N’Mọ Huhlọn Yí Nado Doakọnna Agbasamalo Ṣie

N’flindọ whenue n’to pẹvi, mí nọ owhé pẹvi de mẹ to glètoho whèyihọ waji France tọn de mẹ, podọ n’tindo ayajẹ susu. Otọ́ ṣie basi balançoire, yèdọ aihundanu he ji yè nọ do yigọyigọ na yọpọvu lẹ te de na mi, podọ n’yiwanna wezunhinhọ̀n gbọn jipa mítọn mẹ. To 1966, Kunnudetọ Jehovah tọn lẹ jẹ owhé mítọn gbè wá ji podọ yé nọ dọhodo Biblu ji hẹ otọ́ ṣie na ojlẹ susu. To osun ṣinawe poun godo, e magbe nado lẹzun Kunnudetọ. Onọ̀ ṣie hopódona ẹn, podọ yé omẹ awe lẹ plọn mi whẹ́n to whẹndo ayajẹnọ de mẹ.

Nuhahun ṣie lẹ bẹjẹeji ojlẹ kleun de godo he mẹjitọ ṣie lẹ lẹkọyi Espagne, yèdọ fie-nu yé yin. Alọ po afọgómẹ lẹ po jẹ dùdù mi ji sinsinyẹn. To whenue mí ko gbọn doto voovo lẹ dè na owhe awe godo, mí wá mọ doto nukundeji he nọ penukundo ohú-zọ̀n lẹ go de he dọna mí madoadúdẹji dọ, “Whenu ko fẹ́.” Onọ̀ ṣie bẹ avi. Doto lọ dọna mẹjitọ ṣie lẹ dọ n’to húmẹ-zọ̀n sinsinyẹn de jẹ, podọ nugonu he dona basi hihọ́na agbasa ṣie lẹ nọ hù nuvikun dagbe he to agbasa ṣie mẹ lẹ, enẹ wẹ nọ zọ́n bọ n’nọ mọ awufiẹsa bọ hupetẹn ṣie lẹ nọ jí. Owhe ao mẹvi de poun wẹ n’yin bo ma mọnukunnujẹ nuhe doto lọ dọ lẹ mẹ sọmọ, amọ́ n’yọnẹn dọ nuhe e dọ ma yin linlin dagbe de.

Doto lọ dọna mẹjitọ ṣie lẹ nado ze mi yì dotowhé he nọ penukundo yọpọvu he to azọ̀n sinsinyẹn jẹ lẹ go. To whenue n’jẹ finẹ, awusọhia dotowhé lọ tọn gbọ́n ko hẹn mi gbọjọ. Osẹ́n opá lọ mẹ tọn lẹ sinyẹn taun: Yẹwhenọ-yọnnu pamẹnọtọ he to finẹ lẹ pà oda ṣie bo do awù he yé nọ do na awutunọ lẹ na mi. Po dasin po wẹ n’jẹ kinkanse dee ji dọ, ‘Nawẹ n’gán nọgbẹ̀ to lẹdo ehe nkọ mẹ gbọn?’

N’MỌDỌ JEHOVAH GỌALỌNA MI

Na mẹjitọ ṣie lẹ ko plọn mi dọ Jehovah wẹ n’dona nọ sẹ̀n wutu, n’gbẹ́ ma nado hodo aṣa sinsẹ̀n Katoliki tọn lẹ, ehe yin zizedai to dotowhé lọ. Amọ́, nuyise ṣie lẹ nọ paṣa yẹwhenọ-yọnnu pamẹnọtọ lọ lẹ taun. N’vẹ̀ Jehovah dọ ni ma jo mi do blo. E ma dẹn bọ n’mọ alọgọ etọn. E taidi otọ́ owanyinọ de he gbò mi fán nado do owanyi etọn hia mi bo basi hihọ́na mi.

Yé nagbè mẹjitọ ṣie lẹ nado nọ wá basi dlapọn kleun na mi to samedi lẹ. Yé nọ hẹn owe sinai do Biblu ji lẹ wá na mi na mado nọ hia bo tẹdo nuyise ṣie lẹ go. Osẹ́n opá lọ mẹ tọn ma kẹalọyi dọ yọpọvu lẹ ni tindo owe yetọn titi lẹ, etomọṣo yẹwhenọ-yọnnu lọ lẹ ma jẹagọdo dọ ma tindo owe lọ lẹ gọna Biblu ṣie, podọ n’nọ hia yé egbesọegbesọ. Humọ, n’nọ dọhona viyọnnu devo he to finẹ lẹ gando todido ṣie nado nọgbẹ̀ kakadoi to Paladisi mẹ to aigba ji go, yèdọ fie mẹdepope ma na jẹ awutu te. (Osọhia 21:3, 4) Nugbo wẹ dọ to whedelẹnu n’nọ blawu bo nọ mọdọ n’to ṣokẹdẹ, amọ́ homẹ ṣie nọ hùn dọ yise po jidide ṣie to Jehovah mẹ po fọ́n bo to sinsinyẹn deji.

