Lizọnyizọn Mítọn Nọ Biọ Homẹfa
1. Nawẹ Jehovah nọ do homẹfa hia gbẹtọvi lẹ gbọn?
1 Jiwheyẹwhe nọ fahomẹ taun hẹ gbẹtọvi lẹ. (Eks. 34:6; Ps. 106:41-45; 2 Pita 3:9) Dopo to apajlẹ tangan he dohia dọ Jiwheyẹwhe nọ gbọn owanyi dali yí homẹfa do yinuwa hẹ gbẹtọvi lẹ mẹ wẹ azọ́n yẹwhehodidọ lẹdo aihọn pé tọn lọ. E ko diblayi owhe 2000 he Jehovah to ahunjijlọnọ lẹ dọ̀n wá ede dè bosọ pò to mọwà. (Joh. 6:44) Nawẹ mí sọgan nọ do homẹfa Jehovah tọn nkọ hia to lizọnyizọn mítọn mẹ gbọn?
2. Nawẹ mí sọgan nọ do homẹfa hia to whenue mí to azọ́nwa to aigba-denamẹ mítọn lẹ ji gbọn?
2 To Lizọnyizọn Whédegbè jẹ Whédegbè Tọn Mẹ: Mí nọ do homẹfa Jehovah tọn nkọ hia gbọn yẹwhehodidọ “mapote” to aigba-denamẹ he ji gbẹtọ lẹ ma nọ do ojlo hia te dali. (Owalọ 5:42) Mí nọ yí homẹfa do doakọnna ojlo matindo, mẹṣanko po nukundiọsọmẹ po to lizọnyizọn mítọn mẹ. (Malku 13:12, 13) Mí sọ nọ do homẹfa hia dile mí to vivẹnudo nado to sinhúna okún nugbo lọ tọn lẹ eyin etlẹ nọ vẹawu nado mọ jlodotọ lẹ to whégbè.
3. Naegbọn homẹfa didohia do yin dandannu to gọyìpọn po plọnmẹ Biblu lẹ bibasi po whenu?
3 To Plọnmẹ Biblu lẹ Whenu: E nọ biọ homẹfa nado do atin de bo nọtepọn whinwhẹ́n etọn. Mí sọgan penukundego, ṣigba mí ma sọgan do ṣọ̀ṣọ̀ na whinwhẹ́n etọn gba. (Jak. 5:7) Mọdopolọ, vudevude wẹ whinwhẹ́n gbigbọmẹ tọn nọ wá podọ to aliho debọdo-dego tọn mẹ. (Malku 4:28) E sọgan vẹawuna mẹhe mí nọ plọnnu hẹ lẹ nado jo nuyise lalo sinsẹ̀n tọn kavi aṣa he ma sọgbe hẹ Owe-wiwe lẹ do. Mí ma dona nọ do ṣọ̀ṣọ̀ na mẹhe mí nọ plọnnu hẹ lẹ gbọn kọgbigbidina yé nado basi diọdo lẹ dali. Homẹfa didohia nọ biọ dọ mí ni dike gbigbọ wiwe Jiwheyẹwhe tọn ni yinuwado ahun mẹlọ tọn ji dile ojlẹ to yìyì.—1 Kọl. 3:6, 7.
4. Nawẹ homẹfa sọgan gọalọna mí nado dekunnuna hẹnnumẹ mayisenọ mítọn lẹ po kọdetọn dagbe po gbọn?
4 Hẹnnumẹ Mayisenọ Lẹ: Dile etlẹ yindọ mí nọ jlo vẹkuvẹku dọ hẹnnumẹ mayisenọ mítọn lẹ ni sè dogbọn nugbo lọ dali, mí nọ do homẹfa hia gbọn nuyise mítọn lẹ mimá hẹ yé to ojlẹ he sọgbe mẹ dali, bo nọ payi ma nado zín nudọnamẹ susu do yé ji. (Yẹwh. 3:1, 7) Humọ, mí dona nọ dike apajlẹ mítọn ni nọ do nuhe mí yin hia bosọ wleawufo nado do yise mítọn hia to walọmimiọn po sisi sisosiso po mẹ. (1 Pita 3:1, 15) Na nugbo tọn, homẹfa he mí nọ dohia to lizọnyizọn mítọn mẹ nọ hẹn kọdetọn dagbe wá dogọ bosọ nọ hẹn homẹhun Otọ́ mítọn olọn mẹ tọn.