“Gbehosọnalitọ Dagbe de Wẹ A Na Yin!”
1. Numọtolanmẹ tẹwẹ mẹmẹyọnnu de tindo gando sinsẹ̀nzọn he e to wiwà taidi gbehosọnalitọ de go?
1 Kathe B. Palm dọmọ: “Azọ́n devo de ma tin he n’sọgan mọ he na ko hẹn pekọ susu wá na mi sọmọ kavi hẹn ale gbigbọmẹ tọn susu wá na mi.” E ko ze ede jo na owhe susu nado basi gbehosọnalitọ sọn adà otò Chili tọn de mẹ jẹ devo mẹ, to Hùwaji Amelika tọn. Vlavo mẹde ko dọna we pọ́n dọ: “Gbehosọnalitọ dagbe de wẹ a na yin!” na e yọ́n ale he mẹhe to sinsẹ̀nzọn whenu-gigọ́ tọn mẹ lẹ nọ duvivi etọn wutu.
2. Basi zẹẹmẹ nuhewutu mí nọ mọ pekọ nujọnu tọn to nuwiwa gbigbọmẹ tọn lẹ mẹ tọn.
2 Aliho Gbẹzan Tọn He Nọ Hẹn Pekọ Wá: Apajlẹnọ mítọn, Jesu, mọ kọfanamẹ nujọnu tọn to ojlo Otọ́ etọn tọn wiwà mẹ. (Joh. 4:34) Enẹwutu, po ahundopo po wẹ Jesu plọn hodotọ etọn lẹ dọ pekọ nujọnu tọn nọ wá sọn mahẹ tintindo to nuwiwa he gando sinsẹ̀n-bibasi Jehovah tọn go lẹ mẹ. Mí nọ tindo ayajẹ to whenue mí yí gbẹzan mítọn do wà nuhe nọ hẹn mí tindo nukundagbe Jehovah tọn lẹ. To yidogọ mẹ, ayajẹ mítọn nọ jideji dile mí yí whenu, huhlọn, po nutindo mítọn lẹ po zan dogọ nado gọalọna mẹdevo lẹ.—Owalọ 20:31, 35.
3. Ayajẹ tẹwẹ mí sọgan tindo eyin mí yí whenu susu dogọ zan to lizọnyizọn lọ mẹ?
3 Dile whenu he mí zan to lizọnyizọn lọ mẹ sù sọ, mọ wẹ dotẹnmẹ nọ hundote na mí dogọ nado duvivi ayajẹ he nọ wá sọn plọnmẹ Biblu lẹ bibẹjẹeji po anadidena yé po mẹ tọn do niyẹn. Etlẹ yin to whenue whétọ susu taidi mẹhe ma tindo ojlo, mí sọgan mọdọ aigba-denamẹ mítọn tindo sinsẹ́n hugan nuhe mí lẹn to bẹjẹeji dile mí to numimọ po azọ́nyinyọnẹn po tindo to lizọnyizọn lọ mẹ. Eyin mẹde basi gbehosọnalitọ na owhe dopo godo, e sọgan yí azọ́nyinyọnẹn he e plọn to Wehọmẹ Sinsẹ̀nzọn Gbehosọnalitọ tọn mẹ lẹ zan. (2 Tim. 2:15) Eyin mí sinyẹnlin, mí sọgan gbọnmọ dali do okún nugbo tọn lẹ he na wá de sinsẹ́n tọ́n to godo mẹ.—Yẹwh. 11:6.
4. Etẹ ji wẹ jọja he to sisẹpọ gbedewema yíyí lẹ dona lẹnnupọndo?
4 Jọja Lẹ: Eyin hiẹ to tadona wehọmẹ daho towe to alọnu wẹ, be a ko yí sọwhiwhe do lẹnnupọndo sọgodo towe ji ya? Kakajẹ din, azọ́n wehọmẹ tọn lẹ wẹ nọ yí whenu towe hugan. Etẹwẹ a na yí whenu enẹlẹ do wà to gbedewema towe yíyí godo? Kakati nado doafọna yanwle agbasa tọn, naegbọn hiẹ ma na lẹnnupọndo yanwle gbehosọnalitọ bibasi tọn ji to odẹ̀ mẹ? Azọ́nyinyọnẹn he a na plọn lẹ—yẹwhehodidọ na mẹhe wá sọn ninọmẹ voovo mẹ lẹ, awuwiwlena mawazẹjlẹgo, po nugopipe mẹpinplọn tọn po—na hẹn ale wá na we to gbẹzan towe blebu mẹ.
