Plọnnu Sọn Homẹfa Jehovah po Jesu po Tọn Mẹ
“Mì nọ pọ́n homẹfa Oklunọ mítọn tọn hlan taidi whlẹngán.”—2 PITA 3:15.
NAWẸ HIẸ NA NA GBLỌNDO GBỌN?
Nawẹ Jehovah do homẹfa hia gbọn?
aegbọn Jesu dona yí homẹfa zan na ojlẹ dindẹn?
Afọdide tẹlẹ wẹ mí sọgan ze nado wleawuna homẹfa Jiwheyẹwhe tọn nkọ?
1. Etẹwẹ mẹhe ko sẹ̀n Jehovah po nugbonọ-yinyin po delẹ nọ kanse?
MẸMẸYỌNNU de he doakọnna avùnnukundiọsọmẹnu susu po nugbonọ-yinyin po to owhe susu lẹ gblamẹ kanse po whiwhẹ po dọmọ, “Be opodo lọ na wá to gbẹwhenu ṣie ya?” Nudopolọ wẹ mẹhe ko to Jehovah sẹ̀n sọn ojlẹ dindẹn die delẹ nọ kanse. Mí to jejeji nado mọ whenue Jiwheyẹwhe na hẹn onú lẹpo zun yọyọ bo na de nuhahun he mí to pipehẹ todin lẹ sẹ̀. (Osọ. 21:5) Dile etlẹ yindọ mí tindo whẹwhinwhẹ́n susu nado yise dọ vivọnu titonu Satani tọn ko sẹpọ taun, e sọgan vẹawu nado yí homẹfa do nọtepọn azán enẹ.
2. Kanbiọ tẹlẹ wẹ mí na gbadopọnna gando homẹfa Jiwheyẹwhe tọn go?
2 Etomọṣo, Biblu dohia dọ mí dona nọ do homẹfa hia. Taidi devizọnwatọ Jiwheyẹwhe tọn he jẹnukọnna mí lẹ, mí na dugu opagbe he Jiwheyẹwhe do lẹ tọn eyin mí tindo yise dolido bo yí sọwhiwhe do nọtepọn ojlẹ he ewọ de nado hẹn opagbe etọn lẹ di. (Hia Heblu lẹ 6:11, 12.) Jehovah lọsu do homẹfa hia. E sọgan ko hẹn opodo wá na kanyinylan, ṣigba e to tenọpọn ojlẹ dagbe hugan lọ. (Lom. 9:20-24) Naegbọn e do yí homẹfa zan sọmọ? Nawẹ Jesu hodo apajlẹ homẹfa Jiwheyẹwhe tọn nkọ bo ze apajlẹ de dai na mí gbọn? Ale tẹlẹ wẹ mí na mọyi eyin mí wleawuna homẹfa Jiwheyẹwhe tọn nkọ? Gblọndo kanbiọ enẹlẹ tọn sọgan gọalọna mí nado wleawuna homẹfa po yise dolido po, eyin mí tlẹ lẹndọ Jehovah to gbàndọn.
NAEGBỌN JEHOVAH DO DO HOMẸFA HIA?
3, 4. (a) Naegbọn Jehovah do do homẹfa hia to lẹndai etọn na aigba hinhẹndi mẹ? (b) Nawẹ Jehovah yinuwa gando atẹṣiṣi Edẹni mẹ tọn go gbọn?
3 Jehovah tindo whẹwhinwhẹ́n dagbe nado do homẹfa hia. Nugbo wẹ dọ ewọ wẹ Nupojipetọ wẹkẹ lọ tọn to ojlẹ lẹpo mẹ; etomọṣo, atẹṣiṣi Edẹni mẹ tọn ko fọ́n kanbiọ lẹ dote gando nudida nuyọnẹntọ lẹpo go. Jehovah yí homẹfa zan, na e yọnẹn dọ e na biọ whenu susu nado na gblọndo kanbiọ enẹlẹ tọn to gigọ́ mẹ. To whenuena e yindọ ewọ yọ́n nuyiwa mẹlẹpo tọn to olọn mẹ podọ to aigba ji gọna linlẹn yetọn, e họnwun dọ ewọ to mọwà na dagbemẹninọ mítọn wutu.—Heb. 4:13.
