Ze Alọnuwe lẹ Donukọnnamẹ!
1. Etẹwẹ mí na zedonukọnnamẹ to osun novembre tọn mẹ?
1 To Plidopọ Agbegbe “Mì to Alihọ́!” 2009 tọn mítọn ji, alọnuwe yọyọ he hosọ etọn yin La Bible—Quel est son message? (Biblu—Owẹ̀n Tẹwẹ E Bẹhẹn?) yin didetọn to ogbè delẹ mẹ. Lẹdo aihọn pé to osun novembre tọn mẹ, agun lẹ na ze e donukọnnamẹ whla tintan. Nawẹ alọnuwe ehe po devo lẹ po sọgan hẹn ale wá na gbẹtọ lẹ to aigba-denamẹ mítọn ji gbọn? Suhugan mẹhe ma tin to sinsẹ̀n Klistiani tọn mẹ lẹ tọn ma yọ́n nususu gando Biblu go. Enẹwutu, zẹẹmẹ he tin to weda 3tọ alọnuwe lọ tọn ji dohia dọ e yin awuwlena nado basi “bladopọ Biblu tọn.”
2. Nawẹ mí sọgan ze alọnuwe yọyọ lọ kavi devo donukọnnamẹ gbọn?
2 Lehe Mí Na Ze E Donukọnnamẹ Do: Mí sọgan dọ dọ, “E na jlo mi nado yọ́n nuhe a lẹn gando ohó ehelẹ go. [Hia 2 Timoti 3:16.] Mẹsusu he mí dọhona lẹ kọngbedopọ hẹ hogbe ehelẹ; mẹdevo lẹ mọdọ owe dagbe de poun wẹ Biblu yin. Etẹwẹ hiẹ lẹn gando Biblu go? [Jotẹnna gblọndo.] Mahopọnna nuyise sinsẹ̀n tọn depope he mí sọgan tindo, mí tindo whẹwhinwhẹ́n susu nado gbeje Biblu pọ́n na míde. [Hia hukan homẹbibiọ tọn he tin to aga weda 3tọ alọnuwe yọyọ lọ tọn kavi hukan he sọgbe hẹ ẹ to alọnuwe devo mẹ.] Alọnuwe ehe na gọalọna we nado mọnukunnujẹ hosọ po owẹ̀n titengbe Biblu tọn po mẹ ganji.”
3. Nuzedonukọnnamẹ devo tẹwẹ mí sọgan yizan titengbe to aigba-denamẹ he ji mẹhe ma tin to sinsẹ̀n Klistiani tọn mẹ lẹ sù te?
3 Aliho devo die, titengbe to whenue mí to yẹwhehodọ to fie mẹhe ma tin to sinsẹ̀n Klistiani tọn mẹ lẹ sù te: “E na jlo mi nado yọ́n linlẹn towe do hogbe todido tọn ehelẹ ji. [Hia Psalm 37:11.] Nawẹ a lẹndọ ninọmẹ aigba tọn na te to whenue dọdai ehe na mọ hẹndi? [Jotẹnna gblọndo.] Apajlẹ todido po homẹmiọnnamẹ po tọn dopo niyẹn he mẹhe wá sọn akọ̀ po sinsẹ̀n voovo po mẹ lẹ sọgan mọyi sọn Biblu mẹ.” Hia hukan he tin to aga weda 3tọ alọnuwe yọyọ lọ tọn kavi hukan he sọgbe hẹ ẹ to alọnuwe devo mẹ bo ze e donukọnnamẹ.
4. Nawẹ mí sọgan yí alọnuwe yọyọ lọ zan nado bẹ plọnmẹ Biblu de jẹeji gbọn?
4 Bẹ Plọnmẹ Biblu de Jẹeji: To whenue mí lẹkọyi, mí sọgan flinnu whétọ mítọn gando nuhe ji mí dọhodo wayi go bo gbadopọnna hukan dopo kavi awe to hosọ he ji mí dọhodo lọ mẹ gbọn kanbiọ he tin to vivọnu hosọ lọ tọn lẹ yiyizan dali. Kavi eyin mí jlo na ze owe Biblu Plọn Mí donukọnna ẹn tlọlọ, mí sọgan hia wepa godo tọn alọnuwe yọyọ lọ tọn na ẹn, ze owe Biblu Plọn Mí lọ na ẹn bo kàn hosọ he e yiwanna hugan to owe lọ mẹ sè e, podọ enẹgodo, gbadopọnna hukan dopo kavi awe sọn weta he e de lọ mẹ hẹ ẹ. Mì gbọ mímẹpo ni tindo mahẹ gigọ́ to alọnuwe ehe zizedonukọnnamẹ to osun novembre tọn mẹ!