“Mì Dike Hinhọ́n Mìtọn Ni Họnwun” Nado Pagigona Jehovah
“Mì dike hinhọ́n mìtọn ni họnwun to gbẹtọ lẹ nukọn, na yé nido sọgan . . na gigo Otọ́ mìtọn he tin to olọn mẹ.”—MAT. 5:16.
1. Whẹwhinwhẹ́n titengbe tẹwẹ mí tindo nado jaya?
LEHE e yin ayajẹnu do sọ nado sè dọ omẹ Jehovah tọn lẹ to jideji tindo! To owhe he wayi mẹ, mí deanana plọnmẹ Biblu 10 000 000 linlán to gbesisọ mẹ. Matin ayihaawe, ehe dohia dọ devizọnwatọ Jiwheyẹwhe tọn lẹ dike bọ hinhọ́n yetọn to wunhọ́n! Sọ lẹnnupọndo jlodotọ livi susu he wá hùnwhẹ Oflin tọn tẹnmẹ lẹ ji. Gbọnmọ dali, yé sọgan plọnnu gando owanyi he Jiwheyẹwhe dohia to whenue e wleawuna ofligọ lọ go.—1 Joh. 4:9.
2, 3. (a) Aliglọnnamẹnu tẹwẹ ma doalọtena mí nado “to wunhọ́n taidi hinhọ́n lẹ”? (b) To kọndopọ mẹ hẹ hogbe Jesu tọn lẹ he to Matiu 5:14-16 mẹ, etẹwẹ mí na gbadopọnna?
2 Lẹdo aihọn pé, omẹ Jehovah tọn lẹ nọ do ogbè voovo susu lẹ. Ṣigba, ehe ma nọ glọnalina mí nado nọpọ́ do na pipà Otọ́ mítọn Jehovah. (Osọ. 7:9) Mahopọnna anọ́nù-gbè mítọn kavi fie mí nọ nọ̀, mí sọgan to wunhọ́n “taidi hinhọ́n lẹ to aihọn lọ mẹ.”—Flp. 2:15.
3 Jideji he mí to tintindo, pọninọ he mí to vivi etọn dù, po pọndohlan nukleninọ tọn he go mí nọ dovivẹnu nado hẹn po; ehe lẹpo wẹ nọ hẹn gigo wá na Jehovah. To hosọ ehe mẹ, mí na dọhodo lehe enẹ yin wiwadotana do ji.—Hia Matiu 5:14-16.
OYLỌ-BASINAMẸ LỌ YIN HINHẸN GBAYIPE
4, 5. (a) Gbọnvona yẹwhehodidọ, aliho tẹ mẹ wẹ mí sọgan dike hinhọ́n mítọn ni họnwun te? (b) Ale tẹlẹ wẹ nuyiwa mítọn he dọnmẹdogo sọgan hẹnwa? (Pọ́n yẹdide he tin to bẹjẹeji hosọ ehe tọn.)
4 “Mẹdepope ma sọgan yin nugbonọ na Oklunọ to azán he pò ehelẹ gblamẹ . . . adavo ewọ yí dotẹnmẹ he hundote na ẹn lọ zan nado dike hinhọ́n etọn ni họnwun.” Hosọ lọ “Hinhọ́n to Zinvlu Mẹ” wẹ bẹ zẹẹmẹ enẹ hẹn, ehe yin zinzinjẹgbonu to Atọ̀họ̀-Nuhihọ́ lọ Tọn 1er juin 1925 (Glẹnsigbe) tọn mẹ. Hosọ lọ wá yidogọ dọ: “Ewọ dona wà ehe gbọn wẹndagbe lọ lilá na mẹhe to aigba ji lẹ, po gbẹninọ sọgbe hẹ aliho hinhọ́n tọn lọ po dali.” E họnwun dọ aliho dopo he mẹ mí nọ dike hinhọ́n mítọn ni họnwun te wẹ, gbọn yẹwheho wẹndagbe lọ tọn didọ po gbẹtọ lẹ hinhẹn zun devi lẹ po dali. (Mat. 28:19, 20) Humọ, mí sọgan pagigona Jehovah gbọn walọyizan Klistiani tọn mítọn dali. Whétọ lẹ po aligbọntọ lẹ po nọ doayi walọyizan mítọn go. Nukiko họntọnjihẹmẹ tọn gọna nudọdomẹ zohunhun tọn mítọn nọ dọ nususu gando mẹhe mí yin po Jiwheyẹwhe he nkọ mí to sinsẹ̀n po go.