5. Nawẹ mẹjitọ lẹ po agun lọ po sọgan na tulimẹ nado basi gbehosọnalitọ gbọn?
5 Mẹjitọ lẹ emi, be mì to adà mìtọn yiwà nado gọalọna ovi mìtọn lẹ nado biọ sinsẹ̀nzọn whenu-gigọ́ tọn mẹ ya? Nuhe mì nọ dọ po apajlẹ dagbe mìtọn po sọgan gọalọna ovi mìtọn lẹ taun nado ze Ahọluduta lọ do otẹn tintan mẹ. (Mat. 6:33) Ray, he bẹ gbehosọnalitọ jẹeji to whenue e dotana wehọmẹ daho dọmọ: “Numọtolanmẹ onọ̀ ṣie tọn to whepoponu wẹ yindọ gbehosọnalitọ bibasi nọ dekọtọn do aliho gbẹzan tọn he nọ hẹn pekọ wá hugan mẹ.” Mẹlẹpo to agun lọ mẹ wẹ sọgan na tulimẹ nado basi sinsẹ̀nzọn gbehosọnalitọ tọn gbọn nuhe yé nọ dọ po godonọnamẹ yetọn po dali. Jose, he nọ nọ̀ Espagne dọmọ: “Mẹhe to agun ṣie mẹ lẹ nọ pọ́n azọ́n gbehosọnalitọ tọn taidi yanwle dagbe hugan na jọja lẹ. Hodidọ po pinpẹn-nutọn-yinyọnẹn yetọn na sinsẹ̀nzọn gbehosọnalitọ tọn po gọna alọgọ yetọn hẹn ẹn bọawuna mi nado bẹ sinsẹ̀nzọn gbehosọnalitọ tọn jẹeji.”
6. Etẹwẹ mí sọgan wà eyin mí ma tindo ojlo todin nado basi gbehosọnalitọ?
6 Duto Aliglọnnamẹnu lẹ Ji: Ṣigba etẹwẹ lo eyin a lẹndọ, ‘N’ma tindo ojlo nado basi gbehosọnalitọ.’ Eyin enẹ wẹ nuhe hiẹ lẹn to tintan whenu, hodẹ̀ hlan Jehovah gando numọtolanmẹ towe go bo dọna ẹn dọ ‘n’mayọnẹn eyin n’sọgan basi gbehosọnalitọ, ṣigba n’jlo na wà nuhe na hẹn homẹ towe hùn.’ (Ps. 62:8; Howh. 23:26) Enẹgodo, dín anademẹ etọn gbọn Ohó po Titobasinanu etọn po gblamẹ. Mẹsusu wẹ “dọ́” gbehosọnalitọ bibasi “pọ́n” jẹnukọn gbọn gbehosọnalitọ alọgọtọ tọn bibasi dali, podọ ayajẹ he yé tindo whàn yé nado doafọna sinsẹ̀nzọn whenu-gigọ́ tọn.—Ps. 34:8.
7. Nawẹ mí sọgan duto ayihaawe tintindo dọ mí ma sọgan mọ gànmẹ 70 he yin bibiọ to mẹsi to sunmẹsunmẹ lọ ji gbọn?
7 Etẹwẹ hiẹ sọgan wà eyin a ma kudeji dọ a sọgan mọ gànmẹ 70 he yin bibiọ to mẹsi to sunmẹsunmẹ lọ? Naegbọn a ma na dọho hẹ gbehosọnalitọ he to ninọmẹ dopolọ mẹ po hiẹ po lẹ? (Howh. 15:22) Enẹgodo, basi kandai tito voovo he a sọgan hodo lẹ tọn. Hiẹ sọgan wá mọdọ nado fli ojlẹ sọn nuwiwa he ma yin dandan tọn lẹ mẹ na lizọnyizọn lọ bọawu hugan nuhe a lẹn to tintan whenu.—Efe. 5:15, 16.
