Be Jiwheyẹwhe Yọ́n We Ganji Ya?

NUHE NUDIDA LẸ PLỌN MÍ

Lẹnnupọndo haṣinṣan pẹkipẹki he ahoho he di yede taun lẹ nọ tindo ji. Yé nọ tindo owanyi sisosiso na ode awetọ. Ahoho delẹ tlẹ “ko nọ yọ́n nuhe awetọ etọn jlo na dọ eyin e ma tlẹ basi zẹẹmẹ susu,” wẹ Nancy Segal he yin ahoho bosọ nọ deanana azọ́nwatẹn he nọ basi dodinnanu do ahoho lẹ ji dọ. Nawe de he yin ahoho basi zẹẹmẹ haṣinṣan he to ewọ po awetọ etọn po ṣẹnṣẹn tọn dole: “Mí nọ yọ́n nulẹpo gando ode awetọ go.”

Etẹwẹ nọ zọ́n bọ yé nọ yọ́n yede sọmọ? Dodinnanu lẹ dohia dọ lẹdo po lehe yé yin pinplọn whẹ́n do po nọ yinuwado yé ji, amọ́ nuhe nọ zọ́n taun lọ wẹ yindọ yé omẹ awe lẹ wá sọn nuvikun dopolọ mẹ.

LẸNNUPỌN: Mẹhe dá nuvikun jiawu ehelẹ kẹdẹ wẹ yọ́n lehe dopodopo mítọn yin bibasi do to gigọ́ mẹ. Nuhe zọ́n niyẹn bọ salmu-kantọ Davidi do wlan dọmọ: “Hiẹ wẹ whlá mi do ohò onọ̀ ṣie tọn mẹ. Ohú ṣie lẹ ma yin whiwhla do we to whenue yẹn yin didá to nuglọ. . . . Nukun towe lẹ tlẹ mọ mi to whenue n’gbẹ́ pò to adọ̀mẹ; awutugonu ṣie lẹpo wẹ ko yin kinkan do owe towe mẹ.” (Salmu lẹ 139:13, 15, 16) Jiwheyẹwhe kẹdẹ wẹ yọ́n mí bo gán mọnukunnujẹ lehe mí yin didá do go to gigọ́ mẹ podọ e sọ yọ́n nue ko jọ do mí go to gbẹ̀mẹ bo gán diọ mí lẹpo. Obá he mẹ Jiwheyẹwhe yọ́n mí jẹ nọ hẹn mí kudeji dọ ewọ yọ́n nulẹpo gando mí go.

NUHE BIBLU DỌ GANDO LEHE JIWHEYẸWHE YỌ́N MÍ SỌ GO

Davidi hodẹ̀ dọmọ: “Jehovah E, hiẹ ko dindona mi bo yọ́n mi. Hiẹ nọ yọ́n whenue yẹn sinai podọ whenue yẹn fọnṣite. Hiẹ nọ mọ linlẹn he to ohò ṣie mẹ lẹ hlan sọn olá. Ohó depope he to odẹ́ ṣie ji, Jehovah E, pọ́n! Hiẹ ko yọ́n ẹn hezeheze.” (Salmu lẹ 139:1, 2, 4) Humọ, Jehovah nọ yọ́n linlẹn sisosiso mítọn lẹ bo tlẹ “nọ mọnú jẹ ayilinlẹn ayiha mẹ tọn lẹpo mẹ.” (1 Otànnugbo lẹ 28:9; 1 Samuẹli 16:6, 7) Etẹwẹ wefọ ehelẹ dohia gando Jiwheyẹwhe go?