5 Jesu dọna devi etọn lẹ dọ, “eyin mì biọ owhé de gbè, mì dọnudo whédo lọ.” (Mat. 10:12) To lẹdo he mẹ Jesu po apọsteli lẹ po nọ saba dọyẹwheho te, gbẹtọ lẹ tindo aṣa lọ nado nọ yí jonọ lẹ do whégbè. To egbehe, e ma nọ yì domọ to fisusu. Etomọṣo, whenue a to zẹẹmẹ nuhe hẹn we wá tọn basi, walọ dagbe podọ họntọnjihẹmẹ towe sọgan nọ saba de obu kavi homẹgble whétọ de tọn pò. Aliho dagbe he nọ saba yọ́n hugan nado bẹjẹeji wẹ nado konu yẹsẹ. Enẹ sọ yin nugbo to whenue mẹmẹsunnu po mẹmẹyọnnu lẹ po to mahẹ tindo to kunnudide gbangba tọn mẹ po kẹkẹvi kunnudide tọn po. Dile a to mahẹ tindo to sinsẹ̀nzọn wunmẹ enẹ mẹ, a sọgan mọdọ gbẹtọ lẹ nọ saba yinuwa to aliho dagbe mẹ eyin a konu do yé yẹsẹ bosọ dọnudo yé. Ehe sọgan whàn yé nado dọnsẹpọ mí, podọ nado kẹalọyi owe mítọn de. Nuyiwa towe he dọnmẹdogo sọgan sọ gọalọ nado bẹ hodọdopọ de jẹeji.
6. Nawẹ asu po asi po mẹhomẹ de gbloada na lizọnyizọn yetọn gbọn?
6 Asu po asi po mẹhomẹ de to Angleterre tindo nuhahun agbasalilo tọn, bọ ehe dekanpona mahẹ tintindo yetọn to lizọnyizọn whédegbè jẹ whédegbè tọn mẹ taun. Yé de nado hẹn hinhọ́n yetọn họnwun to họngbo yetọn ji. Yé nọ tẹ́ owe sinai do Biblu ji delẹ do tafo de ji to ojlẹ he mẹ mẹjitọ lẹ nọ wá nado plan ovi yetọn lẹ sọn wehọ he to yakẹ de mẹ. Tlintlindo dindin ko whàn mẹsusu nado kẹalọyi vọkan owe lọ lẹ Kanbiọ He Jọja lẹ Nọ Kanse—Gblọndo He Wazọ́n Lẹ, Bladopọ 1 po 2tọ po tọn, gọna alọnuwe lẹ. Mẹmẹyọnnu gbehosọnalitọ de sọn agun yetọn mẹ nọ hopódona yé to tito kunnudide tọn yetọn mẹ. Nuyiwa họntọnjihẹmẹ tọn etọn gọna vivẹnudido ahundopo tọn asu po asi po lọ tọn yinuwado dopo to mẹjitọ lọ lẹ mẹ ji nado kẹalọyi plọnmẹ Biblu de.
