“Nọ Nọ̀ Jijọho mẹ hẹ Gbẹtọ Lẹpo”
1. Ayinamẹ Biblu tọn tẹwẹ mí dona nọ yí do yizan mẹ eyin whétọ he mí jlo na dọyẹwheho na lẹ gblehomẹ?
1 Omẹ Jehovah tọn lẹ yiwanna jijọho, podọ owẹ̀n jijọho tọn wẹ mí nọ lá. (Isa. 52:7) Ṣigba to whedelẹnu, mẹhe mí nọ dukosọna delẹ nọ gblehomẹ, na mí jlo na dọyẹwheho na yé wutu. Ṣigba, etẹwẹ na gọalọna mí nado nọ dín jijọho to ninọmẹ mọnkọtọn lẹ mẹ?—Lom. 12:18.
2. Naegbọn e do yin nujọnu dọ mí ni nọ yí zinzin zan?
2 Nọ Yí Zinzin Zan: Dile etlẹ yindọ mẹdelẹ jẹagọdo owẹ̀n mítọn wutu wẹ yé do nọ gblehomẹ to whenue mí jlo na dọyẹwheho na yé, homẹgble mẹdevo lẹ tọn sọgan yin na whẹwhinwhẹ́n devo lẹ wutu. E sọgan yindọ ojlẹ he ma sọgbe mẹ wẹ mí wá dla yé pọ́n te. Kavi whétọ lọ sọgan ko to homẹgble ji na nuhahun delẹ wutu. Eyin wẹndagbe lọ wẹ tlẹ zọ́n bọ mẹlọ gblehomẹ, flindọ yẹwhe titonu ehe tọn wẹ to aliglọnna gbẹtọ lẹ ma nado kẹalọyi owẹ̀n lọ. (2 Kọl. 4:4) Zinzin na gọalọna mí nado duto míde ji bo mọnú zẹ̀ homẹgble whétọ lọ tọn go.—Howh. 19:11.
3. Nawẹ mí sọgan do sisi hia whétọ lẹ gbọn?
3 Nọ Do Sisi Hia: To aigba-denamẹ mítọn ji, mẹsusu wẹ tindo nuyise delẹ he ko doadọ̀do to ahun yetọn mẹ. (2 Kọl. 10:4) Yé tindo jlọjẹ nado de, eyin yé na dotoaina mí kavi lala. Mí ma na jlo gbede nado vlẹ nuyise whétọ de tọn lẹ kavi dohia ẹ gbọn nuyiwa mítọn dali dọ ewọ ma yọ́n nude podọ míwlẹ yọ́n Biblu hugan ẹn gba. Eyin whétọ de yàn mí, mí dona gbọn sisi dali dedo.
4. Eyin ohó mítọn na gọ́ na ojọmiọn, etẹlẹ wẹ mí dona wà to whenue whétọ lẹ diọnukunsọ mí?
4 Hodidọ Towe Ni Nọ Gọ́ Na Ojọmiọn: Eyin gbẹtọ lẹ tlẹ ylangbè na we, nọ yí ogbè fifá po ohó he gọ́ na ojọmiọn po do gblọnna yé. (Kọl. 4:6; 1 Pita 2:23) Kakati nado jẹ nudọn ji hẹ whétọ de, mí nọ tẹnpọn nado dín hosọ he ji míwlẹ po ewọ po sọgan kọngbedopọ do de bo nọ dọhodo enẹ ji. Kavi eyin whétọ lọ fọ́n whẹho agọjẹdomẹ tọn de dote, mí na yí ogbè fifá do biọ to e si nado dọ nuhewutu e do dọmọ. Ṣigba, nado dapana nudindọn, e nọ yọ́n hugan nado sánkanna hodọdopọ lọ to whedelẹnu.—Howh. 9:7; 17:14.
5. Ale tẹlẹ wẹ mí nọ mọyi eyin mí nọ dín jijọho to lizọnyizọn lọ mẹ?
5 Eyin mí nọ dín jijọho, enẹ sọgan yinuwado whétọ lẹ ji bọ yé na wá dotoaina wẹnlatọ devo lẹ. (Lom. 12:20, 21) Whétọ he tlẹ diọnukunsọ mí sinsinyẹn to egbé sọgan wá lẹzun mẹmẹsunnu mítọn to osọ. (Gal. 1:13, 14) Eyin mí nọ duto míde ji bo nọ dín jijọho, mí na pagigona Jehovah bo nasọ doaṣọ́na mẹpinplọn mítọn, vlavo whétọ lọ kẹalọyi owẹ̀n lọ kavi lala.—2 Kọl. 6:3.