lọsu yin gbehosọnalitọ. Amì he tin to mọto yetọn mẹ sọgan pé nado yì dla agun lọ pọ́n, ṣigba e ma na pé nado lẹkọ, podọ e gbẹ́ pò osẹ dopo whẹpo e nado mọ sunmẹ-kuẹ etọn yí. Curt dọ dọ emi ma lẹndọ yé na penugo bo yì dla agun lọ pọ́n. Ṣigba to whenue yé hodẹ̀ godo, yé wá tadona lọ kọ̀n dọ emi sọgan hẹn azọ́ndenamẹ lọ di, bo deji dọ Jiwheyẹwhe na penukundo nuhudo yetọn lẹ go. Whẹpo yé nado tlọ́n whégbè, mẹmẹyọnnu de tẹkan hlan yé bo dọ dọ emi tindo nunina de na yé. Akuẹ he yé tindo nuhudo etọn nado basi gbejizọnlin lọ pẹpẹ wẹ mẹmẹyọnnu lọ na yé. Curt dọmọ: “Eyin hiẹ tindo numimọ ehe nkọ lẹ whlasusu, e bọawu nado mọdọ Jehovah wẹ to alọgọna we.”
11. Dona tẹlẹ wẹ gbehosọnalitọ lẹ nọ duvivi etọn?
11 Na nugbo tọn, gbehosọnalitọ lẹ nọ saba mọdọ dile yé to yede yizan to sinsẹ̀nzọn Jehovah tọn mẹ bo wleawuna haṣinṣan pẹkipẹki de hẹ ewọ do, mọ wẹ yé nọ mọ dona susu lẹ yí do niyẹn. (Deut. 28:2) Etomọṣo, gbehosọnalitọ bibasi tindo avùnnukundiọsọmẹnu etọn lẹ. Devizọnwatọ Jiwheyẹwhe tọn lẹpo wẹ nọ jiya nuhahun he atẹṣiṣi Adam tọn nọ hẹnwa tọn. To whedelẹnu, nuhahun lẹ sọgan zọ́n bọ gbehosọnalitọ delẹ na jo sinsẹ̀nzọn lọ do na ojlẹ de. Ṣigba, e nọ saba yọnbasi nado didẹ nuhahun enẹlẹ kavi tlẹ dapana yé. Etẹwẹ sọgan gọalọna gbehosọnalitọ lẹ nado zindonukọn to lẹblanulọkẹyi sinsẹ̀nzọn tọn ehe mẹ?
GBỌṢI LIZỌNYIZỌN WHENU-GIGỌ́ TỌN MẸ
12, 13. (a) Etẹwẹ gbehosọnalitọ de dona wà eyin e ma to yanwle gànmẹ tọn kọ̀n jẹ? (b) Naegbọn tito Biblu hihia egbesọegbesọ tọn, oplọn mẹdetiti tọn po ayihamẹlinlẹnpọn po tọn do yin nujọnu sọmọ na gbehosọnalitọ de?
12 Alọnu gbehosọnalitọ susu tọn nọ ján taun. E ma nọ bọawu nado wà nuhe dona yin wiwà lẹpo, enẹwutu, tito nujọnu tọn de bibasi yin dandannu. (1 Kọl. 14:33, 40) Eyin gbehosọnalitọ de ma nọ jẹ yanwle gànmẹ tọn kọ̀n, e sọgan biọ dọ ewọ ni vọ́ dogbapọnna lehe e nọ yí whenu etọn zan do. (Efe. 5:15, 16) Ewọ sọgan kanse ede dọmọ: ‘Na taun tọn, whenu nẹmu wẹ n’nọ yizan na ayidedai? Be n’dona domẹplọnlọ dee go dogọ wẹ ya? Be n’sọgan vọ́ tito-to-whinnu agbasazọ́n ṣie tọn jlado ya?’ Klistiani lẹpo sọgan yigbe dọ e bọawu nado yí nude dogọ tito-to-whinnu mẹtọn, enẹwutu, mẹhe tin to lizọnyizọn whenu-gigọ́ tọn mẹ lẹ dona nọ gbeje tito yetọn lẹ pọ́n whẹwhẹ bo nọ basi vọjlado lẹ eyin e biọ domọ.