7. Nawẹ a sọgan gọalọna mẹyọyọ he wá lẹdo towe mẹ lẹ gbọn?
7 To owhe agọe tọn lẹ mẹ, fibẹtado-dintọ lẹ gọ́ otò susu mẹ. Etẹwẹ a sọgan wà nado gọalọna omẹ mọnkọtọn lẹ na yé nido wá yọ́n Jehovah po lẹndai etọn po? Nado bẹjẹeji, naegbọn a ma na plọn lehe yè nọ dọnudomẹ do to ogbè mẹyọyọ he wá lẹdo towe mẹ lẹ tọn de mẹ? JW Language yin azọ́nwanu dopo he sọgan gọalọna we nado wà enẹ. Humọ, naegbọn a ma na plọn hodidọ kleunkleun delẹ he sọgan fọnjlodotena yé? Enẹgodo, a sọgan penugo nado deanana yé yì jw.org ji, podọ nado do video voovo po owe he tin-to-aimẹ to ogbè yetọn mẹ lẹ po hia yé.—Deut. 10:19.
8, 9. (a) Alọgọ he yọ́n-na-yizan tẹwẹ mí nọ mọyi to opli osẹ ṣẹnṣẹn tọn mítọn lẹ ji? (b) Nawẹ mẹjitọ lẹ sọgan gọalọna ovi yetọn lẹ nado tindo mahẹ to opli lẹ ji gbọn?
8 Jehovah ko gbọn owanyi dali wleawu Opli Gbẹzan po Lizọnyizọn po tọn na mí, na mí nido sọgan tindo kọdetọn dagbe dogọ to lizọnyizọn lọ mẹ. Anademẹ yọ́n-na-yizan he mí nọ mọyi to opli ehe ji lẹ nọ gọalọna susu mítọn nado wleawuna jide dogọ to whenue mí to gọyìpọn lẹ basi bo to anadena plọnmẹ Biblu lẹ.
9 Mẹyọyọ susu lẹ ko doayi e go dọ ovi mítọn lẹ nọ tindo mahẹ to opli lẹ mẹ. Mẹjitọ lẹ emi, mì gọalọna ovi mìtọn lẹ nado dike hinhọ́n yetọn ni họnwun gbọn pinplọn yé nado na gblọndo to hogbe yetọn titi lẹ mẹ dali. Hodidọ kleun ahundopo tọn yetọn lẹ to whedelẹnu nọ whàn jlodotọ yọyọ lẹ nado doayi e go dọ nugbo lọ die.—1 Kọl. 14:25.
NỌ YIDOGỌNA PỌNINỌ
10. Nawẹ sinsẹ̀n-bibasi whẹndo tọn nọ yidogọna pọninọ gbọn?
10 Aliho devo he mẹ a na dike hinhọ́n towe ni họnwun te wẹ nado nọ yidogọna pọninọ to whẹndo towe mẹ podọ to agun towe mẹ. Aliho de he mẹ mẹjitọ lẹ sọgan wàmọ te wẹ gbọn tito Sinsẹ̀n-Bibasi Whẹndo tọn gbesisọ tọn de zizedai dali. Mẹsusu nọ yí Televiziọn JW pinpọn dogọ to whedelẹnu to osun lọ gblamẹ. To tito-to-whinnu lọ pinpọn godo, naegbọn mì ma na yí whenu zan nado dọhodopọ do lehe nuagokun he yin hodọdeji lẹ sọgan yin yíyí-do-yizan mẹ do ji? To whenue mẹjitọ de to anadena sinsẹ̀n-bibasi whẹndo tọn, e dona flindọ anademẹ he sin hudo ovi pẹvi de tindo sọgan gbọnvo taun na ovi aflanmẹ de tọn. Mì nọ basi yọ́n-na-yizan he sọgbe hosọ he mì nọ gbadopọnna lẹ tọn, na hagbẹ whẹndo lọ tọn dopodopo nido mọaleyi sọn e mẹ.—Salm. 148:12, 13.
Ojlo didohia to mẹhomẹ lẹ mẹ nọ jlọmẹdote taun (Pọ́n hukan 11tọ)
11-13. Nawẹ mímẹpo sọgan yidogọna pọninọ to agun mẹ bo gọalọna mẹdevo lẹ nado dike hinhọ́n yetọn ni họnwun gbọn?