4 Lẹndai Jehovah tọn wẹ yindọ kúnkan Adam po Evi po tọn lẹ ni gọ́ aigba ji. To whenue Satani klọ Evi bọ Adam vẹtoli to enẹgodo, Jiwheyẹwhe ma gbẹkọ lẹndai etọn go. E ma jẹflumẹ bo basi nudide plaplaji tọn kavi yinuwa po homẹgble po bo jo whẹndo gbẹtọvi lẹ tọn do. Kakatimọ, e dín aliho devo nado hẹn lẹndai etọn na gbẹtọvi lẹ po aigba po di. (Isa. 55:11) Nado hẹn lẹndai etọn di bo suwhẹna nupojipetọ-yinyin etọn, Jehovah ko do mawazẹjlẹgo po homẹfa vonọtaun po hia bo tlẹ ko nọte na owhe fọtọ́n lẹ, na adà lẹndai etọn tọn delẹ nido sọgan mọ hẹndi to aliho dagbe hugan mẹ.
5. Dona tẹwẹ homẹfa Jehovah tọn nọ hẹnwa na gbẹtọvi lẹ?
5 Whẹwhinwhẹ́n devo he wutu Jehovah do gbọn homẹfa dali nọte wẹ yindọ, na gbẹtọ susu dogọ nido sọgan tindo ogbẹ̀ madopodo. To alọnu din, ewọ to tito lẹ basi nado whlẹn “gbẹtọ susugege de.” (Osọ. 7:9, 14; 14:6) Gbọn azọ́n yẹwhehodidọ tọn mítọn gblamẹ, Jehovah to oylọ-basina gbẹtọ lẹ nado plọnnu gando Ahọluduta etọn po nujinọtedo dodo tọn etọn lẹ po go. “Wẹndagbe” wẹ owẹ̀n Ahọluduta lọ tọn yin na gbẹtọvi lẹ. (Mat. 24:14) Mẹhe Jehovah dọ̀n lẹ nọ lẹzun apadewhe agun lẹdo aihọn pé de tọn he bẹ họntọn nujọnu tọn he yiwanna nuhe sọgbe lẹ hẹn. (Joh. 6:44-47) Jiwheyẹwhe owanyinọ mítọn nọ gọalọna omẹ mọnkọtọn lẹ nado mọ nukundagbe etọn. E ko sọ to hagbẹ gandudu olọn mẹ tọn etọn lẹ ṣinyan sọn gbẹtọvi lẹ mẹ. Eyin omẹ nugbonọ enẹlẹ jẹ otẹn yetọn mẹ to olọn mẹ, yé na gọalọna gbẹtọvi tonusetọ lẹ nado jẹ pipé kọ̀n bo nọgbẹ̀ kakadoi. E họnwun dọ, dile Jehovah yí homẹfa do to tenọ, e sọ to azọ́nwa nado hẹn opagbe etọn lẹ di—na dagbe mítọn.
6. (a) Linlẹn tẹ mẹ wẹ Jehovah do homẹfa hia to azán Noa tọn gbè te? (b) Nawẹ Jehovah to homẹfa dohia to azán mítọn gbè gbọn?
6 Jehovah fahomẹ mahopọnna dọ e pehẹ nuhe sọgan gblehomẹna ẹn lẹ. Di apajlẹ, lẹnnupọndo lehe e yinuwa gando kanyinylan gbẹtọvi lẹ tọn go jẹnukọnna Singigọ lọ do ji. To ojlẹ enẹ mẹ, aigba gọ́ na fẹnnuwiwa po danuwiwa po, podọ ehe “doadi” na Jehovah, na ninọmẹ gbẹtọvi lẹ tọn gblezọn wutu. (Gẹn. 6:2-8) Ewọ ma na jotẹnna ninọmẹ enẹ kakadoi, enẹwutu e de nado hẹn singigọ de wá gbẹtọvi tolivẹtọ lẹ ji. Dile “homẹfa Jiwheyẹwhe tọn to ote to azán Noa tọn lẹ gbè,” Jehovah basi tito nado whlẹn Noa po whẹndo etọn po. (1 Pita 3:20) To ojlẹ dide lọ mẹ, Jehovah dọ nudide enẹ na Noa bo deazọ́nna ẹn nado basi aki de. (Gẹn. 6:14-22) Humọ, Noa sọ yin “yẹwhehodọtọ dodo tọn” bo to hodọna kọmẹnu etọn lẹ gando vasudo he to dindọnsẹpọ lọ go. (2 Pita 2:5) Jesu dọ dọ ojlẹ mítọn taidi Noa tọn nkọ. Jehovah ko de whenue e na hẹn opodo wá na titonu ylankan ehe. Gbẹtọvi depope ma yọ́n “azán enẹ po gànmẹ lọ po.” (Mat. 24:36) Todin whẹ́, Jiwheyẹwhe deazọ́nna mí nado na avase gbẹtọ lẹ bo dọ nuhe yé sọgan wà nado yin whinwhlẹngán na yé.
