Klistiani Lizọnyizọnwatọ lẹ Dona Nọ Hodẹ̀ — WESẸDOTẸN INTẸNẸT JI TỌN Watchtower Tọn

Klistiani Lizọnyizọnwatọ lẹ Dona Nọ Hodẹ̀

1. Etẹwẹ yin dandannu eyin mí na wà lizọnyizọn mítọn dotana?

¹ Mí ma sọgan wà lizọnyizọn lọ dotana gbọn huhlọn mítọn dali gba. Jehovah nọ na mí huhlọn nado wà azọ́n lọ. (Flp. 4:13) E nọ yí angẹli etọn lẹ zan nado gọalọna mí nado sọgan mọ omẹ taidi lẹngbọ lẹ. (Osọ. 14:6, 7) Jehovah wẹ nọ hẹn okún he mí do bo húsinna lẹ whẹ́n. (1 Kọl. 3:6, 9) Lehe e yin nujọnu dọ Klistiani lizọnyizọnwatọ lẹ ni nọ ganjẹ Otọ́ mítọn olọn tọn go to odẹ̀ mẹ do sọ!

2. Etẹlẹ ji wẹ mí dona nọ hodẹ̀ do?

² Nọ Hodẹ̀ to Ninọmẹ Lẹpo Mẹ: Mí dona nọ hodẹ̀ to ninọmẹ dopodopo mẹ dile mí to yẹwhehodọ. (Efe. 6:18) Etẹlẹ ji wẹ mí dona nọ hodẹ̀ do? Mí sọgan hodẹ̀ nado tindo pọndohlan dagbe gando mẹhe to aigba-denamẹ mítọn ji lẹ go podọ nado tindo adọgbigbo. (Owalọ 4:29) Mí sọgan biọ Jehovah nado deanana mí yì omẹ ahunjijlọnọ he mí sọgan plọn Biblu hẹ lẹ dè. Eyin whétọ de kàn kanbiọ sè, mí sọgan hodẹ̀ kleun to ahun mẹ nado biọ Jehovah dọ ni gọalọna mí nado na gblọndo he sọgbe. (Nẹh. 2:4) Mí sọ sọgan biọ nuyọnẹn nado ze lizọnyizọn lọ do otẹn tintan mẹ zọnmii. (Jak. 1:5) Humọ, homẹ Jehovah tọn nọ hùn eyin hogbe he mí yizan to odẹ̀ mítọn mẹ lẹ nọ do pinpẹn-nutọn-yinyọnẹn hia na lẹblanulọkẹyi he mí tindo nado yin lizọnyizọnwatọ etọn.—Kọl. 3:15.

3. Nawẹ dẹ̀hiho na mẹdevo lẹ nọ gọalọ nado hẹn azọ́n yẹwhehodidọ tọn yinukọn gbọn?

³ Nọ Hodẹ̀ Na Mẹdevo Lẹ: Mí sọ dona “nọ hodẹ̀ na ode awetọ,” bo tlẹ nọ ylọ yinkọ lizọnyizọnwatọ hatọ lẹ tọn to whenue e biọ domọ. (Jak. 5:16; Owalọ 12:5) Be nuhe hiẹ sọgan wà to azọ́n yẹwhehodidọ tọn mẹ tindo dogbó na agbasa towe to godo yì wutu wẹ ya? Eyin mọ wẹ, nọ hodẹ̀ na lizọnyizọnwatọ hatọ he tindo agbasalilo lẹ. Ma yí nukunpẹvi do pọ́n nuhe odẹ̀ towe sọgan wà na mẹdevo lẹ blo! E sọ sọgbe nado nọ hodẹ̀ na mẹhe to otẹn aṣẹpipa tọn mẹ lẹ nado tindo pọndohlan dagbe gando azọ́n yẹwhehodidọ tọn go, na mẹmẹsunnu mítọn lẹ nido “zindonukọn to gbẹzan abọẹninọ tọn po whii-ninọ tọn po” mẹ.—1 Tim. 2:1, 2.

4. Naegbọn mí dona sinyẹnlin to odẹ̀ mẹ?

⁴ Wẹndagbe lọ lilá to aigba fininọ lẹpo ji yin azọ́ndenamẹ daho de. Eyin mí “sinyẹnlin to odẹ̀ mẹ,” mí na wazọ́n lọ dotana po alọgọ Jehovah tọn po.—Lom. 12:12.