11 Nawẹ jọja lẹ sọgan yidogọna pọninọ to agun mẹ bo gbọnmọ dali na tuli mẹdevo lẹ nado dike hinhọ́n yetọn ni họnwun gbọn? Eyin jọja Klistiani de wẹ a yin, naegbọn a ma na yí do basi yanwle nado nọ do ojlo hia to mẹhomẹ lẹ mẹ? A sọgan biọ to yé si po sisi po nado pìntàn numimọ he yé tindo to owhe sinsẹ̀nzọn tọn yetọn lẹ gblamẹ de tọn na we. A na mọdọ ehe na jlọ we dote taun, podọ hiẹ po yé po na tlẹ yin whinwhàn dogọ nado dike hinhọ́n nugbo lọ tọn ni họnwun. Podọ, mímẹpo wẹ sọgan dovivẹnu nado nọ dokuavọna mẹhe wá opli to Plitẹnhọ Ahọluduta tọn mẹ lẹ. Eyin a nọ wàmọ, a na yidogọna pọninọ, bo nasọ whàn jonọ lẹ na yelọsu nido tindo ojlo lọ nado dike hinhọ́n yetọn ni họnwun. A sọgan nọ dovivẹnu nado dọnudo jonọ lẹ po nukiko yẹsẹ he dọnmẹdogo de po, podọ vlavo nado tlẹ nọ gọalọna mẹyọyọ lẹ nado mọ aisinnu. Nọ tẹnpọn nado do yé hia mẹdevo lẹ, bo gbọnmọ dali hẹn mẹyọyọ lẹ voawu.
12 Eyin a yin azọ́ndena nado deanana opli sinsẹ̀nzọn kunnudegbe tọn lẹ, a sọgan wà nususu nado gọalọna mẹhomẹ lẹ nado tindo mahẹ to lizọnyizọn lọ mẹ. Be yé tindo aigba-denamẹ de he sọgbe hẹ ninọmẹ yetọn ya? To whẹho delẹ mẹ, a sọgan basi tito na yé nido wazọ́n dopọ hẹ jọja de he sọgan gọalọna yé. A sọgan sọ do mẹtọnhopọn hia mẹhe agbasamalo po ninọmẹ yetọn po nọ dekanpona nuhe yé sọgan wà lẹ. Mọwẹ, mẹtọnhopọn po wuntuntun towe po sọgan gọalọna jọja po mẹho po, mẹhe tindo numimọ gọna mẹhe ma tindo sọmọ lẹ nado yí zohunhun do lá wẹndagbe lọ.—Lev. 19:32.
13 Salmu-kantọ lọ yin whinwhàn nado dọmọ: “Lehe e yọ́n bo vivi do sọ dọ mẹmẹsunnu lẹ ni nọ nọpọ́ to kọndopọ mẹ!” (Hia Salmu lẹ 133:1, 2.) Na Islaelivi lẹ tin to pọninọ mẹ wutu, yé mọaleyi sọn nuyiwadomẹji dagbe sinsẹ̀n-basitọ Jehovah tọn devo lẹ tọn mẹ taun. E taidi amisisa owán gblingblinnọ de he nọ wà dagbe na agbasa. Naegbọn a ma na magbe nado nọ yinuwado mẹdevo lẹ ji to aliho dagbe mẹ bo gbọnmọ dali yidogọna pọninọ to mẹmẹsunnu po mẹmẹyọnnu lẹ po ṣẹnṣẹn? Eyin a ko to mọwà, be a jẹna pipà. Be a sọgan nọ “hùndonuvo,” enẹ wẹ nado nọ wàmọ jẹ obá he gbloada hugan de mẹ podọ to gbesisọ mẹ dogọ ya?—2 Kọl. 6:11-13, Odò.
