Dotoai bo Plọnnu
1. Naegbọn e sọgan biọ vivẹnudido vonọtaun to mí si nado dotoai bo plọnnu to plidopọ agbegbe tọn lọ ji?
1 To madẹnmẹ, plidopọ agbegbe 2013 tọn lẹ na bẹjẹeji. Azọ́n susu ko yin wiwà nado wleawuna tito-to-whinnu de he na zinnudo nuhudo he mí tindo lẹdo aihọn pé to agọe lẹ ji. Be hiẹ ko basi tito nado tin to plidopọ agbegbe tọn lọ ji na azán atọ̀n lọ lẹpo ya? E yọnbasi dọ ayihafẹsẹnamẹnu susu ni tin to plidopọ daho mọnkọtọn lẹ ji, enẹwutu e sọgan biọ vivẹnudido taun nado na ayidonugo sọwhiwhe tọn tito-to-whinnu lọ. To whenuena e yindọ adà tito-to-whinnu lọ tọn lẹ nọ dite hugan opli agun tọn lẹ, e nọ biọ vivẹnu susu dogọ nado na ayidonugo tito-to-whinnu lọ blebu. Humọ, gbejizọnlin po ninọmẹ devo lẹ po sọgan zọ́n bọ agbọ́ na pé mí. Etẹwẹ na gọalọna mí nado gbọṣi aṣeji nado sọgan dotoai bo plọnnu?—Deut. 31:12.
2. Nawẹ mí sọgan wleawudaina ahun mítọn na tito-to-whinnu plidopọ lọ tọn gbọn?
2 Jẹnukọnna Plidopọ Agbegbe Tọn Lọ: Tito-to-whinnu plidopọ agbegbe tọn lọ tọn tin to nọtẹn Intẹnẹt tọn mítọn www.pr2711.com ji, bo bẹ hosọ hodidọ lọ lẹpo tọn gọna wefọ tangan dopo kavi awe he ji hosọ lọ lẹ dopodopo sinai do hẹn. Eyin mí nọ zan Intẹnẹt, nudọnamẹ enẹlẹ gbigbejepọn jẹnukọn na gọalọna mí nado wleawudaina ahun mítọn na hodidọ he na yin zizedonukọnna mí lẹ. (Ẹzla 7:10) To sinsẹ̀n-bibasi whẹndo tọn mìtọn whenu, be e ma na yọ́n dọ mì ni de whenu dovo nado dọhodo tito-to-whinnu plidopọ lọ tọn ji, na hagbẹ whẹndo lọ tọn lẹpo nido to nukọnpọnhlan plidopọ lọ ya?
3. Etẹwẹ na gọalọna mí nado dotoai po sọwhiwhe po?
3 To Tito-to-Whinnu lọ Whenu: Eyin e yọnbasi, e na yọ́n dọ hiẹ ni yì doafọai kavi hú adọ́ whẹpo tito-to-whinnu lọ nido bẹjẹeji. Ṣí alokan apòmẹ tọn towe na oylọ po wekanhlanmẹ alokan ji tọn lẹ po nikaa fẹayihasẹna we, kavi dọ hiẹ ni yin whiwhlepọn nado kanwehlan mẹdevo lẹ to alokan towe ji to whenue tito-to-whinnu lọ to yìyì to alọnu. Eyin e biọ dọ alokan towe ni gbọṣi titá, ze e do ninọmẹ de mẹ he ma na fẹayihasẹna mẹdevo lẹ eyin vlavo mẹde wá ylọ we. Eyin hiẹ to ọdinatẹẹ apòmẹ tọn kavi nuyizan mọnkọtọn devo de zan to tito-to-whinnu lọ whenu, yí i zan to aliho he ma na fẹayihasẹna mẹdevo lẹ mẹ. Dapana dùdù po nùnù po to whenue tito-to-whinnu lọ to yìyì to alọnu. (Yẹwh. 3:1) Ze ayidonugo towe lẹpo do hodọtọ lọ ji. To whenue hodọtọ lẹ to wefọ de hia, nọ hodo yé to Biblu towe mẹ. Nọ basi kandai kleunkleun lẹ.
4. Nawẹ mẹjitọ lẹ sọgan gọalọna ovi yetọn lẹ nado dotoai bo plọnnu gbọn?
4 Mí jlo dọ ovi mítọn lẹ lọsu ni dotoai bo plọnnu. Howhinwhẹn lẹ 29:15 dọmọ: “Ovi he yè jodo na ede, na dowinyan onọ̀ etọn.” Enẹwutu, nuyọnẹnnu wẹ e yin dọ hagbẹ whẹndo tọn lẹ ni sinai dopọ, na mẹjitọ lẹ nido sọgan hẹn ẹn diun dọ ovi yetọn lẹ to todoaina tito-to-whinnu lọ bo ma to hodọ, ma to wekanhlan mẹdevo lẹ to alokan ji, kavi ma to sadi pé. Eyin ovi lọ lẹ ma tlẹ ko whẹ́n sọmọ nado mọnukunnujẹ hodidọ lọ lẹ mẹ, mẹjitọ lẹ sọgan gọalọna yé nado gbọṣi nukle podọ nado sinai whii.
5. Naegbọn e do yin alenu nado vọ́ dogbapọnna tito-to-whinnu lọ, podọ nawẹ mí sọgan wàmọ gbọn?
5 To Vivọnu Tito-to-Whinnu Azán Dopodopo Tọn: Ma nọ nukle gbau to zánmẹ blo, kakatimọ nọ yawu mlọnai nado gbọjẹ ganji. Nulinlẹnpọn do nuhe a sè lẹ ji na gọalọna we ma nado yawu wọn yé. Enẹwutu, alenu wẹ e na yin nado nọ yí nukunwhiwhe kleun delẹ zan nado dọhodo tito-to-whinnu lọ ji to whẹndo mẹ to vivọnu azán dopodopo tọn ji. Eyin a yì núdùdù-satẹn de po họntọn towe lẹ po, naegbọn hiẹ ma na ze wema he ji a basi kandai do bo dọhodo nuagokun dopo kavi awe he a duvivi etọn taun lẹ ji hẹ yé? To whenue mì lẹkọyi whégbè to plidopọ lọ godo, mì sọgan de whenu dovo to sinsẹ̀n-bibasi whẹndo tọn mìtọn whenu nado dọhodopọ do lehe whẹndo mìtọn sọgan yí nudọnamẹ lọ lẹ do yizan mẹ do ji. Humọ, mì sọgan nọ de whenu dovo to sẹmẹsẹmẹ nado gbadopọnna adà owe yọyọ depope he yin didetọn to plidopọ lọ ji tọn.
6. Be plidopọ lọ yìyì kẹdẹ ko pé wẹ ya? Basi zẹẹmẹ.
6 Tito jonọ-yíyí tọn de nọ jẹ lẹndai etọn kọ̀n kiki eyin jonọ lọ lẹ dù núdùdù he yin didà lọ lẹ bọ núdùdù lọ lẹ sọ wà dagbe na agbasa yetọn. Nudopolọ wẹ gando núdùdù gbigbọmẹ tọn he na yin zizedonukọnna mí to plidopọ agbegbe tọn lọ ji go. Enẹwutu, mì gbọ mí ni mọ ale gigọ́ yí sọn adà tito-to-whinnu lọ tọn dopodopo mẹ gbọn plidopọ lọ yìyì na azán atọ̀n lọ lẹpo, todidoai po sọwhiwhe po, gọna nuhe mí plọn lẹ yíyí-do-yizan mẹ dali.