7. Be Jehovah to gbàndọn nado hẹn opagbe etọn lẹ di wẹ ya? Basi zẹẹmẹ.
7 E họnwun dọ homẹfa Jehovah tọn ma zẹẹmẹdo dọ ewọ to tenọ poun na ojlẹ nido juyi gba. Mí ma dona pọ́n homẹfa etọn hlan to aliho agọ̀ mẹ taidi dọ ewọ ma to mítọn dọ kavi ma tindo ojlo to mí mẹ wẹ nkọ! Ṣigba, e bọawu nado tindo pọndohlan enẹ dile mí to whinwhẹ́n kavi to yaji to titonu ylankan ehe mẹ. Mí sọgan wá gbọjọ kavi lẹndọ Jiwheyẹwhe to gbàndọn nado hẹn opagbe etọn lẹ di. (Heb. 10:36) Mí ma dona wọnji dọ e tindo whẹwhinwhẹ́n dagbe lẹ nado fahomẹ podọ ewọ to mọwà todin na devizọnwatọ nugbonọ etọn lẹ nido mọaleyi sọn e mẹ. (2 Pita 2:3; 3:9) Todin, mì gbọ mí ni pọ́n lehe Jesu do homẹfa Jiwheyẹwhe tọn nkọ hia do.
NAWẸ JESU ZE APAJLẸ DAGBE DAI GANDO HOMẸFA DIDOHIA GO GBỌN?
8. Ninọmẹ tẹlẹ mẹ wẹ Jesu do homẹfa hia te?
8 Jesu to ojlo Jiwheyẹwhe tọn wà podọ e ko yí ayajẹ do wàmọ na owhe madosọha lẹ. To whenue Satani ṣiatẹ, Jehovah basi dide dọ Visunnu detọ́n dopo akàn emitọn na wá aigba ji taidi Mẹsia lọ. Lẹnnupọndo nuhe enẹ zẹẹmẹdo na Jesu ji—e dona nọte na owhe fọtọ́n susu lẹ kakajẹ whenue ojlẹ lọ na sọ. (Hia Galatianu lẹ 4:4.) Ewọ ma blá alọ dogo to ojlẹ enẹ lẹpo mẹ gba; kakatimọ, e hẹn alọnu ján to azọ́n he Otọ́ etọn de na ẹn mẹ. To whenuena e wá aigba ji, e yọnẹn dọ emi na kú to alọ Satani tọn mẹ, dile e yin didọdai do. (Gẹn. 3:15; Mat. 16:21) E yí homẹfa do kẹalọyi ojlo Jiwheyẹwhe tọn, dile etlẹ yindọ ehe na hẹn awufiẹsa sinsinyẹn wá na ẹn. Nugbonọ-yinyin etọn ma pé awe. E ma nọ ze ayidonugo do ede po otẹn he mẹ e te po ji, podọ mí sọgan mọaleyi sọn enẹ mẹ.—Heb. 5:8, 9.
9, 10. (a) Etẹwẹ Jesu to wiwà dile e yí homẹfa do to tenọpọn Jehovah nado yinuwa? (b) Nukun tẹwẹ mí dona nọ yí do pọ́n ojlẹ dide Jehovah tọn?
