‘Na Oyín Jiwheyẹwhe Tọn Ni Yin Kinklandowiwe’
1. Etẹwẹ yin hosọ tito-to-whinnu plidopọ lẹdo tọn owhe sinsẹ̀nzọn 2012 tọn, podọ wefọ tẹ ji wẹ e sinai do?
1 Lẹblanulọkẹyi nankọ die nado tindo oyín Nupojipetọ Wẹkẹ lọ tọn, yèdọ Jehovah tọn to ota! Jiwheyẹwhe lọsu wẹ ze oyín etọn do ota na mí, podọ na taun tọn, sọn 1931 gbọ́n wẹ mí ko yin yinyọnẹn po oyín jọnun etọn po taidi Kunnudetọ Jehovah tọn lẹ. (Isa. 43:10) Visunnu detọ́n dopo akàn Jiwheyẹwhe tọn, yèdọ Jesu, ze oyín Jiwheyẹwhe tọn sù bo ze oyín enẹ do otẹn tintan mẹ to odẹ̀ apajlẹ tọn etọn mẹ. (Mat. 6:9) Nuhe Jesu dọ enẹlẹ ji wẹ hosọ tito-to-whinnu plidopọ lẹdo tọn owhe sinsẹ̀nzọn 2012 tọn sinai do. Hosọ etọn wẹ “Na Oyín Jiwheyẹwhe Tọn Ni Yin Kinklandowiwe.”
2. Hosọ tẹlẹ wẹ mí to nukọnpọnhlan nado duvivi etọn?
2 Nuhe Ji Mí Na Sèhó Do Lẹ: To Sibigbe, hosọ lọ “Mì Hẹn Oyín Jiwheyẹwhe Tọn Zun Yinyọnẹn Taidi Lizọnyizọnwatọ Whenu-Gigọ́ Tọn Lẹ” na zinnudo nuhewutu sinsẹ̀nzọn whenu-gigọ́ tọn nọ hẹn ale wá ji. Humọ, hómadọ lọ, “Họ́ Dewe Ma Nado Hẹn Vlẹko Wá Oyín Jehovah Tọn Ji” na gọalọna mí ma nado jai jẹ omọ̀ ẹnẹ delẹ mẹ. Kanbiọ he bọdego ehelẹ na yin gbigbà do flinflin to hosọ lọ “Nuhewutu Oyín Jiwheyẹwhe Tọn Dona Yin Kinklandowiwe” mẹ: enẹ wẹ, Etẹwẹ na gọalọna mí nado dọyẹwheho po zohunhun po to whenue gbẹtọ lẹ ma do ojlo hia sọmọ? podọ Etẹwẹ na gọalọna mí nado tindo kọdetọn dagbe to lizọnyizọn mítọn mẹ? To Sẹgbe, mí na duvivi hómadọ adà ẹnẹ tọn de tọn gando lehe mí sọgan klan oyín Jiwheyẹwhe tọn do wiwe to nulẹnpọn, hodidọ, nudide po walọ mítọn lẹ po mẹ do go. Na taun tọn, mẹyọyọ lẹ na yọ́n pinpẹn hodidọ na mẹlẹpo tọn he hosọ etọn yin “Jehovah Na Klan Oyín Daho Etọn Do Wiwe to Amagẹdọni.”
3. Lẹblanulọkẹyi tẹwẹ mí tindo, podọ nawẹ tito-to-whinnu lọ na gọalọna mí gbọn?
3 To madẹnmẹ, Jehovah na yinuwa nado klan oyín etọn do wiwe. (Ezek. 36:23) Todin whẹ́, mí tindo lẹblanulọkẹyi daho lọ nado yiavùnlọna nuhe gando oyín wiwe Jehovah tọn go lẹpo. Mí deji dọ tito-to-whinnu plidopọ lẹdo tọn ehe tọn na gọalọna dopodopo mítọn nado hẹn azọngban tangan mítọn taidi mẹhe tindo oyín Jiwheyẹwhe tọn to ota di.