13 Biblu hihia egbesọegbesọ, oplọn mẹdetiti tọn po ayihamẹlinlẹnpọn po dona tin to tito gbehosọnalitọ de tọn mẹ. Enẹwutu, gbehosọnalitọ de dona nọ domẹplọnlọ ede go na nuhe ma yin dandan lẹ nikaa yí whenu he ewọ de dovo na nuhe yin nujọnu lẹ. (Flp. 1:10) Di apajlẹ, yí nukun homẹ tọn do pọ́n gbehosọnalitọ de he lẹkọwa whégbè to whenue e ko yí azán lọ blebu zan to lizọnyizọn lọ mẹ godo. Linlẹn etọn wẹ nado wleawuna opli to whèjai enẹ. Ṣigba, whẹpo e nado wàmọ, e yì dla Klistiani hatọ de pọ́n, ehe e ma mọ na ojlẹ de. Enẹgodo, e tá televiziọn nado sè linlin he tin-to-aimẹ lẹ. To whenue e sè linlin lẹ godo, e nọte nado pọ́n ajọjijla lẹ nado yọnẹn eyin vlavo akuẹ nuhe e jlo na họ̀ de tọn ko yìdo. Whẹpo ewọ nado doayi e go, nudi gànhiho awe ko juwayi, bọ ewọ ma tlẹ ko jẹ awuwlena opli lọ ji. Naegbọn ehe do yin whẹho sinsinyẹn de? Eyin aihundatọ lanmẹyiya tọn de na tindo kọdetọn dagbe, ewọ dona nọ dù núdùdù hunsindagbe tọn lẹ to gbesisọ mẹ. Mọdopolọ, eyin gbehosọnalitọ lẹ na zindonukọn to lizọnyizọn whenu-gigọ́ tọn mẹ, yé dona nọ basi oplọn mẹdetiti tọn to gbesisọ mẹ nado sọgan hẹn yede lodo to gbigbọ-liho.—1 Tim. 4:16.
14, 15. (a) Naegbọn gbehosọnalitọ lẹ dona hẹn gbẹzan yetọn bọawu? (b) Etẹwẹ gbehosọnalitọ de dona wà eyin e to pipehẹ nuhahun lẹ?
14 Gbehosọnalitọ kọdetọn dagbenọ lẹ nọ dovivẹnu nado hẹn gbẹzan yetọn bọawu. Jesu dotuhomẹna devi etọn lẹ nado hẹn nukun yetọn tin to fidopo. (Mat. 6:22) Ewọ lọsu hẹn gbẹzan etọn bọawu nado sọgan hẹn lizọnyizọn etọn di matin ayihafẹsẹnamẹnu depope. E tlẹ dọmọ: “Owọ̀ lẹ tindo odò lẹ podọ ohẹ̀ agahomẹ tọn lẹ tindo adọtẹn lẹ, ṣigba Visunnu gbẹtọ tọn ma tindo fidepope he e na ze ota etọn bọdai do.” (Mat. 8:20) Gbehosọnalitọ he jlo nado plọnnu sọn apajlẹ Jesu tọn mẹ dona hẹn do ayiha mẹ dọ eyin emi tindo agbasanu susu, emi dona nọ penukundo nususu go, jla nususu do kavi diọ nususu.
15 Gbehosọnalitọ lẹ yọnẹn dọ lẹblanulọkẹyi vonọtaun de wẹ emi tindo, ṣigba yé ma nọ lẹndọ emi pọnte hugan mẹdevo lẹ. Kakatimọ, yé yọnẹn dọ nukundagbe majẹhẹ Jiwheyẹwhe tọn wẹ zọ́n bọ yé do tindo nunina kavi lẹblanulọkẹyi sinsẹ̀nzọn tọn depope. Enẹwutu, nado zindonukọn to sinsẹ̀nzọn yetọn mẹ, gbehosọnalitọ dopodopo dona nọ ganjẹ Jehovah go. (Flp. 4:13) Gbehosọnalitọ lẹ na pehẹ avùnnukundiọsọmẹnu po nuhahun lẹ po janwẹ. (Ps. 34:19) Eyin enẹ wá jọ, kakati nado yawu jo lẹblanulọkẹyi sinsẹ̀nzọn tọn yetọn do, yé dona nọ lẹhlan Jehovah dè na anademẹ bo na ẹn dotẹnmẹ nado gọalọna na yé. (Hia Psalm 37:5.) Eyin yé mọdọ Jehovah to nukunpedo yé go po owanyi po, haṣinṣan he yé tindo hẹ ewọ na lodo dogọ.—Isa. 41:10.
