Video La foi en action Apá 1: Sọn Zinvlu mẹ Wá Hinhọ́n Nù
To Biblu mẹ, nugbo nọ tindo kanṣiṣa hẹ hinhọ́n bọ zinvlu nọ tindo kanṣiṣa hẹ lalo. (Ps. 43:3; Isa. 5:20) Satani hẹn zinvlu biọ aihọn lọ mẹ to whenue e klọ Evi, podọ e wá tlọ gbẹtọvi lẹ do zinvlu gọ́ngọ́n mẹ. (Osọ. 12:9) Video lọ Les Témoins de Jéhovah—La foi en action, 1re partie: La sortie des ténèbres [Kunnudetọ Jehovah Tọn lẹ Nọ Do Yise Yetọn Hia, Apá 1: Sọn Zinvlu mẹ Wá Hinhọ́n Nù] do lehe hinhọ́n gbigbọmẹ tọn jẹ wunhọ́n ji debọdo-dego sọn zinvlu mẹ do hia. (Isa. 60:1, 2) To video lọ pinpọn godo, be hiẹ sọgan na gblọndo kanbiọ ehelẹ tọn ya?
(1) Nawẹ zinvlu gọ́ngọ́n de wá aimẹ to okú apọsteli lẹ tọn godo gbọn? (2) Bẹsọn owhe 1100 lẹ mẹ, nujijọ tẹlẹ wẹ gọalọna gbẹtọ lẹ nado mọdọ ṣọṣi lẹ ma to nugbo lọ plọnmẹ? (3) Etẹwẹ mí yọnẹn gando Henry Grew po George Storrs po go? (4) Nujijọ tẹlẹ wẹ tindo nuyiwadomẹji sisosiso do gbẹzan Charles Russell tọn ji? (5) Nawẹ Mẹmẹsunnu Russell, otọ́ etọn po mẹyinyọnẹn etọn delẹ po nọ plọn Biblu to pọmẹ taidi pipli de gbọn, podọ tadona sinai do Owe-wiwe ji tẹlẹ kọ̀n wẹ yé wá? (6) Naegbọn pipli Biblu pinplọn tọn enẹ wá kọnawudopọ hẹ pipli Nelson Barbour tọn, ṣigba naegbọn Mẹmẹsunnu Russell do wá klan? (7) Etẹwẹ jọ to juillet 1879 he yin bẹjẹeji ojlẹ hinhọ́n gbigbọmẹ tọn yọyọ de tọn? (8) To enẹgodo, etẹwẹ Biblu Plọntọ he to jijideji to sọha mẹ lẹ wà nado hẹn wẹndagbe lọ gbayipe? (9) To owhe susu lẹ jẹnukọn, etẹwẹ Biblu Plọntọ lẹ to nukundo dọ e na jọ to 1914? (10) Nuhahun tẹlẹ wẹ Biblu Plọntọ lẹ pehẹ to okú Mẹmẹsunnu Russell tọn godo? (11) Etẹwẹ Biblu Plọntọ lẹ wà to whenue Mẹmẹsunnu Rutherford po gbẹdohẹmẹtọ etọn lẹ po yin tuntundote sọn gànpamẹ godo? (12) Nawẹ video ehe yidogọna pinpẹn-nutọn-yinyọnẹn towe na titobasinanu Jehovah tọn gbọn? (13) Nawẹ video ehe yidogọna gbemima towe nado to wẹndagbe lọ lá zọnmii po zohunhun po mahopọnna aliglọnnamẹnu depope gbọn? (14) Nawẹ mí sọgan yí video ehe zan nado gọalọna hẹnnumẹ mítọn lẹ, plọnmẹ Biblu lẹ po mẹdevo lẹ po gbọn?
Ogú gbigbọmẹ tọn họakuẹ nankọ die Biblu Plọntọ ehelẹ jodona mí! To aihọn he to zinvlu mẹ to gbigbọ-liho de mẹ, yé do yede hia taidi hinhọ́n hẹntọ adọgbotọ podọ zohunhunnọ lẹ. Mì gbọ mí ni hodo apajlẹ yetọn bo “nọ to zọnlinzin taidi ovi hinhọ́n tọn lẹ.”—Efe. 5:8.