Mẹnu lẹ Wẹ Na Tindo Ojlo to Hosọ Ehe Mẹ?
1. To whenue mí to vọkan linlinnamẹwe tọn mítọn lẹ hia, etẹ ji wẹ mí dona nọ lẹnnupọndo, podọ etẹwutu?
1 Atọ̀họ̀-Nuhihọ́ lọ Tọn po Réveillez-vous! po nọ yin awuwlena sọgbe hẹ nuhudo gbẹtọ lẹ tọn lẹdo aihọn pé. Enẹwutu, hosọ he yé nọ bẹhẹn lẹ nọ dọhodo onú voovo lẹ ji. To whenue mí to hosọ dopodopo hia to vọkan mítọn titi mẹ, mí dona nọ lẹnnupọndo mẹhe sọgan tindo ojlo to hosọ enẹlẹ dopodopo mẹ lẹ ji bo dovivẹnu nado ze e donukọnna yé.
2. Hosọ he sọawuhia to linlinnamẹwe mítọn lẹ mẹ tẹlẹ mẹ wẹ gbẹtọ lẹ sọgan tindo ojlo te taun?
2 Be hiẹ po azọ́nwatọgbẹ́ towe de po ko dọhodo hosọ Biblu tọn de ji he wá sọawuhia to Atọ̀họ̀-Nuhihọ́ lọ Tọn agọe tọn mẹ ya? Be a doayi hosọ de go he dọhodo gbẹzan whẹndo tọn ji ehe sọgan gọalọna hẹnnumẹ towe de ya? Be mẹyọnmẹ towe de to tito basi nado yì otò de mẹ, ehe go Réveillez-vous! de ko donù ya? Be ajọwhé kavi azọ́nwhé ahọlu tọn tangan delẹ na tindo ojlo to linlinnamẹwe lọ lẹ de mẹ to aigba-denamẹ mìtọn ji ya? Di apajlẹ, linlinnamẹwe he dọhodo avùnnukundiọsọmẹnu he yọnnu lẹ nọ pehẹ lẹ ji sọgan fọnjlodotena yọnnu lẹ taun. Osẹ́n-zọ́nwatọ lẹ sọgan tindo ojlo to linlinnamẹwe he dọhodo sẹ́nhẹngba ji de mẹ.
3. Dọ numimọ de he dohia dọ nujọnu wẹ e yin nado nọ ze linlinnamẹwe he mí mọdọ e na fọnjlodotena omẹ tangan delẹ donukọnna yé.
3 Ale Lẹ: To Afrique du Sud, asu po asi po de he yin Kunnudetọ lẹ tẹkan hlan wehọmẹ 25 to aigba-denamẹ agun yetọn tọn ji to whenue yé mọ Réveillez-vous! octobre 2011 yí godo, ehe hosọ etọn yin “Faites de vos enfants des adultes responsables,” (Plọn ovi towe lẹ nado lẹzun mẹho he whèwhín lẹ). Wehọmẹ 22 wẹ kẹalọyi linlinnamẹwe lọ lẹ bo má yé na wehọmẹvi yetọn lẹ. To otò dopolọ mẹ, asu po asi po devo tindo linlẹn dopolọ bo do vọkan lọ lẹ gbonu to wehọ he to aigba-denamẹ yetọn ji lẹ mẹ. To dopo to wehọ enẹlẹ mẹ, mẹplọntọ delẹ de nado yí linlinnamẹwe lọ zan nado plọnnu wehọmẹvi yetọn lẹ. Asu po asi po lọ dọ numimọ yetọn na nugopọntọ lẹdo tọn de. Enẹwutu, e na tuli agun he to lẹdo etọn mẹ lẹ nado má linlinnamẹwe lọ to wehọ he to aigba-denamẹ yetọn ji lẹ mẹ. Nuzinzọn he yin bibasi hlan wekantẹn alahọ tọn sù sọmọ bọ vọkan linlinnamẹwe lọ tọn susu dona yin zinzinjẹgbonu dogọ.
4. Naegbọn mí nọ jlo na má linlinnamẹwe lẹ na gbẹtọ susu dile e na yọnbasi do?
4 Linlinnamẹwe mítọn lẹ nọ tá hinhọ́n do nuhe nujijọ alọnu tọn lẹ zẹẹmẹdo ji bo nọ zinnudo Biblu po Ahọluduta Jiwheyẹwhe tọn po ji. Linlinnamẹwe devo depope ma tin to aigba ji he ‘nọ dọho whlẹngán tọn.’ (Isa. 52:7) Enẹwutu, ojlo mítọn wẹ nado nọ má yé na gbẹtọ susu dile e na yọnbasi do. Dopo to nuhe na gọalọ lẹ mẹ wẹ nado nọ kanse dewe dọ, ‘Mẹnu lẹ wẹ na tindo ojlo to hosọ ehe mẹ?’