14. Etẹwẹ a sọgan wà nado dike hinhọ́n towe ni họnwun na kọmẹnu towe lẹ?
14 Etẹwẹ lo na nuhe dù vivẹnudido dogọ nado dike hinhọ́n nugbo Biblu tọn ni họnwun jẹ kọmẹnu towe lẹ dè? Hodidọ po nuyiwa towe to aliho he jọmẹ mẹ lẹ po sọgan dọ̀n kọmẹnu towe de wá nugbo lọ mẹ. Kanse dewe dọ: ‘Nukun tẹwẹ kọmẹnu ṣie lẹ nọ yí do pọ́n mi? Be n’nọ hẹn owhé po nutindo ṣie lẹ po do wiweji bo nọ gbọnmọ dali tindo nuyiwadomẹji dagbe do kọmẹnu ṣie lẹ ji ya? Be n’nọ ze afọdide tintan lọ nado gọalọna mẹdevo lẹ ya?’ To whenue a to hodọdopọ hẹ Kunnudetọ devo lẹ, naegbọn a ma na kanhose yé gando lehe homẹdagbe po walọyizan dagbe yetọn po ko yinuwado hẹnnumẹ, kọmẹnu, azọ́nwatọgbẹ́ kavi wehọmẹvigbẹ́ yetọn lẹ ji do go? E yọnbasi taun dọ, a na sè numimọ dagbe lẹ sọn yé dè.—Efe. 5:9.
MÌ GBỌṢI NUKLE
15. Naegbọn e do yin nujọnu nado gbọṣi nukle?
15 Pọndohlan mítọn nọ wá họnwun dile mí to vivẹnudo nado hẹn obá he mẹ mí nọ dike hinhọ́n mítọn ni họnwun jẹ jideji. Jesu na tuli devi etọn lẹ whlasusu dọmọ: “Mì gbọṣi nukle.” (Mat. 24:42; 25:13; 26:41) Matin ayihaawe, eyin mí nọ lẹndọ “nukunbibia daho” lọ gbẹ́ pò to nukọn taun, dọ e na wá to ojlẹ de mẹ, amọ́ e ma yin to gbẹwhenu mítọn, mí na gboawupo nado hẹn pọndohlan niyaniya-yinyin tọn go to azọ́n yẹwhehodidọ tọn lọ mẹ. (Mat. 24:21) Kakati nado hẹn hinhọ́n mítọn họnwun gblegede na kọmẹnu mítọn lẹ, hinhọ́n mítọn na jẹ yiyẹ̀ pò ji bo tlẹ sọgan ṣí pete.
16, 17. Etẹwẹ a sọgan wà nado hẹn pọndohlan lọ nado gbọṣi nukle go?
16 Dile ojlẹ awusinyẹn tọn ehelẹ to yinylan deji, mímẹpo wẹ dona gbọṣi nukle. Jehovah na yinuwa to ojlẹ he sọgbe mẹ. Ayihaawe ma tin gando enẹ go. (Mat. 24:42-44) Todin whẹ́, nọ do homẹfa hia, bo gbọṣi nukle hugan gbede pọ́n. Nọ hia Ohó Jiwheyẹwhe tọn egbesọegbesọ, bo nọ to aṣeji nado nọ hodẹ̀. (1 Pita 4:7) Nọ na ayidonugo apajlẹ dagbe mẹmẹsunnu po mẹmẹyọnnu po he gbẹzan yetọn dohia dọ yé tindo ayajẹ dile yé gbọṣi nukle bosọ nọ dike hinhọ́n yetọn ni to wunhọ́n lẹ tọn. Apajlẹ dagbe dopo wẹ numimọ he tin to hosọ lọ “N’Tẹdo Avọ̀tonu Ju de Tọn Go sọn Owhe Kandegbàn Die” mẹ, ehe yin zinzinjẹgbonu to Atọ̀họ̀-Nuhihọ́ lọ Tọn 15 avril 2012, weda 18-21 mẹ.
17 Nọ hẹn alọnu towe ján po nuwiwa gọna gbẹdido he nọ jlọmẹdote lẹ po to gbẹzan towe mẹ. Enẹ na hẹn ayajẹ daho wá na we, podọ e na taidi na we dọ ojlẹ lẹ to jujuwayi po awuyiya po. (Efe. 5:16) To owhe kanweko die, mẹmẹsunnu mítọn lẹ ko hẹn alọnu yetọn ján bo ko wà nususu dotana. Ṣigba, mí to nususu humọ wadotana to egbehe to anademẹ Jehovah tọn glọ. Mí nọ dike hinhọ́n mítọn ni họnwun jẹ obá he mẹ yè ma sọgan ko lẹn dai dọ e na họnwun jẹ.