8. Naegbọn mí dona nọ vọ́ ninọmẹ mítọn gbeje pọ́n sọn ojlẹ de mẹ jẹ devo mẹ?
8 Nọ Gbeje Ninọmẹ Towe Pọ́n: Ninọmẹ mẹdopodopo tọn nọ saba diọ. Nuhe sọgbe wẹ e yin nado nọ vọ́ ninọmẹ towe gbeje pọ́n sọn ojlẹ de mẹ jẹ devo mẹ. Di apajlẹ, be hiẹ to sisẹpọ gbọjẹyíyí sọn agbasazọ́n de mẹ wẹ ya? Randy, he yawu yí gbọjẹ sọn agbasazọ́n de mẹ dọmọ: “Nudide ehe hẹn mi penugo nado bẹ gbehosọnalitọ jẹeji to pọmẹ hẹ asi ṣie, podọ e ko hùn dotẹnmẹ dotena mí nado sẹtẹn bo yì sẹ̀n to fie nuhudo sù te. N’mọ dona susugege sọn nudide he n’basi mẹ, ṣigba dehe klohugan to yé mẹ wẹ ayihadawhẹnamẹnu dagbe de.”
9. Etẹ ji wẹ asu po asi po lẹ dona lẹnnupọndo?
9 To ayihamẹlinlẹnpọn sọwhiwhe tọn godo, asu po asi po delẹ mọdọ e ma yin dandan na yé omẹ awe lẹ nado wà agbasazọ́n whenu-gigọ́ tọn. Nugbo wẹ dọ nudide ehe sọgan biọ dọ whẹndo lọ ni hẹn gbẹzan yetọn bọawu, ṣigba avọ́sinsan lọ tindo ale. John, he asi etọn doalọtena agbasazọ́n whenu-gigọ́ tọn nado yí whenu susu dogọ zan to lizọnyizọn etọn mẹ dọmọ: “Numọtolanmẹ dagbe devo de ma tin hugan nado yọnẹn dọ asi ṣie tindo mahẹ to nuwiwa gbigbọmẹ tọn lẹ mẹ to azán lọ gblamẹ.”
10. Etẹwẹ nọ whàn Klistiani lẹ nado lẹnnupọndo gbehosọnalitọ bibasi ji?
10 Dohia Owanyi po Yise po Tọn: Jehovah ko hẹn azọ́n yẹwhehodidọ tọn zun azọ́n titengbe hugan he mímẹpo sọgan wà. Aihọn ylankan ehe na yin vivasudo to madẹnmẹ, podọ mẹhe nọ dawhá ylọ oyín Jehovah tọn lẹ wẹ na yin whinwhlẹngán. (Lom. 10:13) Eyin mí tindo owanyi na ẹn sọn ahun mẹ wá bo do pinpẹn-nutọn-yinyọnẹn hia na nuhe e wà na mí lẹ, e na whàn mí nado setonuna gbedide Ovi etọn tọn nado dọyẹwheho po zohunhun po. (Mat. 28:19, 20; 1 Joh. 5:3) Humọ, yise tintindo dọ azán godo tọn lẹ mẹ wẹ mí to gbẹnọ te nugbonugbo na whàn mí nado wà nuhe go mí pé lẹpo to lizọnyizọn lọ mẹ to whenue e gbẹ́ yọnbasi, kakati nado zan aihọn lọ to gigọ́ mẹ.—1 Kọl. 7:29-31.
11. Nukun tẹwẹ hiẹ nado pọ́n eyin mẹde dọna we dọ gbehosọnalitọ dagbe de wẹ a na yin?
11 Gbehosọnalitọ bibasi ma yin whẹho gànmẹ susu yiyizan nado dọyẹwheho tọn poun gba; ṣigba dohia mẹdezejo mítọn na Jiwheyẹwhe tọn wẹ e yin. Enẹwutu, eyin mẹde dọna we dọ gbehosọnalitọ dagbe de wẹ a na yin, mọ ẹn taidi obiọ dagbe de. Podọ lẹnnupọn to odẹ̀ mẹ nado yin dopo to mẹhe nọ tindo mahẹ to adà sinsẹ̀nzọn tọn he nọ hẹn pekọ wá ehe mẹ lẹ mẹ.
[Yẹdide to weda 4]
Mẹjitọ lẹ emi, be mì to adà mìtọn yiwà nado gọalọna ovi mìtọn lẹ nado biọ sinsẹ̀nzọn whenu-gigọ́ tọn mẹ ya?
[Yẹdide to weda 5]
Jehovah ko hẹn azọ́n yẹwhehodidọ tọn zun azọ́n titengbe hugan he mímẹpo sọgan wà.