Jijọho kẹdẹ wẹ tin to aihọn mẹ to whenue Jiwheyẹwhe to gandu
Naegbọn Ahọluduta Jiwheyẹwhe Tọn Dona Wá?
To whenue gbẹtọvi tintan lẹ yin didá, Mẹdatọ mítọn he yinkọ etọn nọ yin Jehovah kẹdẹ wẹ paṣẹ do aihọn lọ ji. E nọ yí owanyi do dugán. E wleawuna jipa Edẹni tọn he yin nọtẹn dagbedagbe de na yé. E sọ wleawu núdùdù susu tọn na yé. Humọ, azọ́n dagbe de wẹ e zedo alọmẹ na yé. (Jenẹsisi 1:28, 29; 2:8, 15) Jijọho mẹ wẹ gbẹtọvi lẹ na te todin eyin yé ko dike bọ Jiwheyẹwhe dugán do yé ji.
Gbẹtọvi tintan lẹ gbẹ́ gandudu Jiwheyẹwhe tọn dai
Biblu dehia dọ angẹli atẹṣitọ de he wá yin yiylọdọ Satani Lẹgba diọnukunsọ Jiwheyẹwhe bo dọ e ma tindo jlọjẹ nado dugán do ogbẹ̀ lọ ji. Nuhe dọ e te wẹ yindọ onú na pọnte na gbẹtọvi lẹ eyin Jiwheyẹwhe ma to anadena yé. E blawu dọ mẹjitọ mítọn tintan lẹ Adam po Evi po hodo Satani bo diọnukunsọ Jiwheyẹwhe.—Jenẹsisi 3:1-6; Osọhia 12:9.
Na Adam po Evi po gbẹ́ gandudu Jiwheyẹwhe tọn dai wutu, Jiwheyẹwhe yàn yé sọn Paladisi lọ mẹ bọ yé ma gán nọgbẹ̀ kakadoi ba. (Jenẹsisi 3:17-19) Tonumase yetọn hẹnnugble na ovi he yé wá ji lẹ lọsu. Biblu dohia dọ na Adam waylando wutu, ‘ylando gbọn ewọ gblamẹ biọ aihọn mẹ podọ okú gbọn ylando gblamẹ wá.’ (Lomunu lẹ 5:12) Nuhahun devo he ylando sọ hẹnwa wẹ yindọ: “Gbẹtọ ko dugán do gbẹtọ ji na awugble etọn.” (Yẹwhehodọtọ 8:9) To hogbe devo mẹ, eyin gbẹtọvi lẹ gbẹ́ to gandu, nuhahun ma na hán gbede.
GANDUDU GBẸTỌVI TỌN WÁ AIMẸ
Nimlọdi jẹagọdo Jehovah
Gbẹtọvi tintan he Biblu dọ dọ e dugán wẹ Nimlọdi. Podọ e jẹagọdo gandudu Jehovah tọn. Sọn ojlẹ Nimlọdi tọn mẹ gbọ́n wẹ gandutọ susu nọ ṣì aṣẹpipa yetọn zan. Abajọ bọ to nudi owhe 3 000 die, Ahọlu Sọlomọni wlan dọ: “Yẹn mọ dasin mẹhe yin kọgbidina lẹ tọn, podọ yé ma tindo mẹde nado miọnhomẹna yé. Kọgbidinamẹtọ yetọn lẹ sọ tindo huhlọn, yé masọ tindo mẹde nado miọnhomẹna yé.”—Yẹwhehodọtọ 4:1.
Nulẹ ma gbọnvo to egbehe. To 2009, owe he ONU detọ́n de dohia dọ “dopo to nuhe zọ́n bọ nuylankan do to jijọ lẹ mẹ” wẹ yindọ gandutọ lẹ nọ ṣì aṣẹpipa zan.
NUDE DONA YIN WIWÀ!
Aihọn do hudo gandudu dagbe de tọn. Podọ nuhe Mẹdatọ mítọn dopà etọn niyẹn!
Gandudu gbẹtọvi tọn dagbe hugan lẹ lọsu ma gán didẹ nuhahun lẹ
Jiwheyẹwhe ko do Ahọluduta, kavi gandudu de ai he na diọtẹnna gandudu gbẹtọvi tọn lẹpo podọ “ewọ kẹdẹ wẹ na nọte kakadoi.” (Daniẹli 2:44) Ahọluduta enẹ wẹ mẹsusu nọ hodẹ̀ dọ ni wá. (Matiu 6:9, 10) Amọ́, e ma yin Jiwheyẹwhe wẹ na deanana gandudu ehe. Kakatimọ, ewọ de mẹde he ko nọgbẹ̀ to aigba ji pọ́n nado yin Ahọlu. Mẹnu wẹ mẹlọ?