Whẹwhinwhẹ́n Wiawe He Wutu Mí Nọ Dọyẹwheho

Naegbọn mí nọ dọyẹwheho wẹndagbe lọ tọn bo nọ deanana plọnmẹ Biblu lẹ? Be whẹwhinwhẹ́n tangan lọ wẹ nado gọalọna ahunjijlọnọ lẹ nado wá aliho he nọ planmẹ yì ogbẹ̀ mẹ lọ ji ya? (Mat. 7:14) Enẹ wẹ yin tintan to whẹwhinwhẹ́n he yin sislẹ bọdego lẹ mẹ, ṣigba e ma yin whẹwhinwhẹ́n tangan lọ niyẹn. To whẹwhinwhẹ́n 12 he wutu mí nọ tindo mahẹ to lizọnyizọn lọ mẹ he yin sislẹ bọdego lẹ mẹ, detẹ wẹ a lẹndọ e yin nujọnu hugan?

1. E nọ gọalọ nado whlẹn gbẹtọ lẹ.—Joh. 17:3.

2. E nọ na avase mẹylankan.—Ezek. 3:18, 19.

3. E nọ zọ́n bọ dọdai Biblu tọn nọ mọ hẹndi.—Mat. 24:14.

4. E nọ do dodowiwa Jiwheyẹwhe tọn hia. Mẹdepope ma sọgan dọ dọ Jehovah ma na dotẹnmẹ mẹylankan lẹ nado lẹnvọjọ whẹpo do và yé sudo.—Owalọ 17:30, 31; 1 Tim. 2:3, 4.

5. E nọ zọ́n bọ mí nọ hẹn azọngban mítọn nado gọalọna gbẹtọ lẹ he yin hihọ̀ gbọn ohùn Jesu tọn gblamẹ di.—Lom. 1:14, 15.

6. E nọ gọalọna mí nado dapana hùnhọ́dudu.—Owalọ 20:26, 27.

7. Nubiọtomẹsi de wẹ e yin na whlẹngán mílọsu titi tọn.—Ezek. 3:19; Lom. 10:9, 10.

8. E nọ dohia dọ mí yiwanna kọmẹnu mítọn lẹ.—Mat. 22:39.

9. E nọ dohia dọ mí setonuna Jehovah po Visunnu etọn po.—Mat. 28:19, 20.

10. E yin apadewhe sinsẹ̀n-bibasi mítọn tọn.—Heb. 13:15.

11. E nọ dohia dọ mí yiwanna Jiwheyẹwhe.—1 Joh. 5:3.

12. E nọ zọ́n bọ yinkọ Jehovah tọn nọ yin kinklandowiwe.—Isa. 43:10-12; Mat. 6:9.

Nugbo wẹ dọ e ma yin whẹwhinwhẹ́n ehelẹ kẹdẹ wutu wẹ mí do nọ tindo mahẹ to lizọnyizọn lọ mẹ. Di apajlẹ, yẹwhehodidọ nọ hẹn yise mítọn lodo bosọ nọ hùn dotẹnmẹ vonọtaun dote na mí nado yin azọ́nwatọ hatọ Jiwheyẹwhe tọn lẹ. (1 Kọl. 3:9) Ṣigba, whẹwhinwhẹ́n 12tọ lọ wẹ yin nujọnu hugan to whẹwhinwhẹ́n he wutu mí nọ tindo mahẹ to lizọnyizọn lọ mẹ lẹ mẹ. Vlavo gbẹtọ lẹ dotoaina mí kavi lala, lizọnyizọn lọ nọ zọ́n bọ mí nọ klan yinkọ Jiwheyẹwhe tọn do wiwe bo nọ hùn dotẹnmẹ dote na Jehovah nado gblọnhona mẹhe to vivlẹ ẹ. (Howh. 27:11) Na nugbo tọn, mí tindo whẹwhinwhẹ́n dagbe susu nado “zindonukọn nado to mẹplọn bo to wẹndagbe lọ lá mapote.”—Owalọ 5:42.