Nọtẹn Internet Tọn Mítọn Yin Awuwlena Nado Hẹn Ale Wá Na Míwlẹ po Mẹdevo lẹ Po
Jesu degbe na mí nado dọ yẹwheho wẹndagbe Ahọluduta lọ tọn “to aigba fininọ lẹpo ji taidi okunnu de na akọta lẹpo.” (Mat. 24:14) Na mí nido sọgan ‘hẹn lizọnyizọn mítọn di to gigọ́ mẹ,’ nọtẹn Internet tọn mítọn watchtower.org, jw-media.org, po jw.org po yin kinkọndopọ bo lẹzun jw.org.—2 Tim. 4:5.
“Aigba Fininọ Lẹpo”: Lẹdo aihọn pé, nudi mado-atọ̀n gbẹtọ lẹ tọn wẹ nọ zan Internet. To egbehe, Internet ko lẹzun asisa nudọnamẹ tọn tintan he mẹsusu nọ yizan, titengbe jọja lẹ. Nọtẹn Internet tọn mítọn bẹ gblọndo he sọgbe lẹ hẹn gando kanbiọ Biblu tọn lẹ go, podọ mẹhe nọ yì nọtẹn lọ ji lẹ sọgan mọaleyi sọn e mẹ. Nọtẹn mítọn do mẹhe Kunnudetọ Jehovah tọn lẹ yin hia, podọ mẹhe nọ yì nọtẹn lọ ji lẹ sọgan biọ plọnmẹ Biblu whégbè tọn vọnu de po awubibọ po to finẹ. Gbọnmọ dali, mẹhe tlẹ tin to awà he dẹn hugan aigba tọn ji lẹ sọgan sè owẹ̀n Ahọluduta lọ tọn.
“Akọta Lẹpo”: Nado sọgan dekunnuna “akọta lẹpo,” mí dona ze nugbo Biblu tọn donukọnna gbẹtọ lẹ to ogbè voovo mẹ. To jw.org ji, nudọnamẹ lẹ tin to nudi ogbè 400 mẹ, ehe ma sọgan yin mimọ to nọtẹn Internet tọn devo depope ji.
Yí I Zan Ganji: Nọtẹn yọyọ mítọn jw.org ma yin awuwlena nado dekunnuna mẹhe ma yọ́n nugbo lọ lẹ kẹdẹ gba, ṣigba e sọ tin na ale Kunnudetọ Jehovah tọn lẹ tọn ga. Eyin hiẹ sọgan mọ Internet zan, mí to tulina we nado jẹakọ hẹ nọtẹn mítọn jw.org. Ayinamẹ he bọdego ehelẹ do lehe a sọgan yí nọtẹn lọ zan do hia.
[Yẹdide/Apotin to weda 3]
(Na nudọnamẹ gigọ́, pọ́n zinjẹgbonu)
Tẹ́n Nọtẹn lọ Pọ́n
1 Kàn www.pr2711.com do apotin adlẹsi tọn mẹ to ọdinatẹẹ towe ji.
2 Nado dla nọtẹn lọ pọ́n, zín hosọ voovo he a na mọ lẹ.
3 Tẹ́n jw.org pọ́n to alokan apòmẹ tọn towe ji kavi to nuyizan devo depope he ji a sọgan mọ Internet te. To nuyizan enẹlẹ ji, nukinkan po yẹdide lẹ po ma nọ klo sọ ọdinatẹẹ tọn, ṣigba nudọnamẹ lọ lẹ ma nọ gbọnvo.