Dile etlẹ yindọ mí gán nọma nọ dọ linlẹn mítọn lẹpo tọ́n to odẹ̀ mẹ, Mẹdatọ mítọn nọ mọ nuhe wà mí te bosọ nọ mọnukunnujẹ nuhewutu mí do to wiwà ẹ mẹ. Humọ, e nọ yọ́n dagbe he mí jlo na wà lẹ, eyin madogán mítọn lẹ tlẹ nọ glọnalina mí nado wà yé. Na Jiwheyẹwhe ko ze owanyi do ahun mítọn mẹ wutu, e họnwun dọ e nọ jlo bo tlẹ nọ to jejeji nado mọ owanyi po nuhe nọ sisẹ́ mí nado wà nudelẹ po.—1 Johanu 4:7-10.

Owe-wiwe lẹ na mí jide dọ

• “Nukun Jehovah tọn tin to dodonọ lẹ ji, otó etọn sọ nọ hùn hlan ovẹ̀ yetọn.”—1 PITA 3:12.

• Jiwheyẹwhe dopà dọmọ: “Yẹn na na we wuntuntun bo na plọn we aliho he hiẹ dona gbọn. Yẹn na ze nukun ṣie do ji we bo na na we ayinamẹ.”—SALMU LẸ 32:8.

JIWHEYẸWHE NỌ VẸAWUMẸ TAUN

Eyin mí yọnẹn dọ Jiwheyẹwhe nọ mọnukunnujẹ ninọmẹ po linlẹn mítọn lẹ po mẹ, be ehe gán gọalọna mí nado doakọnna nuhahun lẹ ya? Lẹnnupọndo nuhe jọ do Anna he wá sọn Nigéria go ji. “Gbẹninọ ṣì mi, na adán he to gbigbò mi lẹ wutu,” wẹ e dọ. “N’yin asuṣiọsi bo to nukunpedo viyọnnu ṣie he to apọ̀nmẹ-zọ̀n sinsinyẹn de jẹ bo to dotowhé go, bọ yè sọ mọ kansẹẹ anọ́ tọn na yẹnlọsu, ehe na biọ dọ yè ni wazọ́n na mi bọ n’nasọ mọ nukunpedomẹgo sinsinyẹn delẹ yí. E vẹawuna mi taun nado to dotowhé to ojlẹ dopolọ mẹ hẹ viyọnnu ṣie he to azọ̀njẹ.”

Etẹwẹ gọalọna Anna nado doakọnna? “N’nọ lẹnnupọndo wefọ delẹ ji taidi Filipinu lẹ 4:6, 7 he dọ dọ ‘jijọho Jiwheyẹwhe tọn he yiaga hugan nukunnumọjẹnumẹ lẹpo na họ́ ahun mìtọn po nugopipe apọ̀nmẹ tọn mìtọn po.’ Whedepopenu he n’flin wefọ ehe, n’nọ dọnsẹpọ Jehovah dogọ bo nọ yọnẹn dọ e nọ mọnukunnujẹ ninọmẹ ṣie mẹ hú yẹnlọsu. Mẹmẹsunnu po mẹmẹyọnnu vivẹ́ ṣie lẹ po to agun mẹ sọ gọalọna mi taun.

“Nugbo wẹ dọ azọ̀n ṣie ma ko gbọ pete, amọ́ ninọmẹ yẹn po viyọnnu ṣie po tọn ko pọnte taun. Na Jehovah to alọgọna mí wutu, mí ko plọn ma nado nọ tindo linlẹn agọ̀ to nuhahun lẹ whenu. Jakọbu 5:11 na mí jide dọmọ: ‘Mí nọ pọ́n mẹhe ko doakọnnanu lẹ hlan di ayajẹnọ. Mì ko sè gando akọndonanu Jobu tọn go bo ko sọ mọ kọdetọn he Jehovah hẹnwa, dọ Jehovah tindo owanyi sisosiso [kavi “nọ vẹawumẹ taun,” nudọnamẹ odò tọn] bosọ yin lẹblanunọ.’” Jehovah yọ́n ninọmẹ Jobu tọn ganji, podọ mílọsu gán deji dọ e yọ́n ninọmẹ depope he mẹ mí te.