Basi Hihọ́na Ayihadawhẹnamẹnu Towe
1. Etẹwẹ yin hosọ azán plidopọ vonọtaun tọn owhe sinsẹ̀nzọn 2013 tọn, podọ etẹwẹ yin lẹndai tito-to-whinnu lọ tọn?
1 Egbesọegbesọ wẹ mí nọ pehẹ ninọmẹ he sọgan zọ́n bọ mí na yinuwa jẹagọdo ayihadawhẹnamẹnu mítọn lẹ. Enẹwutu wẹ hosọ tito-to-whinnu azán plidopọ vonọtaun tọn na owhe sinsẹ̀nzọn 2013 tọn, he na bẹjẹeji to 1er septembre 2012 do yin “Basi Hihọ́na Ayihadawhẹnamẹnu Towe.” (1 Tim. 1:19) Tito-to-whinnu lọ ko yin awuwlena nado gọalọna dopodopo mítọn nado na ayidonugo sọwhiwhe tọn lehe mí to nunina vonọtaun he wá sọn Mẹdatọ mítọn dè ehe yizan do.
2. Kanbiọ titengbe tẹlẹ wẹ na mọ gblọndo to tito-to-whinnu lọ whenu?
2 Dín Nuagokun Ehelẹ: Tito-to-whinnu lọ na na gblọndo kanbiọ titengbe ehelẹ tọn gando ayihadawhẹnamẹnu go:
• Etẹlẹ wẹ ma nọ wà dagbe na ayihadawhẹnamẹnu?
• Nawẹ mí sọgan plọn ayihadawhẹnamẹnu mítọn gbọn?
• Nawẹ e yọnbasi dọ mí ni wé sọn ohùn gbẹtọ lẹpo tọn mẹ gbọn?
• Etẹlẹ wẹ nulẹnpọn po nuyiwa mítọn po to kọndopọ mẹ hẹ nunọwhinnusẹ́n Biblu tọn lẹ nọ dohia gando mí go?
• Nawẹ mí sọgan dapana awuhẹngblena mẹdevo lẹ to whẹho he gando ayihadawhẹnamẹnu go lẹ mẹ gbọn?
• Jọja lẹ emi, eyin mì yin kọgbidina nado gbẹ́ nuyise mìtọn lẹ, nawẹ mì sọgan dudeji gbọn?
• Dona tẹlẹ wẹ mẹhe nọ hodo ayihadawhẹnamẹnu yetọn he nọ yin anadena gbọn gbigbọ dali lẹ nọ mọyi?
3. Nawẹ mí sọgan mọaleyi sọn tito-to-whinnu lọ mẹ gbọn?
3 Po alọgọ Jehovah tọn po, mí sọgan duto vivẹnudido Satani tọn nado hẹn ayihadawhẹnamẹnu mítọn flu lẹ ji. Gbọn Ohó po titobasinanu Jiwheyẹwhe tọn po gblamẹ, Otọ́ owanyinọ olọn mẹ tọn mítọn to didọna mí dọmọ: “Ehe wẹ aliho [lọ], mì zinzọnlin to e mẹ.” (Isa. 30:21) Tito-to-whinnu ehe yin dopo to aliho he mẹ Jehovah to anademẹ mọnkọtọn na mí te lẹ mẹ. Enẹwutu, basi tito nado yì adà tito-to-whinnu lọ tọn lẹpo. Dotoai po sọwhiwhe po bo lẹnnupọndo lehe a sọgan yí nudọnamẹ lọ lẹ do yizan mẹ do ji. Mì dọhodo tito-to-whinnu lọ ji to whẹndo mẹ. Nudọnamẹ he mí mọyi lẹ yíyí-do-yizan mẹ na hẹn gbemima mítọn nado “hẹn ayihadawhẹnamẹnu dagbe de go” lodo bo gọalọna mí ma nado joawuna gbẹdudu aihọn Satani tọn he nọ doyẹklọ mí nado wà nuhe na hẹn haṣinṣan mítọn hẹ Jehovah gble lẹ.—1 Pita 3:16.