Whẹdida Jiwheyẹwhe Tọn lẹ—Be Ewọ Nọ Na Avase to Gigọ́ mẹ to Whelẹponu Ya?

LẸNUNNUYỌNẸNTỌ he nọ basi dodinnanu do ninọmẹ aimẹ tọn ji de to yẹdide Intẹnẹt ji tọn de gbeje pọ́n. E doayi e go dọ yujẹhọn sinsinyẹn de jlo na yìn do lẹdo he mẹ gbẹtọ sù taun te de ji. Na dagbemẹninọ gbẹtọ lẹ tọn duahunmẹna ẹn wutu, e to avase na yé vẹkuvẹku whẹpo whenu nido fẹ́.

To aliho dopolọ mẹ, Jehovah to avase na gbẹtọvi lẹ to egbehe gando “yujẹhọn” de go, he sọ dobu taun hú devo depope he go yé sọgan ko sèhó gando to linlinnamẹnu lẹ mẹ. Nawẹ ewọ to mọwà gbọn? Podọ, naegbọn mí sọgan kudeji dọ ewọ to whenu he pé jodona gbẹtọvi lẹ nado yinuwa? Nado mọ gblọndo lọ lẹ, jẹnukọn whẹ́, mì gbọ mí ni gbadopọnna avase delẹ he Jehovah na to hohowhenu.

WHENUE JIWHEYẸWHE NA AVASE JẸNUKỌN

To ojlẹ Biblu tọn lẹ mẹ, Jehovah na avase gando “yujẹhọn” kavi nuyiwa whẹdida tọn voovo lẹ go, ehe ewọ na hẹnwa mẹhe nọ desọn ojlo mẹ nado vẹtolina gbedide etọn lẹ ji. (Howh. 10:25; Jel. 30:23) To whẹho dopodopo mẹ, e nọ hẹn zun yinyọnẹn na mẹhe go e gando lẹ ojlẹ dindẹn jẹnukọn, bosọ nọ na yé anademẹ nado basi diọdo lẹ to kọndopọ mẹ hẹ ojlo etọn. (2 Ahọ. 17:12-15; Nẹh. 9:29, 30) Nado whàn yé nado yinuwa to aliho he sọgbe mẹ, e nọ saba yí devizọnwatọ nugbonọ etọn he to aigba ji lẹ zan nado lá whẹdida etọn lẹ, podọ nado do niyaniya-yinyin whẹho lọ tọn hia.—Amọ. 3:7.

Noa yin dopo to devizọnwatọ nugbonọ mọnkọtọn lẹ mẹ. Na owhe susu lẹ, ewọ yí adọgbigbo do na avase gbẹtọ fẹnnuwatọ podọ danuwatọ ojlẹ etọn mẹ tọn lẹ gando Singigọ he na wá aigba lọ blebu ji de go. (Jen. 6:9-13, 17) Ewọ sọ dọna yé nuhe yé dona wà nado luntọ́n—sọmọ bọ ewọ wá yin yiylọdọ “yẹwhehodọtọ dodo tọn.”—2 Pita 2:5.

Mahopọnna vivẹnudido Noa tọn lẹ, mẹhe nọgbẹ̀ jẹnukọnna Singigọ lọ lẹ gbẹkọ wẹndomẹ Jiwheyẹwhe tọn go. Yé dohia dọ yé ma tindo yise paali. Taidi kọdetọn de, yé kú to whenue Singigọ lọ “wá bo plọ́ yemẹpo yì.” (Mat. 24:39; Heb. 11:7) Dile vasudo yetọn to dindọnsẹpọ, yé ma sọgan dọ gbede dọ Jiwheyẹwhe ma na emi avase.

To ojlẹ devo lẹ mẹ, Jehovah na avase mẹdelẹ ojlẹ vude whẹpo “yujẹhọn” whẹdida etọn tọn nido bẹjẹeji. Etomọṣo, e hẹn ẹn diun dọ whenu he pé yin nina mẹhe go e gando lẹ nado yinuwa. Di apajlẹ, e na avase susu to Azọ̀nylankan Ao he e yí do hò Egipti hohowhenu tọn lọ lẹ whenu. Di dohia, Jehovah do Mose po Aalọn po hlan nado na avase Falo po devizọnwatọ etọn lẹ po gando azọ̀nylankan ṣinawetọ he bẹ kẹ́njikun he hẹnnugble taun de hẹn lọ go. To whenuena e yindọ kẹ́njikun lọ na bẹjẹeji to wunkẹngbe, be Jiwheyẹwhe na yé whenu he pé nado dín fibẹtado bo họ̀ngán sọn yujẹhọn lọ nù ya? Biblu dọmọ: “Devizọnwatọ Falo tọn he dibusi ohó Jehovah tọn lẹ yawu yì plan devizọnwatọ yetọn titi lẹ po kanlin-yìnyìn yetọn lẹ po yì họsa, ṣigba mẹhe ma setonuna ohó Jehovah tọn lẹ jo devizọnwatọ po kanlin-yìnyìn yetọn lẹ po do danji.” (Eks. 9:18-21) E họnwun dọ Jehovah na avase to gigọ́ mẹ, ehe zọ́n bọ mẹhe yawu yinuwa lẹ dapana awugble azọ̀nylankan enẹ tọn lẹ.

