“Fitẹ A Ka Te Jiwheyẹwhe?”
“WHEPOPONU WẸ N’NỌ TO KINKANSE DEE DỌ: FITẸ A KA TE JIWHEYẸWHE?”—Nuhe Papa Benoît XVI dọ niyẹn to whenue e yì dla opá yasanamẹ dai tọn pọ́n to Auschwitz, Pologne.
TO WHENUE NUYLANKAN JỌ, BE A NỌ KANSE DEWE DỌ, ‘FITẸ A KA TE JIWHEYẸWHE?’ KAVI BE ADÁN DE KO GBÒ WE PỌ́N BỌ A KANSE EYIN JIWHEYẸWHE NỌ DỌ TOWE NUGBONUGBO YA?
Vlavo numọtolanmẹ he Sheila he nọ nọ̀ États-Unis tindo nkọ wẹ hiẹ lọsu nọ tindo. Whẹndo sinsẹ̀nnọ akonka de mẹ wẹ e whẹ́n te, amọ́ e dọmọ: “Sọn ovu gbọ́n wẹ n’yiwanna Jiwheyẹwhe, na ewọ wẹ Didatọ mítọn. Etomọṣo, n’ma lẹn gbede dọ e yiwanna mi. N’nọ lẹndọ e nọ doayi go e, amọ́ n’ma vẹna ẹn. N’ma lẹndọ Jiwheyẹwhe gbẹwanna mi, mọ n’ma yise dọ e nọ dọ ṣie.” Naegbọn Sheila do lẹnmọ? E dọmọ: “Adán gbò whẹndo ṣie debọdo-dego bọ e taidi dọ Jiwheyẹwhe ma tlẹ pọ́n ojẹ̀ mítọn ji.”
Taidi Sheila, vlavo a kudeji dọ Jiwheyẹwhe Ganhunupotọ lọ tin. Etomọṣo, a gán nọ kanse dewe eyin e nọ dọ towe nugbonugbo. Dawe dodonọ lọ Jobu, he yise dọ Mẹdatọ lọ tindo huhlọn po nuyọnẹn po, tindo ayihaawe gando Jiwheyẹwhe go ga. (Jobu 2:3; 9:4) To whenue adán gbò Jobu debọdo-dego bọ e ma mọ todido de hlan, e kanse Jiwheyẹwhe dọ: “Naegbọn hiẹ do whlá nukunmẹ towe bo nọ pọ́n mi di kẹntọ towe?”—Jobu 13:24.
Etẹwẹ Biblu dọ? Be Jiwheyẹwhe wẹ mí dona dowhẹ to whenue nuylankan de jọ ya? Be nude dohia dọ Jiwheyẹwhe nọ dọ gbẹtọvi lẹ tọn to paa mẹ, bosọ nọ dọ dopodopo mítọn tọn ya? Be dopodopo mítọn sọgan yọnẹn eyin e nọ doayi mí go, yọ́n mí ganji, nọ vẹawu mí, kavi nọ gọalọna mí to whenue mí do nuhahun ya?
To hosọ he bọdego lẹ mẹ, mí na gbadopọnna lehe nudida lẹ dohia dọ Jiwheyẹwhe nọ dọ mítọn do. (Lomunu lẹ 1:20) Enẹgodo, mí na dọhodo lehe Biblu dohia dọ Jiwheyẹwhe nọ dọ mítọn do ji. Lehe a dovivẹnu nado “wá yọ́n ewọ” gbọn nudida etọn lẹ po Biblu po gblamẹ sọ, mọ wẹ jidide towe lọsu na sinyẹn deji do dọ ‘e to towe hòpọn’ kavi to towe dọ.—1 Johanu 2:3; 1 Pita 5:7.