Basi Hihọ́na Ayiha Towe
1. Etẹwẹ yin hosọ plidopọ lẹdo tọn na owhe sinsẹ̀nzọn 2013 tọn, podọ etẹwẹ yin lẹndai tito-to-whinnu lọ tọn?
1 Jesu plọn devi etọn lẹ nado yí ahun, alindọn, po ayiha yetọn lẹpo po do yiwanna Jehovah. (Mat. 22:37, 38) Plidopọ owhe ehe tọn lẹpo ko yin awuwlena nado gọalọna mí na mí nido sọgan hẹn gbẹtọ he mí yin to homẹ pọnte. Hiẹ sọgan ko flindọ, hosọ plidopọ agbegbe mítọn tọn wẹ “Basi Hihọ́na Ahun Towe!” Hosọ tito-to-whinnu azán plidopọ vonọtaun tọn na owhe sinsẹ̀nzọn 2013 tọn wẹ “Basi Hihọ́na Ayihadawhẹnamẹnu Towe.” Podọ hosọ plidopọ lẹdo tọn he na bẹjẹeji to osun he ja mẹ tọn wẹ “Basi Hihọ́na Ayiha Towe,” sinai do Matiu 22:37 ji. Tito-to-whinnu ehe yin awuwlena nado gọalọna dopodopo mítọn nado nọ gbadopọnna linlẹn mítọn lẹ po yanwle lọ po nado hẹn yé yin alọkẹyi to nukun Jehovah tọn mẹ.
2. Gblọndo kanbiọ tẹlẹ tọn wẹ mí dona dín to tito-to-whinnu lọ whenu?
2 Nuhe Na Yin Zizedonukọnnamẹ Lẹ: Dile mí to todoaina tito-to-whinnu plidopọ lẹdo tọn lọ, mí dona dín gblọndo kanbiọ ehelẹ tọn, ehe nọtena nuagokun lẹ:
• Nawẹ mí sọgan dapana ‘nulẹnpọn gbẹtọ tọn lẹ’ gbọn?
• Nawẹ mí sọgan gọalọ nado de nuhe ṣinyọ́n ayiha ji na mayisenọ lẹ sẹ̀ gbọn?
• Pọndohlan tẹwẹ mí jlo na tindo?
• Ale tẹlẹ wẹ mí nọ mọyi sọn ayihamẹlinlẹnpọn he sọgbe mẹ?
• Nawẹ mí sọgan na dotẹnmẹ Jehovah nado deanana nulẹnpọn mítọn gbọn?
• Nawẹ asu lẹ, asi lẹ, mẹjitọ lẹ po ovi lẹ po sọgan yidogọna ayajẹ to whẹndo mẹ gbọn?
• Nawẹ mí sọgan wleawudaina azán Jehovah tọn gbọn?
• Etẹwẹ e zẹẹmẹdo nado wleawuna ayiha mítọn lẹ na nuwiwa?
• Ale tẹwẹ mẹhe nọ yí nuhe yé plọn lẹ do yizan mẹ lẹ nọ mọyi?
3. Naegbọn e do yin nujọnu dọ mí ni yì adà plidopọ lọ tọn lẹpo, bo dotoai po sọwhiwhe po, bosọ yí nuhe mí plọn lẹ do yizan mẹ?
3 Satani to nuhe go e pé lẹpo wà nado hẹn ayiha mítọn gblezọn. (2 Kọl. 11:3) Enẹwutu, mí dona nọ basi hihọ́na ayiha mítọn bo nọ deanana nulẹnpọn mítọn. Mí dona to ayiha Klisti tọn nkọ dohia zọnmii bo nọ hoavùn sọta nuyiwadomẹji aihọn sẹ́nhẹngba tọn ehe tọn lẹ. (1 Kọl. 2:16) Enẹwutu, wà nuhe go a pé lẹpo nado yì adà plidopọ lẹdo tọn lọ lẹpo. Dotoai po sọwhiwhe po. Nudọnamẹ họakuẹ he na yin zizedonukọnna mí lẹ yíyí-do-yizan mẹ na gọalọna mí nado wleawuna ayiha mítọn lẹ nado yí zohunhun do tindo mahẹ to lizọnyizọn Ahọluduta lọ tọn mẹ.—1 Pita 1:13.