Mọdopolọ, Falo po devizọnwatọ etọn lẹ po sèava jẹnukọnna azọ̀nylankan aotọ lọ. Ṣogan, yé gbọn nulú dali gbẹkọ avase lọ go. (Eks. 4:22, 23) Taidi kọdetọn de, visunnu plọnji yetọn lẹ kú. Lehe enẹ blawu do sọ! (Eks. 11:4-10; 12:29) Be yé sọgan ko setonuna avase lọ domẹwhenu ya? Gbau! Mose ma dọngbàn nado na avase Islaelivi lẹ gando azọ̀nylankan aotọ he to unklẹn lọ go, podọ e na yé anademẹ lẹ gando lehe yé sọgan whlẹn whẹndo yetọn lẹ do go. (Eks. 12:21-28) Omẹ nẹmu wẹ setonuna avase lọ? Sọgbe hẹ sọhayinanú delẹ, gbẹtọ livi atọ̀n wẹ lùn whẹdida Jiwheyẹwhe tọn tọ́n bo tọ́n sọn Egipti, yèdọ Islaelivi lẹ gọna “gbẹtọgun daho flusọ́” de he mẹ Egiptinu lẹ po mẹhe ma yin Islaelivi lẹ po tin te.—Eks. 12:38; Odò.

Dile apajlẹ ehelẹ dohia do, Jehovah hẹn ẹn diun to whelẹponu dọ gbẹtọ lẹ tindo whenu he pé nado setonuna avase etọn lẹ. (Deut. 32:4) Naegbọn Jiwheyẹwhe do wàmọ? Apọsteli Pita basi zẹẹmẹ dọ Jehovah “ma jlo dọ mẹdepope ni yin vivasudo ṣigba jlo dọ mẹlẹpo ni wá lẹnvọjọ kọ̀n.” (2 Pita 3:9) Na nugbo tọn, Jiwheyẹwhe nọ hò gbẹtọ lẹ tọn pọ́n. Ewọ jlo dọ yé ni lẹnvọjọ bo yinuwa sọgbe hẹ ayinamẹ etọn lẹ whẹpo whẹdida etọn nido bẹjẹeji.—Isa. 48:17, 18; Lom. 2:4.

NỌ SETONUNA AVASE JIWHEYẸWHE TỌN TO EGBEHE

To egbehe ga, gbẹtọ lẹpo dona yinuwa gando avase niyaniya tọn he to yinyin lilá lẹdo aihọn pé to alọnu de go. To whenue Jesu to aigba ji, e na avase dọ titonu ehe na wá yin vivasudo to “nukunbibia daho” de whenu. (Mat. 24:21) Na nuhe dù whẹdida sọgodo tọn enẹ, e dọ dọdai he họnwun de gando nuhe hodotọ etọn lẹ na mọ bosọ tindo numimọ etọn lẹ dile ojlẹ enẹ to dindọnsẹpọ go. Gbọnmọ dali, Jesu zinnudo nujijọ ayidego tọn he mí to mimọ lẹdo aihọn pé to egbehe lẹ ji.—Mat. 24:3-12; Luku 21:10-13.

To kọndopọ mẹ hẹ dọdai enẹ, Jehovah to tudohomẹna mẹlẹpo to egbehe nado litaina gandudu owanyinọ Etọn. E jlo dọ gbẹtọvi tonusetọ lẹ ni duvivi gbẹzan he pọnte de tọn todin gọna dona sọgodo tọn lẹ tọn to aihọn yọyọ dodowiwa tọn etọn mẹ. (2 Pita 3:13) Nado na tuli mẹlẹ na yé nido tindo yise to opagbe etọn lẹ mẹ, Jehovah wleawuna owẹ̀n gbẹwhlẹngán tọn de, yèdọ “wẹndagbe Ahọluduta lọ tọn,” ehe Jesu dọ dọdai dọ “yẹwheho [etọn] na yin didọ to aigba fininọ lẹpo ji taidi okunnu de na akọta lẹpo.” (Mat. 24:14) Jiwheyẹwhe ko basi titona sinsẹ̀n-basitọ nugbo etọn lẹ nado ‘dekunnu’ kavi lá owẹ̀n etọn ehe to nudi otò 240 mẹ. Jehovah jlo dọ gbẹtọ susu dile e yọnbasi do ni yinuwa sọgbe hẹ avase lọ bo lùn “yujẹhọn” whẹdida dodo etọn tọn he ja lọ tọ́n.—Zef. 1:14, 15; 2:2, 3.

Enẹwutu, onú titengbe he mí na kanse míde ma yin, eyin vlavo Jehovah nọ jo whenu he pé do na gbẹtọ lẹ nado yinuwa sọgbe hẹ avase etọn gba. Kunnudenu lẹ dohia dọ ewọ nọ wàmọ to whepoponu. Ṣigba, kanbiọ titengbe lọ wẹ yindọ: Be gbẹtọ lẹ na yinuwa sọgbe hẹ avase Jiwheyẹwhe tọn domẹwhenu ya? Taidi wẹnsagun Jiwheyẹwhe tọn lẹ, mì gbọ mí ni zindonukọn nado to alọgọna gbẹtọ susu dile e yọnbasi do nado lùn opodo titonu ehe tọn tọ́n.