**Hẹn Lizọnyizọn Towe Pọnte Dogọ—Owe Biblu Plọn Mí Zizedonukọnnamẹ**

Nuhewutu E Do Yin Nujọnu: Owe Biblu Plọn Mí yin azọ́nwanu titengbe de he mí nọ yí do plọnnu gbẹtọ lẹ. Ṣigba, whẹpo mí na yí i do plọnnu hẹ mẹde, mí dona do e gbonu na mẹlọ whẹ́. Enẹwutu, mímẹpo dona dovivẹnu nado bikan to owe lọ zizedonukọnnamẹ to lizọnyizọn lọ mẹ. (Howh. 22:29) Aliho susu wẹ mí sọgan yizan, ṣigba dehe nọ tindo kọdetọn dagbe na mí wẹ mí dona nọ yizan.

Lehe Mí Sọgan Wàmọ Do:

Fọ́n kanbiọ he mẹ whétọ lọ na tindo ojlo te de dote nado deanana ẹn yì weta tangan owe lọ tọn de mẹ. A tlẹ sọgan de dopo to kanbiọ he to bẹjẹeji weta dopodopo tọn lẹ mẹ. To whenue a ko dotoaina gblọndo etọn godo, hia wefọ he jẹ de bo do hukan he dọhodo hosọ enẹ ji hia ẹ. Eyin e yọnbasi, mì dọhodeji to kleun mẹ.
Aliho devo wẹ nado yí weda tintan owe lọ tọn lẹ zan nado fọnjlodotena whétọ lọ bo do fie gblọndo Biblu tọn te hia ẹ to owe lọ mẹ. Di apajlẹ, a sọgan donù nujijọ ylankan agọe tọn de he tọ́n to linlin lẹ mẹ go bo basi zẹẹmẹ dọ mẹsusu wẹ nọ kàn kanbiọ he to weda 3tọ ji lẹ sè yede. Kavi a sọgan dọ dọ a to kọmẹnu towe lẹ dlapọn nado dọho hẹ yé do todido dagbe he mí sọgan tindo gando sọgodo go ji. Enẹgodo, do yẹdide he to weda 4-5tọ ji lẹ hia ẹ bo kanse dọ, “Detẹ to opagbe ehelẹ mẹ wẹ mì jlo dọ ni mọ hẹndi?” Aliho devo sọ wẹ nado dọ dọ mí to dlapọn kleun de basi na gbẹtọ lẹ nado gọalọna yé nado mọ gblọndo na kanbiọ titengbe gbẹ̀mẹ tọn lẹ. Enẹgodo, do kanbiọ he to vivọnu weda 6tọ tọn lẹ hia whétọ lọ bo kanbiọ ẹ dọ detẹ mẹ wẹ e tindo ojlo te hugan.
Yí aliho plọnmẹ Biblu zizedonukọnnamẹ tlọlọ tọn zan bo dọmọ: “Mí to owe he yè nọ yí do plọn Biblu ehe dohia kọmẹnu mítọn lẹ. Be mì ko mọ ẹn pọ́n ya? [Jotẹnna gblọndo.] Eyin mì tindo whenu pẹẹde, n’sọgan do lehe owe lọ nọ gọalọnamẹ nado plọnnu sọn Biblu mẹtọn titi mẹ do hia mì.”

Tẹ́n Ehe Pọ́n to Osun lọ Mẹ:

Basi zepọn to sinsẹ̀n-bibasi whẹndo tọn whenu.
To kunnudegbe, nọ dọhodopọ hẹ wẹnlatọ devo lẹ do nuzedonukọnnamẹ he a basi tito nado yizan lẹ ji. (Howh. 27:17) Diọ nuzedonukọnnamẹ lọ eyin e ma tindo kọdetọn dagbe.