Nọ Yí jw.org Zan to Lizọnyizọn lọ mẹ—“Questions Bibliques”

To adà lọ “La Bible Et Vous” glọ to jw.org ji, a na mọ adà devo he nọ yin “Questions Bibliques.” Eyin mí jẹakọ hẹ kanbiọ ehelẹ he mẹsusu nọ kanse, mí na penugo nado deanana whétọ he nọ kàn kanbiọ sè lẹ yì jw.org ji nado dín gblọndo Owe-wiwe lẹ tọn. Kanbiọ ehelẹ sọ sọgan yin yiyizan nado bẹ hodọdopọ lẹ jẹeji to lizọnyizọn lọ mẹ. Mí sọgan de kanbiọ de he nọ duahunmẹna gbẹtọ lẹ to aigba-denamẹ mítọn ji bo kàn nuhe whétọ lọ lẹn gando kanbiọ lọ go sè e, podọ to enẹgodo mí na yí zẹẹmẹ he tin to jw.org ji zan nado dọ pọndohlan Biblu tọn na ẹn. Bọdo enẹ go, mí sọgan dọ fie mí mọ zẹẹmẹ lọ lẹ te na ẹn kavi dohia ẹ. Kavi mí sọgan sọ na ẹn dotẹnmẹ nado hia gblọndo lọ tlọlọ sọn jw.org ji. Nuhe nugopọntọ tomẹyitọ de sin asi nọ dọ die: “Mẹsusu nọ kanse yede dọ, ‘Be Jiwheyẹwhe wẹ zọ́n bọ mí do to yaji ya?’ Be n’gán do gblọndo lọ hia mì to nudi nukunwhiwhe dopo gblamẹ ya?” Enẹgodo, e nọ hò hoyidokanji he e ko yí sọn jw.org ji do alokan kavi ọdinatẹẹ pẹvi etọn ji nado na gblọndo mẹlọ. Afọdide mẹmẹyọnnu lọ tọn enẹ ko de sinsẹ́n tọ́n. Nado dotana, e nọ dohia dọ weta 11tọ owe Biblu Plọn Mí tọn dọho yinukọn do hosọ lọ ji.