9 To whenue Jesu fọnsọnku godo, aṣẹ yin nina ẹn to olọn mẹ podọ to aigba ji. (Mat. 28:18) E nọ yí aṣẹ enẹ zan nado hẹn lẹndai Jehovah tọn di sọgbe hẹ ojlẹ dide Jiwheyẹwhe tọn lẹ. Jesu yí homẹfa do nọte to adusilọ Jiwheyẹwhe tọn mẹ kakajẹ 1914, na kẹntọ etọn lẹ nido yin yíyí do tokloafọligbe afọ etọn lẹ tọn. (Ps. 110:1, 2; Heb. 10:12, 13) Ewọ na yinuwa to madẹnmẹ nado hẹn titonu Satani tọn wá opodo. Todin whẹ́, Jesu yí homẹfa do to alọgọna gbẹtọ lẹ nado mọ nukundagbe Jiwheyẹwhe tọn bosọ to anadena yé yì “osin ogbẹ̀ tọn lẹ” kọ̀n.—Osọ. 7:17.
10 Be apajlẹ Jesu tọn ma do nukun he mí dona nọ yí do pọ́n ojlẹ dide Jehovah tọn hia ya? Ayihaawe ma tin dọ Jesu tindo ojlo vẹkuvẹku nado wà nudepope he Otọ́ etọn biọ to e si; etomọṣo, e sọ tindo ojlo nado nọtepọn ojlẹ dide Jiwheyẹwhe tọn. Dile mí to tenọpọn opodo titonu ylankan Satani tọn, mímẹpo wẹ dona do homẹfa Jiwheyẹwhe tọn nkọ hia bo nọ nọtepọn Jiwheyẹwhe kakati nado hònúpla na mí gbọjọ wutu. Etẹwẹ mí sọgan wà nado wleawuna homẹfa Jiwheyẹwhe tọn nkọ?
NAWẸ MÍ SỌGAN WLEAWUNA HOMẸFA JIWHEYẸWHE TỌN NKỌ GBỌN?
11. (a) Nawẹ yise tindo kanṣiṣa hẹ homẹfa gbọn? (b) Naegbọn mí tindo whẹwhinwhẹ́n nujọnu tọn lẹ nado tindo yise dolido?
11 Whẹpo Jesu do wá aigba ji, yẹwhegán lẹ po devizọnwatọ nugbonọ devo lẹ po dohia gbọn nuyiwa yetọn dali dọ gbẹtọvi mapenọ lẹ lọsu sọgan doakọnnanu po homẹfa po. Kanṣiṣa pẹkipẹki de tin to yise po homẹfa yetọn po ṣẹnṣẹn. (Hia Jakọbu 5:10, 11.) Eyin yé ma yí nuhe Jehovah dọ na yé lẹ sè nugbonugbo—enẹ wẹ yindọ eyin yé ma tindo yise—be yé na ko yí homẹfa do nọtepọn hẹndi opagbe etọn lẹ tọn ya? Yé pehẹ whlepọn yise tọn he sinyẹn taun lẹ sọn ojlẹ de mẹ jẹ devo mẹ bo deji dọ Jiwheyẹwhe na hẹn opagbe etọn lẹ di dandan. (Heb. 11:13, 35-40) Míwlẹ tlẹ tindo whẹwhinwhẹ́n susu nado tindo yise dolido, na Jesu ko to sinsẹ̀n todin taidi “Mẹhe nọ hẹn yise mítọn zun pipé” wutu. (Heb. 12:2) E hẹn dọdai lẹ di bo do lẹndai Jiwheyẹwhe tọn lẹ hia to aliho de mẹ sọmọ bọ mí tindo whẹwhinwhẹ́n nujọnu tọn lẹ nado tindo yise.
12. Etẹwẹ mí sọgan wà nado hẹn yise mítọn lodo?
12 Afọdide yọ́n-na-yizan tẹlẹ wẹ mí sọgan ze nado hẹn yise mítọn lodo bo wleawuna homẹfa? Nujọnu wẹ e yin dọ mí ni nọ yí ayinamẹ Jiwheyẹwhe tọn lẹ do yizan mẹ. Di apajlẹ, lẹnnupọndo whẹwhinwhẹ́n he a tindo nado ze Ahọluduta lọ do otẹn tintan mẹ to gbẹzan towe mẹ lẹ ji. Be a sọgan dovivẹnu dogọ nado yí ayinamẹ he tin to Matiu 6:33 mẹ do yizan mẹ ya? Ehe sọgan biọ dọ hiẹ ni nọ yí whenu zan dogọ to lizọnyizọn lọ mẹ kavi basi vọjlado to adà gbẹzan towe tọn delẹ mẹ. Ma yí nukunpẹvi do pọ́n lehe Jehovah ko dona vivẹnudido towe lẹ do kakajẹ din blo. Ewọ sọgan ko gọalọna we nado deanana plọnmẹ Biblu yọyọ de kavi nado mọ “jijọho Jiwheyẹwhe tọn he yiaga hugan linlẹn lẹpo” yí. (Hia Filippinu lẹ 4:7.) Eyin hiẹ ze ayidonugo do ale he a nọ mọyi sọn anademẹ Jehovah tọn lẹ hihodo mẹ ji, enẹ na whàn we nado wleawuna homẹfa dogọ.—Ps. 34:8.
