Kunnudetọ Jehovah Tọn lẹ Yin Tito-Basina Nado Lá Wẹndagbe Lọ
E ko hugan owhe 100 he Kunnudetọ Jehovah tọn lẹ yin tito-basina nado lá wẹndagbe lọ. Ogbè susu mẹ wẹ mí nọ lá owẹ̀n lọ te podọ to aigba 230 linlán ji, yèdọ azọ́n yẹwhehodidọ tọn he nkọ ma ko yin wiwà pọ́n gbede to aihọn lọ mẹ. (Mat. 24:14) Naegbọn azọ́n ehe do yin nujọnu sọmọ? Nawẹ owẹ̀n lọ to yinyin lilá lẹdo aihọn pé gbọn? Video lọ Les Témoins de Jéhovah: organisés pour prêcher la bonne nouvelle (Kunnudetọ Jehovah Tọn lẹ Yin Tito-Basina Nado Lá Wẹndagbe Lọ) na gblọndo kanbiọ enẹlẹ tọn gbọn zẹẹmẹ bibasi do adà voovo azọ́n he wà mí te lẹdo aihọn pé lọ tọn ji dali. To video lọ pinpọn godo, lẹnnupọndo kanbiọ he bọdego ehelẹ ji.
Nawẹ video ehe gọalọna we nado mọnukunnujẹ (1) vivẹnu he do titobasinanu Jehovah tọn te nado lá wẹndagbe lọ mẹ gbọn? (2 Tim. 4:2) (2) nuhe hagbẹ whẹndo Bẹtẹli tọn lẹ nọ wà lẹdo aihọn pé mẹ gbọn? (3) azọ́nplọnmẹ he mẹdehlan lẹ po nugopọntọ lẹ po nọ mọyi mẹ gbọn? (2 Tim. 2:2) (4) nuhewutu e do yin nujọnu nado nọ bẹ azán dopodopo jẹeji po dogbigbapọnna wefọ Biblu tọn de po gọna awuwiwlena opli agun tọn lẹ to sẹmẹsẹmẹ mẹ gbọn? (Owalọ 17:11) (5) ale he opli Klistiani tọn lẹ yìyì nọ hẹnwa mẹ gbọn? (Heb. 10:24, 25) (6) dona he mí na duvivi etọn to whenue aigba na lẹzun Paladisi mẹ gbọn? (Isa. 11:9) (7) lẹblanulọkẹyi he a tindo nado nọ tindo mahẹ to azọ́n jibẹwawhé tọn he to yìyì to alọnu lọ mẹ gbọn?—Joh. 4:35.
Video ehe yin azọ́nwanu dagbe de he ko gọalọna jlodotọ susu nado jẹakọ hẹ azọ́n he Kunnudetọ Jehovah tọn lẹ to wiwà lẹdo aihọn pé. (8) Whetẹnu wẹ mí sọgan do video lọ hia plọnmẹ Biblu po hẹnnumẹ mítọn lẹ po gọna mẹdevo lẹ? (9) Etẹwẹ yin numọtolanmẹ yetọn to whenue a do video lọ hia yé?
To whenue mí lẹnayihamẹpọn do nuhe Jehovah to wiwà ji, mí nọ tindo numọtolanmẹ Psalm-kantọ lọ tọn nkọ dọmọ: “OKLUNỌ E Jiwheyẹwhe ṣie, susu wẹ azọ́njiawu he hiẹ ko wà, po linlẹn towe po hlan míwlẹ dali: yè ma sọgan hia yé hlan we kannukannu gba.” (Ps. 40:5) Mì gbọ mí ni yí video ehe zan ganji nado gọalọna mẹdevo lẹ na yé nido wleawuna pinpẹn-nutọn-yinyọnẹn na Jehovah po titobasinanu etọn po!