To osun ṣidopo godo, doto lẹ wá jo mi. Awutu ṣie ma ko pọnte, amọ́ homẹ ṣie hùn nado lẹkọwa mẹjitọ ṣie lẹ dè. Hupetẹn ṣie lẹ gbán dogọ bọ awufiẹsa lọ vọ́ sinyẹn hugan dai tọn. To whenue n’biọ owhe aflanmẹ tọn mẹ, n’vọgán taun. Etomọṣo, to whenue n’tindo owhe 14, n’yí baptẹm po gbemima lọ po nado wà nuhe go n’pé lẹpo bo sẹ̀n Otọ́ olọn mẹ tọn ṣie. Amọ́ to whedelẹnu, n’nọ mọdọ e jo mi do. N’nọ hodẹ̀ hlan ẹn dọ, “Naegbọn a dike bọ ehe do to jijọ do go e? Jaale gbọ̀ azọ̀n ṣie na mi bo. Be hiẹ lọsu ma mọ lehe n’to yaji do ya?”

Jọja whenu ṣie ma bọawuna mi paali. N’dona kẹalọyi dọ ninọmẹ ṣie ma na pọnte. Eyin n’mọ họntọn ṣie lẹ, onú dee tọn nọ blawuna mi, na yé tindo agbasalilo bo to vivi ogbẹ̀ tọn dù. N’nọ mọ ovọ́ mẹ na dee bo ma nọ hò jẹ mẹde ji. Amọ́, whẹndo ṣie po họntọn ṣie lẹ po nọgodona mi. Homẹ ṣie nọ hùn taun gando Alicia go, yèdọ mẹhe yí owhe 20 to asie bo ka yin họntọn vivẹ́ de na mi. E gọalọna mi nado nọ mọnú zẹ̀ awutu ṣie go bo nọ tindo ojlo to mẹdevo lẹ mẹ kakati nado nọ to nulẹnpọn mapote do nuhahun ṣie lẹ ji.

AFỌDIDE DELẸ NADO TINDO GBẸZAN AYAJẸ TỌN

To whenue n’tindo owhe 18, ninọmẹ ṣie sọ ylan deji bọ opli Klistiani tọn lẹ yìyì nọ hẹn agbọ́pe mi taun. Etomọṣo, n’nọ yí ojlẹ he n’do nọ whégbè lọ zan nado plọn Biblu po sọwhiwhe po. Owe Job tọn po Psalm lẹ po gọalọna mi nado mọnukunnujẹemẹ dọ to alọnu din Jehovah Jiwheyẹwhe nọ penukundo mí go titengbe to gbigbọ-liho hugan to agbasa-liho. Dẹ̀hiho gbọzangbọzan gọalọna mi nado tindo “huhlọn he hú jọwamọ tọn” gọna “jijọho Jiwheyẹwhe tọn he yiaga hugan linlẹn lẹpo.”—2 Kọlintinu lẹ 4:7; Filippinu lẹ 4:6, 7.

Nuhahun he n’dona doakọnna to whenue n’wá tindo owhe 22 wẹ nado nọ nọ̀ kẹkẹ sẹkunọ tọn mẹ to whepoponu. N’nọ dibu dọ nukun awutunọ he nọ nọ̀ kẹkẹvi mẹ tọn de poun wẹ gbẹtọ lẹ na nọ yí do pọ́n mi. Amọ́, kẹkẹ sẹkunọ tọn zinzan hùn dotẹnmẹ dote na mi nado vọ́ mẹdekannujẹ he n’ko hẹnbu dai delẹ mọyi bosọ hẹn dona susu wá na mi. Họntọn ṣie de he nọ yin Isabel na mi ayinamẹ nado ze yanwle gànhiho 60 tọn dai nado wazọ́n dopọ hẹ ẹ na osun dopo to azọ́n yẹwhehodidọ tọn mẹ.

To tintan whenu, n’mọdọ hójlẹ wẹ e te. Ṣigba, n’biọ alọgọ Jehovah tọn, podọ whẹndo ṣie po họntọn ṣie lẹ po nọgodona mi nado jẹ yanwle enẹ kọ̀n. N’dovivẹnu taun to osun enẹ mẹ, amọ́ osun lọ juwayi bleun, podọ n’mọdọ n’duto obu po winyan ṣie po ji. N’duvivi osun enẹ tọn sọmọ bọ to 1996 n’de nado lẹzun gbehosọnalitọ whepoponu tọn bo nọ yí gànhiho 90 zan to sunmẹsunmẹ nado dọyẹwheho. Enẹ yin dopo to nudide dagbe hugan he n’basi lẹ mẹ, na n’dọnsẹpọ Jiwheyẹwhe dogọ bo tlẹ sọ mọ huhlọn yí to agbasa-liho. Yẹwhehodidọ gọalọna mi nado dọhodo yise ṣie ji hẹ mẹsusu bo gọalọna delẹ to yé mẹ nado lẹzun họntọn Jiwheyẹwhe tọn.