Dlapọn lẹngbọhọtọ tọn lẹ nọ hùn dotẹnmẹ dote na mí nado dín nuyọnẹn sọn Ohó Jiwheyẹwhe tọn mẹ (Pọ́n hukan 18, 19tọ)
18, 19. Nawẹ mẹho agun tọn lẹ sọgan gọalọna mí nado tin to aṣeji bo yin zohunhunnọ gbọn? Na apajlẹ.
18 Yinyọnẹn dọ mape mítọn ma nọ glọnalina mí nado sẹ̀n Jehovah to aliho he ewọ kẹalọyi mẹ nọ hẹn yise mítọn lodo taun. Enẹwutu, nọ do pinpẹn-nutọn-yinyọnẹn hia na “sunnu lẹ di nunina,” yèdọ mẹho agun tọn he Jehovah wleawudaina lẹ. (Hia Efesunu lẹ 4:8, 11, 12.) To whedevonu he mẹho agun tọn de na dla we pọ́n, yí dotẹnmẹ hundote lọ zan nado mọaleyi sọn nuyọnẹn po ayinamẹ etọn po mẹ.
19 Mẹho awe to Angleterre siọ oylọ asu po asi po he to nuhahun mẹ de tọn. Asi lọ mọdọ asu emitọn ma yin tatọ́ dagbe de to gbigbọ-liho. Asu lọ yigbe dọ emi ma yin mẹplọntọ dagbe de, podọ emi ma nọ basi tito na sinsẹ̀n-bibasi whẹndo tọn gbesisọ tọn de. Mẹho lọ lẹ dọ̀n ayidonugo asu po asi po lọ tọn wá apajlẹ Jesu tọn ji. Ewọ nọ penukundo devi etọn lẹ go podọ nuhudo yetọn lẹ nọ duahunmẹna ẹn. Mẹho lọ lẹ na tuli asu lọ nado hodo apajlẹ Jesu tọn. Yé dotuhomẹna asi lọ nado nọ fahomẹ. Yé na asu po asi po lọ ayinamẹ he yọ́n-na-yizan lẹ gando lehe yé sọgan wazọ́n dopọ nado nọ basi sinsẹ̀n-bibasi whẹndo tọn hẹ ovi yetọn awe lẹ do go. (Efe. 5:21-29) To nukọn mẹ, mẹho lọ lẹ pà asu lọ na vivẹnudido etọn lẹ. Yé na ẹn tuli nado nọ sinyẹnlin podọ nado nọ ganjẹ gbigbọ wiwe go nado mọ alọgọ yí nado lẹzun tatọ́ dagbe de to gbigbọ-liho. Ojlo po godonọnamẹ owanyinọ yetọn po ko gọalọna whẹndo ehe nado dike hinhọ́n yetọn ni họnwun.
20. Etẹwẹ a sọgan donukun dile a dike bọ hinhọ́n towe to wunhọ́n?
20 Salmu-kantọ lọ jihàn dọmọ: “Ayajẹnọ wẹ mẹdepope he nọ dibusi Jehovah, yèdọ mẹhe nọ zinzọnlin to aliho Etọn lẹ ji.” (Salm. 128:1) Eyin a nọ dike hinhọ́n towe ni họnwun—gbọn oylọ-bibasi na mẹdevo lẹ nado sẹ̀n Jiwheyẹwhe, nuyiwa to aliho he nọ yidogọna pọninọ mẹ po pọndohlan lọ nado gbọṣi nukle po go hinhẹn dali—a na mọdọ ayajẹ towe na jideji. Mẹdevo lẹ na mọ azọ́n dagbe towe lẹ, podọ mẹsusu na yin whinwhàn nado na gigo Otọ́ mítọn.—Mat. 5:16.