Nọ Diọlinlẹnnamẹ to Mẹpinplọn Towe Mẹ
1 Taidi Apọsteli Paulu, lizọnyizọnwatọ kọdetọn dagbenọ lẹ yọnẹn dọ ‘ohó nugbo tọn lọ yiyizan to aliho he sọgbe mẹ’ bẹ nususu hẹn hugan nado nọ yihodọ sọn Owe Wiwe lẹ mẹ poun. (2 Tim. 2:15) To whenuena mí to Ohó Jiwheyẹwhe tọn yizan, nawẹ mí sọgan ‘diọlinlẹnnamẹ’ to mẹpinplọn mítọn mẹ gbọn?—Owalọ 28:23.
2 Dike Ohó Jiwheyẹwhe Tọn Ni Dọho: Tintan, dọ̀n ayidonugo todoaitọ lọ tọn wá Biblu ji to aliho de mẹ bọ e na kẹalọyi nuyọnẹn he tin to e mẹ po sisi po. Jidide mítọn to Ohó Jiwheyẹwhe tọn mẹ sọgan whàn todoaitọ mítọn nado dotoaina wefọ he mí to hihia de po sọwhiwhe po. (Heb. 4:12) Mí sọgan dọ poun dọ: “N’mọdọ linlẹn Jiwheyẹwhe tọn lẹ yinyọnẹn gando whẹho ehe go sọgan yọ́n-na-yizan. Doayi nuhe Ohó etọn dọ go.” Whedepopenu he e yọnbasi, dike Ohó Jiwheyẹwhe tọn lọsu ni dọho gbọn wefọ lẹ hihia tlọlọ sọn Biblu mẹ dali.
3 Awetọ, basi zẹẹmẹ wefọ he yin yiyizan lọ tọn. E nọ vẹawuna mẹsusu nado mọnukunnujẹ wefọ de mẹ whla tintan he yé sè hihia etọn. E nọ saba biọ dọ mí ni basi zẹẹmẹ nado do kanṣiṣa he tin to wefọ lọ po hosọ he ji mí to hodọdo lọ po ṣẹnṣẹn hia. (Luku 24:26, 27) De nuagokun he tin to wefọ lọ mẹ lẹ tọ́n. Kanbiọ de sọgan gọalọ nado hẹn ẹn diun dọ todoaitọ lọ mọnukunnujẹ nuagokun lọ mẹ ganji.—Howh. 20:5; Owalọ 8:30.
4 Yihojlẹdohogo sọn Owe-wiwe lẹ Mẹ: Atọ̀ntọ, dovivẹnu nado jẹ ahún gbẹtọ lẹ tọn mẹ. Gọalọna whétọ lọ nado mọ lehe wefọ lọ gando ewọ go tlọlọ do. Hoyijlẹdohogo sọn Owe-wiwe lẹ mẹ sọgan diọlinlẹnna mẹde nado jla pọndohlan etọn do. (Owalọ 17:2-4; 19:8) Di apajlẹ, to Psalm 83:18 hihia godo, mí sọgan yihojlẹdohogo dọ, dandannu wẹ e yin nado yọ́n oyín mẹde tọn whẹpo do wleawuna haṣinṣan mẹdetiti tọn hẹ mẹlọ. Enẹgodo, vlavo hiẹ sọgan kanse dọ, “Be hiẹ lẹndọ oyín Jiwheyẹwhe tọn yinyọnẹn na hẹn odẹ̀ towe lẹ gọ́ na zẹẹmẹ dogọ ya?” Wefọ lọ yiyizan gando gbẹzan whétọ lọ tọn go to aliho ehe mẹ na do yọ́n-na-yizan wefọ lọ tọn hia. Mẹpinplọn sọn Ohó Jiwheyẹwhe tọn mẹ to aliho linlẹndiọnamẹ tọn mọnkọtọn mẹ nọ dọ̀n ahunjijlọnọ lẹ nado wá sẹ̀n Jiwheyẹwhe nugbo ogbẹ̀nọ lọ, Jehovah.—Jel. 10:10.
[Kanbiọ Oplọn tọn lẹ]
1. Etẹwẹ Ohó Jiwheyẹwhe tọn yiyizan po kọdetọn dagbe po to lizọnyizọn lọ mẹ nọ saba bẹhẹn?
2. Nawẹ mí sọgan gọalọna gbẹtọ lẹ nado tindo sisi na Ohó Jiwheyẹwhe tọn dogọ gbọn?
3. To wefọ de hihia godo, etẹwẹ mí sọgan wà nado gọalọna todoaitọ mítọn na e nido mọnukunnujẹ zẹẹmẹ wefọ lọ tọn mẹ?
4. Eyin mí jlo na diọlinlẹnnamẹ to mẹpinplọn mítọn mẹ, afọdide godo tọn tẹwẹ yin dandannu?