Nọ Hodo Apajlẹ Yẹwhegán lẹ Tọn—Jona
1. Jẹhẹnu ayidego tọn tẹlẹ wẹ Jona dohia?
1 Linlẹn tẹwẹ nọ wá ayiha towe mẹ eyin a flin yẹwhegán Jona? Mẹdelẹ sọgan nọ pọ́n ẹn hlan taidi butọnọ kavi mẹhe ma nọ kú lẹblanu namẹ. Ṣigba, e họnwun dọ ewọ do whiwhẹ, adọgbigbo, po gbigbọ mẹde-yido-sanvọ́ tọn po hia. Nawẹ mí sọgan ‘hodo apajlẹ’ Jona tọn na nuhe dù jẹhẹnu ayidego tọn he e dohia lẹ gbọn?—Jak. 5:10.
2. Nawẹ mí sọgan hodo apajlẹ Jona tọn na nuhe dù whiwhẹ didohia gbọn?
2 Whiwhẹ: To tintan whenu, Jona họ̀n pànta awà devo ji he gbọnvo pete na aigba-denamẹ he ji e yin didohlan lọ. Ehe ma yin nupaṣamẹnu de, na Assilianu lẹ peve to danuwiwa mẹ sọmọ bọ Nineve wá yin yiylọdọ “tòdaho ohùnnọ” lọ. (Nah. 3:1-3) Etomọṣo, Jehovah domẹplọnlọ Jona go, podọ ewọ do whiwhẹ hia bo kẹalọyi azọ́ndenamẹ lọ to whenue e yin zizedonukọnna ẹn whla awetọ. (Howh. 24:32; Jona 3:1-3) Dile etlẹ yindọ Jona họ̀n to tintan whenu, ewọ wà nuhe yin ojlo Jehovah tọn. (Mat. 21:28-31) Taidi Jona, be mílọsu magbe nado lá wẹndagbe lọ, etlẹ yin to whenue mí mọ mẹplọnlọ yí to agun mẹ kavi to whenue mí pehẹ avùnnukundiọsọmẹnu lẹ to aigba-denamẹ mítọn ji ya?
3. Adà lizọnyizọn towe tọn tẹlẹ wẹ nọ biọ adọgbigbo po gbigbọ mẹde-yido-sanvọ́ tọn po?
3 Adọgbigbo po Gbigbọ Mẹde-Yido-Sanvọ́ Tọn Po: To whenue Jona mọdọ nudide agọ̀ he emi basi ze ogbẹ̀ tọjihun-kùntọ lọ lẹ tọn do owù mẹ, e desọn ojlo mẹ nado yí ogbẹ̀ etọn do sanvọ́. (Jona 1:3, 4, 12) To nukọn mẹ, dile e to azọ́ndenamẹ etọn hẹndi to Nineve, e zinzọnlin kaka yì tòdaho lọ homẹ, vlavo nado dín fie e sọgan mọ gbẹtọ te hugan nado lá whẹdida Jehovah tọn na yé. Nuyiwa Jona tọn enẹlẹ dohia dọ ewọ ma yin butọnọ de gba, kakatimọ yẹwhegán adọgbotọ Jiwheyẹwhe tọn de wẹ ewọ! (Jona 3:3, 4) Etẹwẹ dogbọn míwlẹ dali? Mí tindo nuhudo adọgbigbo he Jiwheyẹwhe nọ namẹ tọn nado dekunnu madibu to whenue mí pehẹ nukundiọsọmẹ. (Owalọ 4:29, 31) E nọ biọ gbigbọ mẹde-yido-sanvọ́ tọn nado yí whenu po nutindo mítọn lẹ po zan na lizọnyizọn lọ.—Owalọ 20:24.
4. Naegbọn mí dona nọ yí whenu zan nado lẹnnupọndo apajlẹ dagbe he yẹwhegán Jehovah tọn lẹ zedai ji?
4 Whedepopenu he hiẹ hia otàn yẹwhegán Jehovah tọn de tọn, hiẹ na mọaleyi eyin a nọ yí nukun homẹ tọn do mọ dewe to nujijọ lọ lẹ mẹ. Nọ kanse dewe dọ: ‘Nawẹ yẹn na ko yinuwa do to ninọmẹ enẹ mẹ? Nawẹ n’sọgan do jẹhẹnu dagbe etọn lẹ hia to gbẹzan ṣie mẹ gbọn?’ (Heb. 6:11, 12) To nukọn mẹ, hosọ devo lẹ na tọ́n to Lizọnyizọn Ahọluduta Tọn Mítọn mẹ bo na dọhodo jẹhẹnu họakuẹ devo lẹ ji, ehe yẹwhegán nugbonọ Jehovah tọn lẹ ze apajlẹ etọn dai bọ mílọsu sọgan hodo.