“Pli Gbẹtọ Lẹ”
1. Kanṣiṣa tẹwẹ plidopọ vonọtaun he Islaelivi lẹ basi ojlẹ vude to whenue yé tọ́n sọn Egipti godo tindo hẹ plidopọ agbegbe po akọjọpli tọn lẹ po?
1 Ojlẹ vude to whenue Islaelivi lẹ tọ́n sọn Egipti godo, Jehovah na anademẹ Mose nado “pli gbẹtọ lẹ” do Osó Sinai kọ̀n na yé nido sè ohó Emitọn nado sọgan nọ dibusi Emi bo nọ plọn aliho Emitọn lẹ ovi yetọn lẹ. (Deut. 4:10-13) Lehe ojlẹ enẹ na ko yin ojlẹ vonọtaun de bo na ko hẹn yise yetọn lodo do sọ! To madẹnmẹ, omẹ Jehovah tọn lẹ na basi plidopọ agbegbe po akọjọpli tọn lẹ po nado sọgan yin pinplọn gbọn Jehovah dali. Etẹwẹ mí dona wà nado mọaleyi sọn plidopọ enẹlẹ mẹ to gigọ́ mẹ?
2. Etẹwẹ mí dona wà nado ‘wleawudai’ na plidopọ agbegbe tọn mítọn?
2 ‘Wleawudai’: Jehovah degbena Islaelivi lẹ nado ‘wleawudai’ na plidopọ ayidego tọn he yé na basi to Osó Sinai kọ̀n enẹ. (Eks. 19:10, 11) Mọdopolọ, mẹhe na yì plidopọ agbegbe tọn lọ lẹpo wẹ dona yí sọwhiwhe do wleawu, e ma yin mẹhe na tindo mahẹ to tito-to-whinnu lọ mẹ lẹ kẹdẹ gba. Di apajlẹ, mẹsusu wẹ dona basi tito nado biọgbè to azọ́nmẹ. Vlavo ninọmẹ towe sọgan taidi Nẹhemia tọn nkọ. Ewọ jlo na jo azọ́n he e nọ wà taidi kọfo-hẹntọ Ahọlu Altakẹlikesi tọn do nado sọgan yì Jelusalẹm bo gọalọ to adó tòdaho lọ tọn lẹ vivọgbá mẹ, ṣigba e yọnẹn dọ ahọlu lọ sọgan gbẹ́. Nẹhemia hodẹ̀, podọ enẹgodo yí adọgbigbo do biọgbè ahọlu lọ po sisi po. Ahọlu lọ na ẹn gbè nado yì bo tlẹ sọ nọgodona tito họ̀gbigbá tọn lọ. (Nẹh. 2:1-9) Gbọnvona dọ a dona biọgbè ogán towe, be a ko basi tito gbejizọnlin lọ po fie a na nọ po tọn ya? Homẹ mẹho lẹ tọn na hùn nado gọalọna mẹdepope he tindo nuhudo. Basi tito nado wá adà tito-to-whinnu lọ tọn dopodopo domẹwhenu, bosọ wleawufo nado “na ayidonugo vonọtaun” nuhe a na sè lẹ.—Heb. 2:1.
3. Etẹwẹ na gọalọna mí nado wleawuna ahun mítọn jẹnukọnna plidopọ lọ?
3 Adà titengbe devo he awuwledai mítọn bẹhẹn wẹ nado wleawuna ahun mítọn nado sọgan dotoai bo plọnnu. (Ẹzla 7:10) Tito-to-whinnu plidopọ lọ tọn na yin zizedo nọtẹn Intẹnẹt tọn jw.org ji jẹnukọn bo na bẹ todohukanji hosọ hodidọ lẹpo tọn gọna wefọ dopo kavi awe he nọgodona yé lẹ hẹn. Ehe yin azọ́nwanu vonọtaun de he sọgan yin yiyizan to sinsẹ̀n-bibasi whẹndo tọn whenu to osẹ he jẹnukọnna azán plidopọ tọn mìtọn lẹ mẹ. Wẹnlatọ delẹ nọ yí tito-to-whinnu lọ sọn nọtẹn lọ ji bo nọ yí i zan nado basi kandai kleunkleun lẹ to plidopọ lọ whenu.
4. Nawẹ mẹjitọ lẹ sọgan yí dotẹnmẹ hundote plidopọ lọ tọn zan nado plọn ovi yetọn lẹ gbọn?
4 ‘Plọn Ovi Towe Lẹ’: Dopo to lẹndai titengbe plidopọ he Islaelivi lẹ basi to Osó Sinai kọ̀n tọn lẹ mẹ wẹ yindọ mẹjitọ Islaelivi lẹ nido sọgan “plọn ovi yetọn lẹ.” (Deut. 4:10) Plidopọ agbegbe tọn lọ na hùn dotẹnmẹ vonọtaun dote na mẹjitọ lẹ nado wà nudopolọ. Mẹjitọ lẹ dona sinai dopọ hẹ ovi yetọn lẹ to tito-to-whinnu lọ whenu bo gọalọna yé nado dotoai ganji. To vivọnu azán dopodopo tọn, whẹndo lẹ sọgan dọhodopọ do plidopọ lọ ji, podọ yé sọ sọgan wàmọ to nukọn mẹ to sinsẹ̀n-bibasi whẹndo tọn whenu.
5. Ale tẹwẹ plidopọ he ja lọ yìyì na hẹnwa na mí?
5 Plidopọ vonọtaun he Islaelivi lẹ basi to Osó Sinai kọ̀n gọalọna yé nado yọ́n pinpẹn lẹblanulọkẹyi vonọtaun he yé tindo nado yin omẹ Jiwheyẹwhe tọn lẹ tọn. (Deut. 4:7, 8) Plidopọ agbegbe tọn mítọn he ja yin awuwlena nado hẹn ale wá na mí to aliho dopolọ mẹ. Na azán atọ̀n, mí na penugo nado nọla na aihọn ylankan Satani tọn ehe bo duvivi kọfanamẹ gbigbọmẹ tọn po gbẹdohẹmẹ mẹjlọdote tọn po tọn to paladisi gbigbọmẹ tọn mítọn mẹ. (Isa. 35:7-9) Dile azán Jehovah tọn to dindọnsẹpọ, mì gbọ mí ni ma gbẹkọ dotẹnmẹ hundote he mí tindo nado pli dopọ bo na tuli ode awetọ mítọn lẹ go blo!—Heb. 10:24, 25.