Be A Wleawufo Nado Nọ Diọalọ Ya?
1. Na ninọmẹ aihọn lọ tọn nọ to didiọ wutu, adà tẹlẹ mẹ wẹ mí dona nọ basi vọjlado te?
1 To 1 Kọlintinu lẹ 7:31 mẹ, Biblu dohia dọ ninọmẹ aihọn lọ tọn nọ to didiọ. Enẹwutu, sọn ojlẹ de mẹ jẹ devo mẹ, e nọ biọ dọ mí ni basi vọjlado delẹ gando aliho yẹwhehodidọ tọn mítọn lẹ, tito mítọn lẹ po nuzedonukọnnamẹ mítọn lẹ po go. Be a wleawufo nado nọ diọalọ ya?
2. Naegbọn titobasinanu Jehovah tọn hihodo afọsu-afọsi nọ biọ dọ mí ni nọ diọalọ?
2 Aliho Yẹwhehodidọ Tọn Lẹ: Agun Klistiani tọn ko nọ saba diọalọ. To whenue Jesu do devi etọn lẹ hlan to tintan whenu, e dọna yé ma nado hẹn aglò núdùdù tọn kavi akuẹ do sẹgẹ yetọn lẹ mẹ blo. (Mat. 10:9, 10) Ṣigba, to nukọn mẹ, ewọ wá basi vọjlado delẹ gando nudọnamẹ enẹlẹ go, na e yọnẹn dọ devi emitọn lẹ na wá pehẹ nukundiọsọmẹ podọ azọ́n yẹwhehodidọ tọn lọ dona dlẹnkan yì awà devo lẹ ji wutu. (Luku 22:36) To owhe susu he wayi lẹ gblamẹ, titobasinanu Jehovah tọn ko yí aliho yẹwhehodidọ tọn voovo lẹ zan—taidi kalti kunnudide tọn lẹ, yẹwhehodidọ to ladio ji, podọ yẹwhehodidọ sọn mọto he yin awuwlena po azọ́nwanu gbèzeyiaga tọn lẹ po mẹ—sọgbe hẹ nuhudo ojlẹ dopodopo tọn. To egbehe, na e nọ vẹawu to fisusu nado mọ gbẹtọ lẹ to whégbè to whenue mí to yẹwhehodọ sọn whédegbè jẹ whédegbè wutu, mí ko mọ ayinamẹ yí whlasusu nado nọ tindo mahẹ to kunnudide gbangba tọn po kunnudide mayin aṣa tọn po mẹ ga. Mí ko sọ yin tulina nado nọ dọyẹwheho sọn whédegbè jẹ whédegbè to whèjai lẹ nado sọgan mọ whétọ he yè ma nọ mọ to whégbè to okle lẹ. Be hiẹ nọ hodo awhàn-kẹkẹ olọn mẹ tọn Jehovah tọn afọsu-afọsi sọgbe hẹ fie e lilẹ́ pànta ya?—Ezek. 1:20, 21.
3. Nawẹ alọdidiọ nọ gọalọna mí nado tindo kọdetọn dagbe dogọ to aigba-denamẹ mítọn ji gbọn?
3 Nuzedonukọnnamẹ Towe: Etẹlẹ wẹ to ahunmẹduna mẹhe tin to aigba-denamẹ mìtọn ji lẹ to azánvi ehelẹ mẹ? Be nuhahun akuẹ tọn wẹ ya? Nuhahun whẹndo tọn lẹ wẹ ya? kavi danuwiwa? Alenu wẹ e nọ yin nado yọ́n nuhahun voovo he gbẹtọ lẹ to pipehẹ to aigba-denamẹ mítọn ji po ninọmẹ he yé nọ pehẹ to paa mẹ lẹ po, na enẹ nọ gọalọna mí nado wleawuna nuzedonukọnnamẹ he sọgbe hẹ ninọmẹ yetọn lẹ. (1 Kọl. 9:20-23) To whenue whétọ lẹ dọ ahunmẹdunamẹnu yetọn na mí, kakati nado nọ na yé gblọndo mọmọ tọn de bo zindonukọn po nuzedonukọnnamẹ he mí ko wleawuna lọ po, nuhe na yọ́n hugan wẹ nado nọ diọalọ bo nọ ze nuzedonukọnnamẹ mítọn sinai do ahunmẹdunamẹnu yetọn ji.
4. Naegbọn mí ma dona dọngbàn nado nọ diọalọ?
4 To madẹnmẹ, aihọn ehe na wá opodo bọ nukunbibia daho lọ na bẹjẹeji. “Gli wẹ ojlẹ he pò lọ.” (1 Kọl. 7:29) Enẹwutu, nujọnu taun wẹ e yin dọ mí ni nọ diọalọ bosọ nọ wàmọ matin gbàndindọn. Gbọnmọ dali, mí na penugo nado gọalọna mẹsusu dogọ to ojlẹ gli he pò ehe mẹ.