13. Apajlẹ tẹwẹ do aliho he mẹ mí sọgan hẹn yise mítọn lodo bosọ wleawuna homẹfa te hia?
13 Apajlẹ glesi de tọn sọgan gọalọna mí to whẹho ehe mẹ. Glesi nọ do jinukun, nọ penukundego bo nọ wá bẹ jinukun wá whégbè. Whedepopenu he glesi de bẹ jinukun susu wá whégbè, e nọ deji dogọ nado do jinukun to ojlẹ devo mẹ. Nugbo wẹ dọ e dona yí homẹfa do nọtepọn ojlẹ jibẹwawhé tọn, etomọṣo enẹ ma na glọnalina ẹn nado do jinukun, vlavo e tlẹ sọgan do jinukun do ogle susu mẹ hugan ojlẹ he wayi tọn. E nọ deji dọ emi na bẹ jinukun wá whégbè. Mọdopolọ, dile mí to nuplọn gando anademẹ Jehovah tọn lẹ go bo to hihodo yé bosọ to ale mọyi sọn yé mẹ, jidide mítọn to Jehovah mẹ nọ sinyẹn deji. Yise mítọn lọsu nọ lodo dogọ podọ e nọ bọawuna mí nado nọtepọn dona he to nukọn ja lẹ.—Hia Jakọbu 5:7, 8.
14, 15. Nawẹ mí dona nọ pọ́n yajiji gbẹtọvi lẹ tọn hlan gbọn?
14 Onú devo he sọgan gọalọna mí nado wleawuna homẹfa wẹ nado nọ lẹnnupọndo aihọn lọ po ninọmẹ mítọn po ji dile Jehovah nọ wà do. Di apajlẹ, lẹnnupọndo nukun he ewọ nọ yí do pọ́n yajiji gbẹtọvi lẹ tọn ji. Yajiji gbẹtọvi lẹ tọn ko hẹn awufiẹsa wá na ẹn sọn ojlẹ dindẹn die; etomọṣo, awubla ma duto e ji bo glọnalina ẹn nado wà dagbe gba. E do Visunnu detọ́n dopo akàn etọn hlan “nado gbà azọ́n Lẹgba tọn lẹ” podọ nado vọ́ nuhe Satani ko hẹngble na gbẹtọvi lẹpo jlado. (1 Joh. 3:8) Na nugbo tọn, yajiji gbẹtọvi lẹ tọn ma na dẹn-to-aimẹ, ṣigba pọngbọ he Jiwheyẹwhe na hẹnwa na yin tẹgbẹ tọn. Enẹwutu, kakati nado dike titonu ylankan Satani tọn ehe ni duto mí ji kavi nọ whlẹndo ji gando whenue titonu lọ na wá opodo go, mì gbọ mí ni tindo yise to nuhe ma nọ yin mimọ bo na nọte kakadoi lẹ mẹ. Jehovah ko de ojlẹ tangan de nado hẹn kanyinylan wá opodo, podọ ewọ na yinuwa to ojlẹ sisọ mẹ.—Isa. 46:13; Nah. 1:9.
15 To azán godo tọn titonu ehe tọn he vẹawu ehelẹ mẹ, mí sọgan pehẹ whlepọn yise tọn vonọtaun lẹ. Kakati nado nọ yinuwa po homẹgble po to whenue mí pehẹ danuwiwa kavi to whenue mẹyiwanna mítọn de to yaji, mí dona magbe nado dejido Jehovah go mlẹnmlẹn. Ehe wiwà ma nọ bọawu, na mapenọ wẹ mí yin wutu. Ṣigba flin nuhe Jesu wà to Matiu 26:39 mẹ.—Hia.
