Wlebòna Azọ́n Yẹwhehodidọ Tọn Lọ
1. Nukun tẹwẹ mẹsusu nọ yí do pọ́n azọ́n yẹwhehodidọ tọn mítọn?
1 Mẹsusu to aihọn Satani tọn mẹ nọ pọ́n azọ́n yẹwhehodidọ tọn mítọn taidi “nulunu.” (1 Kọl. 1:18-21) Eyin mí ma tin to aṣeji, pọndohlan agọ̀ ehe sọgan dekanpona zohunhun mítọn bo hẹn mí gbọjọ. (Howh. 24:10; Isa. 5:20) Whẹwhinwhẹ́n tẹlẹ wutu wẹ mí dona wlebòna lẹblanulọkẹyi mítọn taidi Kunnudetọ Jehovah tọn lẹ?—Isa. 43:10.
2. Naegbọn mí sọgan ylọ lizọnyizọn lọ dọ “azọ́n wiwe” de?
2 “Azọ́n Wiwe” De: Apọsteli Paulu ylọ lizọnyizọn lọ dọ “azọ́n wiwe” de. (Lom. 15:15, 16) Etẹwutu? Na mí nọ lẹzun “azọ́nwatọ hatọ” “Omẹ Wiwe lọ,” Jehovah tọn to whenue mí to mahẹ tindo to lizọnyizọn lọ mẹ, bo nọ gbọnmọ dali klan oyín etọn do wiwe. (1 Kọl. 3:9; 1 Pita 1:15) Jehovah nọ pọ́n azọ́n yẹwhehodidọ tọn mítọn taidi “avọ́sinsan pipà tọn” de. Enẹwutu, lizọnyizọn lọ yin adà titengbe sinsẹ̀n-bibasi mítọn tọn de.—Heb. 13:15.
3. Naegbọn wẹndagbe lọ lilá do yin lẹblanulọkẹyi daho de?
3 Wẹndagbe lọ lilá yin lẹblanulọkẹyi daho de he ma yin nina mẹsusu. Eyin angẹli lẹ wẹ azọ́n ehe ko yin didena, homẹ na hùn yé nado penukundego ganji, podọ ayihaawe ma tin dọ yé na tindo kọdetọn dagbe. (1 Pita 1:12) Ṣigba, mí mẹhe yin gbẹtọ mape, yèdọ “núzinzan okọ́ tọn lẹ” wẹ Jehovah na lẹblanulọkẹyi jiawu ehe!—2 Kọl. 4:7.
4. Nawẹ mí sọgan dohia dọ mí nọ wlebòna lizọnyizọn mítọn gbọn?
4 Azọ́n Titengbe Hugan Lọ: Na mí nọ wlebòna lẹblanulọkẹyi mítọn wutu, mí nọ pọ́n lizọnyizọn lọ taidi dopo to “nuhe yin nujọnu hugan” na mí lẹ mẹ. (Flp. 1:10) Enẹwutu, mí nọ basi tito nado tindo mahẹ to e mẹ to sẹmẹsẹmẹ. Di apajlẹ, hànsinọ he yọ́n pinpẹn lẹblanulọkẹyi he e tindo nado jihàn to nuhogbẹ́ he diyin taun de mẹ nọ wleawu jẹnukọnna nuhiho dopodopo bo nọ tẹnpọn nado hẹn nugopipe etọn pọnte. Mọdopolọ, mí dona nọ wleawu whẹpo do yì sinsẹ̀nzọn lọ mẹ na mí nido “yí ohó nugbo tọn lọ zan to aliho he sọgbe mẹ,” podọ mí dona dovivẹnu nado hẹn “azọ́nyinyọnẹn mẹpinplọn tọn” mítọn pọnte.—2 Tim. 2:15; 4:2.
5. Mẹnu wẹ nọ yọ́n pinpẹn lizọnyizọn mítọn tọn?
5 Ma dike ojlo matindo suhugan gbẹtọ lẹ tọn ni hẹn we gbọjọ blo. Flindọ mẹhe yọ́n pinpẹn dlapọn mítọn lẹ tọn susu gbẹ́ tin to aigba-denamẹ mítọn ji. Ṣigba, e ma yin nukundagbe gbẹtọ lẹ tọn dín wẹ mí te. Kakatimọ nukun he Jehovah nọ yí do pọ́n lizọnyizọn mítọn wẹ yin nujọnu hugan, podọ ayihaawe ma tin dọ e nọ yọ́n pinpẹn vivẹnudido mítọn lẹ tọn taun.—Isa. 52:7.