Nuzedonukọnnamẹ Lẹ

Nado Bẹ Plọnmẹ Biblu lẹ Jẹeji to Sibigbe Tintan Osun Février Tọn

“Mì jaale, mí jlo na yọ́n linlẹn mìtọn gando kanbiọ ehe go. Naegbọn mí dona nọ yí yinkọ Jiwheyẹwhe tọn zan? [Jotẹnna gblọndo.] Mì doayi nuhe linlinnamẹwe ehe dọ go.” Ze vọkan Atọ̀họ̀-Nuhihọ́ lọ Tọn janvier-mars tọn dopo na whétọ lọ bo do hosọ he tin to wepa godo tọn ji lọ hia ẹ, enẹgodo gbadopọnna nudọnamẹ he tin to hóvila awetọ glọ hẹ ẹ bo hia dopo to wefọ he yin dide lẹ mẹ. Ze linlinnamẹwe lọ lẹ donukọnna whétọ lọ.

Atọ̀họ̀-Nuhihọ́ lọ Tọn Janvier-Mars

Hia Heblu lẹ 11:4. “Biblu dohia dọ yise whàn Abẹli nado basi avọ́sinsan he họakuẹ de hlan Jiwheyẹwhe. Etẹwẹ gọalọna Abẹli nado wleawuna yise mọnkọtọn? [Jotẹnna gblọndo.] Linlinnamẹwe ehe dọhodo onú atọ̀n he gọalọna ẹn nado wleawuna yise ji bosọ basi zẹẹmẹ lehe apajlẹ etọn yọ́n-na-yizan na mí to egbehe do tọn.” Ze hosọ he tin to weda 12tọ ji donukọnnamẹ.

Réveillez-vous! Avril

“To egbehe, mẹsusu nọ yì tògodo nado hẹn gbẹzan yetọn pọnte. Be mì lẹndọ mẹhe nọ yì tògodo enẹ lẹpo wẹ nọ penugo nado mọ nuhe dín yé te ya? [Jotẹnna gblọndo.] Tẹnsisẹ yì tògodo ma yin onú yọyọ de. Doayi apajlẹ he tin to owe tintan Biblu tọn mẹ ehe go. [Hia Gẹnẹsisi 46:5, 6.] Linlinnamẹwe ehe na gblọndo kanbiọ ehelẹ tọn.” Do kanbiọ he tin to vivọnu weda 6tọ tọn lẹ hia whétọ lọ.