Dotẹnmẹ Hundote Yọyọ Delẹ Nado Pagigona Jehovah
1. Tito yọyọ tẹwẹ na gọalọna mí nado ‘pagigona Jehovah’ to gigọ́ mẹ?
1 To mars he wayi, tito yọyọ de bẹjẹeji he hùn dotẹnmẹ dote na wẹnlatọ lẹ nado basi gbehosọnalitọ alọgọtọ tọn po yanwle gànmẹ 30 tọn po to osun mars po avril owhe dopodopo tọn po mẹ, podọ to osun he mẹ agun lọ tindo dlapọn nugopọntọ lẹdo tọn te. Eyin dlapọn nugopọntọ tọn bẹ sọn vivọnu osun de tọn biọ osun devo mẹ, wẹnlatọ he jlo na basi gbehosọnalitọ po yanwle gànmẹ 30 tọn po lẹ sọgan de nado wàmọ to dopo to osun awe lọ lẹ mẹ. Gbehosọnalitọ alọgọtọ tọn lẹpo sọgan yì opli he nugopọntọ lẹdo tọn nọ basi hẹ gbehosọnalitọ whepoponu tọn po titengbe lẹ po bo duvivi tito-to-whinnu lọ blebu tọn. Ehe dohia dọ eyin mí ma tlẹ sọgan jẹ nubiọtomẹsi gànmẹ 50 tọn kọ̀n, mí gbẹ́ tindo dotẹnmẹ hundote voovo ẹnẹ to whemẹwhemẹ nado ‘pagigona Jehovah’ to gigọ́ mẹ taidi gbehosọnalitọ alọgọ tọn po yanwle gànmẹ 30 tọn po.—Ps. 109:30; 119:171.
2. Etẹlẹ wẹ mẹhe na basi gbehosọnalitọ alọgọtọ tọn to dlapọn nugopọntọ tọn whenu lẹ na duvivi etọn?
2 To Dlapọn Nugopọntọ Tọn Whenu: Todin, mẹsusu dogọ wẹ na penugo nado basi gbehosọnalitọ alọgọtọ tọn to dlapọn nugopọntọ lẹdo tọn whenu bo duvivi tulinina ode awetọ tọn dile yé to azọ́nwa dopọ hẹ ẹ to lizọnyizọn lọ mẹ. (Lom. 1:11, 12) Matin ayihaawe, gbehosọnalitọ alọgọtọ tọn susu wẹ na biọgbè azán dopo tọn to azọ́nmẹ nado sọgan wazọ́n hẹ nugopọntọ lọ to osẹ lọ mẹ. Mẹhe nọ yì azọ́nmẹ to osẹ gblamẹ lẹ sọgan kanse nugopọntọ lọ eyin yé sọgan wazọ́n hẹ ẹ to lizọnyizọn lọ mẹ to sẹfifo. Humọ, tulinamẹnu daho de wẹ e na yin na gbehosọnalitọ alọgọtọ tọn lẹ nado yì opli he nugopọntọ nọ basi hẹ gbehosọnalitọ whepoponu tọn po titengbe lẹ po.
3. Naegbọn ojlẹ Oflin tọn do yin ojlẹ vonọtaun de nado basi gbehosọnalitọ alọgọtọ tọn?
3 To Mars Podọ to Avril: Mẹhe duvivi gbehosọnalitọ alọgọtọ tọn bibasi na osun dopo to ojlẹ Oflin tọn lọ whenu po yanwle gànmẹ 30 tọn po lẹ sọgan yidogọna “avọ́sinsan pipà” tọn yetọn na osun awe todin. (Heb. 13:15) Osun vonọtaun wẹ mars po avril po yin nado gbloada na lizọnyizọn mítọn taidi gbehosọnalitọ alọgọtọ tọn. To owhe dopodopo mẹ, mí nọ yí osun enẹlẹ zan nado tindo mahẹ to nujijla vonọtaun de mẹ bo nọ basi oylọna mẹdevo lẹ wá Oflin lọ. Humọ, na mẹsusu nọ gbloada na lizọnyizọn yetọn to ojlẹ Oflin tọn mẹ wutu, mí sọgan tindo lẹblanulọkẹyi lọ nado wazọ́n dopọ hẹ wẹnlatọ voovo lẹ. To Oflin lọ godo, mí nọ doafọna ojlo mẹhe wá Oflin lọ lẹ tọn bo nọ na tuli yé nado wá dotoaina togunmẹho vonọtaun lọ. Be dotẹnmẹ hundote yọyọ ehelẹ ma whàn we nado duvivi gbehosọnalitọ alọgọtọ tọn bibasi tọn ya?—Luku 6:45.