JEHOVAH MA JO MI DO

To alunlun whenu owhe 2001 tọn, n’basi asidan mọto tọn sinsinyẹn de bọ afọ ṣie awe lẹ wẹ́n. To whenue n’to awufiẹsa sinsinyẹn mẹ to dotowhé, n’hodẹ̀ vivẹvivẹ to ahun mẹ dọmọ: “Jehovah jaale, ma jo mi do blo!” Enẹgodo tlolo, yọnnu he to adọzan he to apá ṣie ji de kanse mi dọ, “Be Kunnudetọ Jehovah tọn wẹ a yin ya?” Na n’ma tindo huhlọn nado gblọnna ẹn wutu, n’gbọ bo yí ota do yigbe. Nawe lọ dọmọ: “N’yọ́n mì ganji! N’nọ saba hia owe mìtọn lẹ.” Nuhe e dọ miọnhomẹna mi taun. Mahopọnna ninọmẹ sinsinyẹn he mẹ n’tin te, n’penugo nado dekunnu gando Jehovah go. Lẹblanulọkẹyi nankọ die!

To whenue n’wá mọ dee mẹ pẹẹde, n’de nado yí dee zan dogọ na azọ́n yẹwhehodidọ tọn. N’nọ sinai to kẹkẹvi ṣie mẹ po afọ ṣie awe he yè mẹ̀ akalo do lẹ po bọ onọ̀ ṣie nọ sisẹ́ mi gbọn lẹdo dotowhé lọ tọn mẹ. Egbesọegbesọ, mí nọ dla awutunọ delẹ pọ́n, nọ kàn lehe yé te do biọ yé, bo nọ jo owe sinai do Biblu ji delẹ do na yé. Yigọyigọ enẹlẹ nọ hẹn agbọ́pe mi, amọ́ Jehovah nọ na mi huhlọn he sin nuhudo n’tindo.

To owhe he wayi lẹ mẹ, awufiẹsa ṣie lẹ sinyẹn deji podọ okú otọ́ ṣie tọn sọ yidogọna awubla ṣie. Etomọṣo, n’gbẹ́ nọ tẹnpọn nado hẹn pọndohlan dagbe go. Gbọnna? Whedepopenu he e yọnbasi, n’nọ nọpọ́ hẹ họntọn po hẹnnumẹ lẹ po, podọ enẹ nọ gọalọna mi nado de ayiha sọn nuhahun ṣie lẹ ji. Podọ eyin n’to dee ṣo, n’nọ hiawe, plọn Biblu, kavi dọyẹwheho na mẹdevo lẹ gbọn alokan ji.

Gbọnvona enẹ, n’nọ tẹnpọn nado mọ awuvivi sọn onú kleunkleun lẹ mẹ, taidi jẹhọn flẹ́flẹ́ he to yìnyìn kavi owán gblingblin vounvoun lẹ tọn. Onú enẹlẹ nọ whàn mi nado dopẹna Jiwheyẹwhe. Fànfún bibasi sọ nọ wà dagbe na mi taun. Di apajlẹ, to gbèdopo he yẹn po họntọn ṣie de po to yẹwhehodọ bọ e to kẹkẹvi ṣie sisẹ́, e nọte nado basi kandai de. To ajiji mẹ, kẹkẹvi ṣie yí wezun dedo dòdòmẹ bọ n’wá yì gbà do mọto he yè glin dote de go. Mí omẹ awe lẹ dibu taun, amọ́ whenue mí wá mọdọ onú sinsinyẹn de ma jọ, mí bẹ nukiko daho de.

Nususu wẹ nọ jlo mi bọ n’ma sọgan nọ wà. N’nọ pọ́n onú enẹlẹ hlan taidi ojlo he n’na hẹndi to paladisi mẹ lẹ. Whlasusu wẹ n’nọ yí nukun homẹ tọn do mọ dee hlan aihọn yọyọ he Jiwheyẹwhe dopagbe etọn lọ mẹ. (2 Pita 3:13) N’nọ mọ dee to agbasalilo mẹ, bo nọ to zọnlinzin pé bosọ nọ to vivi ogbẹ̀ tọn dù to gigọ́ mẹ. N’yiwanna hogbe Ahọlu Davidi tọn lẹ he dọmọ: “Nọtepọn OKLUNỌ: Yin huhlọnnọ bo gbọ ayiha towe ni deji.” (Psalm 27:14) Mahopọnna dọ n’to gánvọ̀, Jehovah ko hẹn mi yin huhlọnnọ. Jiwheyẹwhe nọ to huhlọn na mi nado doakọnna agbasamalo ṣie.