16. Dile mí to tenọpọn opodo lọ, etẹwẹ mí ma dona wà?
16 Nuhe nọ glọnalina mí ma nado do homẹfa Jiwheyẹwhe tọn nkọ hia wẹ ayilinlẹn lọ nado nọte bo pọ́n nuhe na jọ. Etẹwẹ enẹ zẹẹmẹdo? Mẹhe ma deji dọ opodo lọ ko sẹpọ de sọgan jẹ tito devo lẹ basi ji to whenue e mọdọ nulẹ ma to yìyì do lehe Jehovah dọ dọ e na yì do. To hogbe devo mẹ, e sọgan dọna ede dọ, ‘N’na nọte bo na pọ́n eyin Jehovah na wà nuhe e dọ lẹ nugbonugbo.’ Enẹgodo, e sọgan dovivẹnu nado basi yinkọ de na ede to aihọn ehe mẹ, nado dín hihọ́ he akuẹ nọ hẹnwa kakati nado ze Ahọluduta Jiwheyẹwhe tọn do otẹn tintan mẹ, kavi lẹndọ wepinplọn dahodaho lẹ na zọ́n bọ emi na vò to ogbẹ̀ ehe mẹ. Ṣigba, ohia yise matindo tọn wẹ enẹ yin. Flindọ Paulu dotuhomẹna mí nado hodo apajlẹ nugbonọ he “gbọn yise po sọwhiwhe po dali” dugu opagbe lẹ tọn sọn Jehovah dè lẹ tọn. (Heb. 6:12) Sọgbe hẹ lẹndai etọn, Jehovah ma na dike titonu ylankan ehe ni dẹn-to-aimẹ hugan lehe e jẹ do. (Hab. 2:3) Todin whẹ́, mí ma dona nọ sẹ̀n Jehovah to aliho mọmọ tọn mẹ. Kakatimọ, mí dona gbọṣi nukle bo dovivẹnu to azọ́n yẹwheho wẹndagbe lọ tọn didọ mẹ, ehe yin asisa pekọhẹnwanamẹ mayọnjlẹ tọn, etlẹ yin todin.—Luku 21:36.
DONA TẸLẸ WẸ HOMẸFA TINTINDO NỌ HẸNWA?
17, 18. (a) Dotẹnmẹ hundote tẹwẹ mí tindo dile mí to homẹfa dohia? (b) Dona tẹlẹ wẹ mí na mọyi eyin mí do homẹfa hia todin?
17 Vlavo mí ko to Jiwheyẹwhe sẹ̀n na osun vude kavi na owhe susu, ojlo mítọn wẹ nado sẹ̀n ẹn kakadoi. Mahopọnna whenu he pò na titonu ehe, homẹfa na gọalọna mí nado doakọnnanu kakajẹ whenue mí na mọ whlẹngán yí. Todin, Jehovah hùn dotẹnmẹ dote na mí nado do jide mlẹnmlẹn hia to nudide etọn lẹ mẹ podọ nado jiya kanyinylan tọn do oyín etọn tamẹ eyin e biọ domọ. (1 Pita 4:13, 14) Humọ, Jiwheyẹwhe sọgan gọalọna mí nado tindo homẹfa he jẹ na whlẹngán gbọn azọ́nplọnmẹ nina mí dali.—1 Pita 5:10.
18 Jesu tindo aṣẹ lẹpo to olọn mẹ podọ to aigba ji, podọ nude ma sọgan glọnalina ẹn nado basi hihọ́na we, adavo hiẹ lọsu. (Joh. 10:28, 29) Whẹwhinwhẹ́n depope ma tin nado dibuna sọgodo kavi okú. Mẹhe yí homẹfa do doakọnnanu kakajẹ opodo lẹ na yin whinwhlẹngán. Enẹwutu, mí dona wà nuhe go mí pé lẹpo ma nado dike aihọn lọ ni klọ mí bo doalọtena mí ma nado nọ ganjẹ Jehovah go. Kakatimọ, mí dona magbe nado hẹn yise mítọn lodo bo yí whenu he homẹfa Jiwheyẹwhe tọn na mí zan po nuyọnẹn po.—Mat. 24:13; hia 2 Pita 3:17, 18.
[Yẹdide to weda 21]
Awuwiwlena homẹfa Jiwheyẹwhe tọn nkọ na gọalọna we nado ze ayidonugo do onú Ahọluduta lọ tọn lẹ ji bo mọ dona susu yí!