BE HIẸ SỌGAN YIN GBEHOSỌNALITỌ YA?
16. Eyin hiẹ jlo na basi gbehosọnalitọ, etẹwẹ a dona wà?
16 Eyin hiẹ jlo na tindo dona he nkọ mẹhe to lizọnyizọn whenu-gigọ́ tọn mẹ lẹ nọ duvivi etọn, hẹn ojlo towe zun yinyọnẹn na Jehovah to odẹ̀ mẹ. (1 Joh. 5:14, 15) Dọho hẹ gbehosọnalitọ lẹ. Ze yanwle he sọgan gọalọna we nado lẹzun gbehosọnalitọ lẹ dai. Nuhe Keith po Erika po wà niyẹn. Agbasazọ́n yetọn nọ yí whenu susu to yé si, podọ taidi asu po asi po he tindo owhe dopolọ po yé po lẹ, yé họ̀ owhé po mọto yọyọ de po ojlẹ vude to alọwle yetọn godo. Yé dọmọ: “Mí lẹndọ onú enẹlẹ, na hẹn pekọ wá na mí, ṣigba e ma yinmọ paali.” To whenue azọ́n gbledo Keith, ewọ sẹ̀n taidi gbehosọnalitọ alọgọtọ tọn. E dọmọ: “Gbehosọnalitọ bibasi flin mi ayajẹ susu he nọ wá sọn mahẹ tintindo to sinsẹ̀nzọn lọ mẹ.” Yé lẹzun họntọn hẹ asu po asi po gbehosọnalitọ de he gọalọna yé nado mọ ayajẹ he nọ wá sọn gbẹzan mẹtọn hinhẹn bọawu nado basi gbehosọnalitọ mẹ. Etẹwẹ Keith po Erika po wà? Yé dọmọ: “Mí kàn yanwle gbigbọmẹ tọn mítọn lẹ do wema de ji bo tlẹ́ ẹ do zomọ-nuhẹnmiọn tọn mítọn go, podọ eyin mí jẹ yanwle de kọ̀n, mí nọ dohia e go.” To ojlẹ vude godo, yé penugo nado lẹzun gbehosọnalitọ.
17. Naegbọn e do yin nuyọnẹnnu nado lẹnnupọndo vọjlado bibasi to gbẹzan towe mẹ kavi na tito towe ji nado sọgan lẹzun gbehosọnalitọ?
17 Be hiẹ sọgan yin gbehosọnalitọ ya? Eyin hiẹ mọdọ a ma sọgan yin gbehosọnalitọ todin, wà nuhe go a pé lẹpo nado dọnsẹpọ Jehovah dogọ gbọn mahẹ gigọ́ tintindo to lizọnyizọn lọ mẹ dali. Eyin hiẹ hodẹ̀ bo gbeje ninọmẹ towe pọ́n, hiẹ sọgan mọdọ vọjlado delẹ bibasi to tito towe lẹ mẹ kavi to gbẹzan towe mẹ sọgan na we dotẹnmẹ nado basi gbehosọnalitọ. Eyin hiẹ bẹ gbehosọnalitọ jẹeji, ayajẹ he hiẹ na mọyi na suhugan avọ́sinsan depope he a basi. Ahọluduta lọ zizedo otẹn tintan mẹ na hẹn pekọ nujọnu tọn wá na we. (Mat. 6:33) Podọ hiẹ na tindo ayajẹ nujọnu tọn he nọ wá sọn onú nina mẹdevo lẹ mẹ. Humọ, hiẹ na tindo dotẹnmẹ hundote susu nado nọ lẹnnupọndo Jehovah ji bo dọho gando ewọ go, podọ owanyi he a tindo na ewọ na siso dogọ, bọ a nasọ hẹn homẹ etọn hùn.
[Zẹẹmẹ yẹdide lẹ tọn to weda 29]
Eyin mí yin zohunhunnọ to lizọnyizọn whenu-gigọ́ tọn mẹ, mí na tindo pekọ to gbẹzan mítọn mẹ (Pọ́n hukan 9)