Ma Whleawu Nado Dekunnu Blo
1. Etẹwẹ nọ biọ adọgbigbo, podọ etẹwutu?
1 Be hiẹ ko whleawu nado dekunnu to wehọmẹ pọ́n na obu di we dọ mẹdevo lẹ na kò we wutu ya? E nọ biọ adọgbigbo nado dọho, titengbe eyin a nọ kuwinyan. Etẹwẹ na gọalọna we?
2. Naegbọn mí dona nọ yí wuntuntun zan to whenue mí to kunnude to wehọmẹ?
2 Nọ Yí Wuntuntun Zan: Dile etlẹ yindọ hiẹ sọgan pọ́n wehọmẹ taidi aigba-denamẹ towe po gbesisọ po, flindọ e ma yin mẹlẹpo wẹ a sọgan dekunnuna dile hiẹ na wà do to whenue a to yẹwhehodọ sọn whédegbè jẹ whédegbè. Nọ yí wuntuntun zan nado yọ́n whenue a na dọho.a (Yẹwh. 3:1, 7) Hosọ hodọdopọ tọn de to klasi kavi azọ́ndenamẹ wehọmẹ tọn de sọgan hùn dotẹnmẹ dote na we nado dọ nuyise towe lẹ. Kavi wehọmẹvi hatọ de sọgan kàn nuhewutu hiẹ ma do nọ doalọ to nuwiwa delẹ mẹ sè we. Klistiani delẹ ko nọ dọna mẹplọntọ yetọn lẹ to bẹjẹeji owhe wehọmẹ tọn dọ Kunnudetọ Jehovah tọn wẹ emi yin bosọ nọ yí owe he basi zẹẹmẹ nuyise mítọn tọn lẹ na yé. Mẹdevo lẹ nọ jo owe mítọn lẹ do tafo yetọn ji ehe nọ whàn wehọmẹvigbẹ́ yetọn lẹ nado kanhose.
3. Nawẹ hiẹ sọgan wleawudai nado dekunnu to wehọmẹ gbọn?
3 Nọ Wleawudai: Hiẹ na yidogọna adọgbigbo towe eyin a nọ wleawudai. (1 Pita 3:15) Enẹwutu, tẹnpọn nado nọ lẹnnupọndo kanbiọ he sọgan fọndote lẹ ji jẹnukọn, bo pọ́n lehe hiẹ sọgan na gblọndo yetọn do. (Howh. 15:28) Eyin e yọnbasi, nọ hẹn Biblu po owe mítọn delẹ po, taidi owe Comment raisonner, Kanbiọ He Jọja lẹ Nọ Kanse kavi owe he dọhodo nudida ji lẹ yì wehọmẹ na a nido sọgan yí yé zan eyin nuhudo etọn tin. Biọ to mẹjitọ towe lẹ si nado yí zepọn bibasi dogọ tito sinsẹ̀n-bibasi whẹndo tọn mìtọn.
4. Naegbọn hiẹ dona zindonukọn nado nọ dekunnu to wehọmẹ?
4 Nọ Hẹn Pọndohlan Dagbe Go: Ma nọ tindo linlẹn lọ dọ wehọmẹvigbẹ́ towe lẹ na nọ ṣàn we kò to whedepopenu he a dọho gando nugbo lọ go blo. E yọnbasi dọ mẹdelẹ na yọ́n pinpẹn adọgbigbo towe tọn podọ yé tlẹ sọgan dotoai. Ṣigba ma gbọjọ blo, eyin mẹdepope ma kẹalọyi ohó lọ. Homẹ na hùn Jehovah dọ a ko tẹnpọn. (Heb. 13:15, 16) Zindonukọn nado nọ biọ ẹ dọ ni gọalọna we nado ‘to ohó dọ po adọgbigbo lẹpo po.’ (Owalọ 4:29; 2 Tim. 1:7, 8) Yí nukun homẹ tọn do pọ́n lehe homẹ towe na hùn do to whenue mẹde dotoai. Omẹ enẹ tlẹ sọgan wá lẹzun devizọnwatọ Jehovah tọn de to godo mẹ!
[Nudọnamẹ odò tọn]
a AYIDONUGO: To otò delẹ mẹ, osẹ́n jẹagọdo nuyise sinsẹ̀n tọn lẹ hinhẹn gbayipe to wehọmẹ ahọlu tọn lẹ mẹ. Klistiani nugbo lẹ nọ setonuna osẹ́n. (Mat. 22:21) Enẹwutu, mẹdopodopo dona basi nudide lehe e na na gblọndo to ninọmẹ delẹ mẹ do tọn, taidi to whenuena mẹplọntọ kavi wehọmẹvi de fọ́n kanbiọ de dote.