Ninọmẹ Tẹ mẹ Wẹ E Te?

Kanbiọ dagbe de wẹ enẹ yin he e jẹ dọ mí ni nọ kanse gando owe depope he mí jlo na dogbonu go. Owe depope he weda etọn lẹ ko há sọn otó, diọ sinmẹ, kudiho, kavi vún na de yẹyi sọn titobasinanu mítọn go bo sọgan fẹayihasẹna whétọ lẹ ma nado mọ whanpẹ, owẹ̀n gbẹwhlẹngán tọn he owe lọ bẹhẹn tọn.

Nawẹ mí sọgan nọ hẹn owe mítọn lẹ do wiwe ji gbọn? Mẹsusu mọdọ e yọ́n nado nọ to owe wunmẹ dopolọ lẹ do fidopo lọ to saki yetọn mẹ. Di apajlẹ, yé nọ to owe daho lẹ do fidopo, linlinnamẹwe po alọnuwe lẹ po do fidevo, alọnuwe pẹvi lẹ do fidevo, po mọmọ po sọyi. Whedepopenu he yé gọ̀ Biblu po owe depope he yé yizan po do saki kunnudegbe tọn yetọn mẹ, yé nọ wàmọ po sọwhiwhe po ma nado hẹn yé gble. Wẹnlatọ delẹ nọ bẹ owe yetọn lẹ do wepò kavi saki lọbanọ he mẹ yè sọgan mọ owe hlan te mẹ. Mahopọnna aliho he mí nọ yizan, mí ma jlo na hùn dotẹnmẹ dote na mẹde nado mọhodọ do lizọnyizọn mítọn go gbọn owe he ko gble lẹ yíyí na ẹn dali.—2 Kọl. 6:3.