Awuwledainanu de Na Klistiani Lizọnyizọnwatọ Lẹ
1. Tito yọyọ tẹwẹ bẹjẹeji to 1938, podọ na lẹndai tẹ?
1 To 1938, titobasinanu Jehovah tọn bẹ tito yọyọ de jẹeji. Pipli agun lẹ tọn yin oylọ-basina nado yì plidopọ lẹdo tọn lẹ. Na lẹndai tẹ? L’Informateur (he yin Lizọnyizọn Ahọluduta Tọn Mítọn todin) [Glẹnsigbe] janvier 1939 tọn na gblọndo dọmọ: “Plidopọ ehelẹ yin adà Titobasinanu Yẹwhehọluduta Jehovah tọn de nado deanana sinsẹ̀nzọn Ahọluduta tọn etọn. Anademẹ he nọ yin nina to finẹ lẹ yin nujọnu na mẹdopodopo nido sọgan wà azọ́n he yin didenamẹ lọ to aliho he sọgbe mẹ.” To 1938, sọha wẹnlatọ Ahọluduta lọ tọn lẹ tọn yin 58 000 poun, ṣigba to 2009, e ko yì 7 000 000 linlán; eyin mí lẹnnupọndo jideji ehe ji, e họnwun dọ plidopọ lẹdo tọn lẹ to yanwle yetọn kọ̀n jẹ, enẹ wẹ nado gọalọna lizọnyizọnwatọ lẹ na yé nido “wà azọ́n he yin didenamẹ lọ”!
2. Nudọnamẹ tẹwẹ na yin zizedonukọnnamẹ to plidopọ lẹdo tọn mítọn whenu to owhe sinsẹ̀nzọn tọn yọyọ lọ mẹ?
2 Hosọ Owhe He Ja Tọn: Mí to nukọnpọnhlan plidopọ lẹdo tọn he na bẹjẹeji to septembre mẹ po tulinamẹ he mí na mọyi sọn e mẹ po. Hosọ etọn wẹ “Mì Ma Yin Apadewhe Aihọn Tọn” he yin didesọn Johanu 15:19 mẹ. Na jide tọn, etẹwẹ yin delẹ to hodidọ he na hẹn ale wá na Klistiani lizọnyizọnwatọ lẹ mẹ? To Sibigbe, mí na sè hodidọ lọ he hosọ etọn yin “Sinsẹ̀nzọn Whenu-Gigọ́ Tọn Nọ Basi Hihọ́na Mí—Gbọnna?” Mí nasọ duvivi hómadọ adà atọ̀nnọ de tọn he hosọ etọn yin “Ma Yin Hinhẹnflu Gbọn . . . Dali Blo,” “Gbekanlin Lọ,” “Galọtọ Daho Lọ,” po ‘Ajọwatọ Tomẹyitọ Lẹ’ po. To Sẹgbe, mí na sè hómadọ de he hosọ etọn yin “Yiwanna Jehovah, E Ma Yin Aihọn.” Hosọ devo lẹ wẹ, “Mì Zindonukọn ‘Taidi Jonọ Podọ Gbéjinọtọ Ojlẹ Gli Tọn Lẹ,’” po “Mì Gboadọ! Mì Sọgan Gbawhàn Aihọn Tọn” po.
3. Ale tẹlẹ wẹ mí sọgan mọyi sọn plidopọ lẹdo tọn lọ yìyì mẹ?
3 To plidopọ lẹdo tọn agọe tọn de yìyì godo, mẹmẹyọnnu de he zohunhun etọn to lizọnyizọn lọ mẹ ko depò wlan dọ tito-to-whinnu lọ whàn emi nado vọ́ ninọmẹ emitọn gbeje pọ́n podọ nado magbe nado “nọ tọ́n na lizọnyizọn lọ bo doalọtena whẹjijọ dindin!” Matin ayihaawe, tito-to-whinnu plidopọ lẹdo tọn owhe sinsẹ̀nzọn yọyọ lọ tọn na gọalọna mímẹpo nado yiwanna Jehovah kakati nido yin aihọn. (1 Joh. 2:15-17) Hẹn ẹn diun dọ hiẹ tin to plidopọ lọ ji bosọ dotoai ganji nado sọgan mọaleyi to gigọ́ mẹ sọn tito owanyi tọn he yin awuwlena na Klistiani lizọnyizọnwatọ lẹ ehe mẹ!