Be A Ko Yin Gbehosọnalitọ Whepoponu Tọn Pọ́n Ya?
1. Lẹblanulọkẹyi tẹwẹ mẹsusu ko tindo, ṣigba etẹwẹ mẹdelẹ ko tin to dandannu glọ nado wà?
1 To owhe lẹ gblamẹ, Klistiani fọtọ́n susu wẹ ko tindo lẹblanulọkẹyi lọ nado ‘plọnmẹ bo lá wẹndagbe lọ’ taidi lizọnyizọnwatọ whenu-gigọ́ tọn lẹ. (Owalọ 5:42) Ṣigba mẹdelẹ ko tin to dandannu glọ nado doalọtena azọ́n gbehosọnalitọ tọn na whẹwhinwhẹ́n voovo lẹ wutu. Eyin hiẹ ko yin gbehosọnalitọ pọ́n, be hiẹ ko vọ́ ninọmẹ towe dintọn lẹ gbeje pọ́n nado yọnẹn eyin a sọgan gọ̀ sinsẹ̀nzọn gbehosọnalitọ tọn bẹ ya?
2. Naegbọn mẹhe ko yin gbehosọnalitọ pọ́n lẹ dona gbeje ninọmẹ yetọn dintọn pọ́n?
2 Ninọmẹ lẹ Nọ Diọ: E sọgan yindọ ninọmẹ he hẹn we nado doalọtena azọ́n gbehosọnalitọ tọn ko diọ todin. Di apajlẹ, eyin a doalọtena gbehosọnalitọ bibasi na hiẹ masọ penugo nado jẹ nubiọtomẹsi gànmẹ tọn he yin gànhiho 90 to osun dopo mẹ kọ̀n ba, be a sọgan gọ̀ azọ́n lọ bẹ todin he nubiọtomẹsi lọ ko lẹzun gànhiho 70 ya? Sọn whenue hiẹ jo sinsẹ̀nzọn gbehosọnalitọ tọn do, be whenu he a nọ yizan na agbasazọ́n towe kavi azọngban whẹndo tọn he a tindo lẹ ko depò wẹ ya? Mẹmẹyọnnu de he doalọtena sinsẹ̀nzọn gbehosọnalitọ tọn na manọna wutu penugo nado gọ̀ sinsẹ̀nzọn etọn bẹ to whenue e tindo owhe 89. Na e ko yì owhe dopo linlán bọ e masọ yì dotowhé ba wutu, e mọdọ ninọmẹ etọn sọgan na ẹn dotẹnmẹ nado gọ̀ sinsẹ̀nzọn gbehosọnalitọ tọn bẹ!
3. Nawẹ hagbẹ whẹndo tọn lẹ sọgan wazọ́n dopọ bo hẹn ẹn yọnbasi na dopo to yé mẹ nado basi gbehosọnalitọ gbọn?
3 Eyin hiẹ ma tlẹ yin gbehosọnalitọ pọ́n, mẹde sọgan ko doalọtena sinsẹ̀nzọn gbehosọnalitọ tọn to whẹndo towe mẹ nado penukundo hagbẹ whẹndo tọn de go, taidi mẹjitọ yọnhonọ de. (1 Tim. 5:4, 8) Eyin mọ wẹ, be hiẹ kavi mẹdevo lẹ to whẹndo lọ mẹ sọgan wà nususu dogọ nado gọalọna mẹhe doalọtena gbehosọnalitọ bibasi lọ ya? E na yọ́n hugan nado dọhodopọ do whẹho lọ ji. (Howh. 15:22) Na taun tọn, hagbẹ whẹndo tọn lẹpo wẹ to adà de yiwà, eyin yé wazọ́n dopọ na dopo to yé mẹ nido sọgan basi gbehosọnalitọ.
4. Etẹwẹ hiẹ sọgan wà eyin a ma ko penugo todin nado gọ̀ azọ́n gbehosọnalitọ tọn bẹ?
4 Eyin ninọmẹ towe dintọn lẹ ma hẹn ẹn yọnbasi na we nado gọ̀ azọ́n gbehosọnalitọ tọn bẹ, ma gbọjọ blo. Ojlo towe nado gọ̀ sinsẹ̀nzọn lọ bẹ nọ hẹn homẹ Jehovah tọn hùn. (2 Kọl. 8:12) Yí nugopipe he a ko wleawuna to whenue a to gbehosọnalitọ basi dai lẹ zan to lizọnyizọn towe dintọn mẹ. Hẹn ojlo towe zun yinyọnẹn na Jehovah to odẹ̀ mẹ bo wleawufo nado jla ninọmẹ towe lẹ do eyin dotẹnmẹ lọ hundote. (1 Joh. 5:14) To nukọn mẹ, Jehovah sọgan hùn “ohọ̀n daho de he nọ planmẹ jẹ nuwiwa kọ̀n” dote na we, na hiẹ nido duvivi ayajẹ he gbehosọnalitọ bibasi nọ hẹnwa lẹ tọn whladopo dogọ!—1 Kọl. 16:9.