Hẹn Lizọnyizọn Towe Pọnte—Ojlo Nujọnu Tọn Tintindo to Whétọ lẹ Mẹ
Nuhewutu E Do Yin Nujọnu: Jesu nọ na ayidonugo gbẹtọvi lẹ dopodopo bo nọ tindo ojlo nujọnu tọn to yé mẹ. Di apajlẹ to ninọmẹ de mẹ, Jesu na ko doayi e go dọ winyan to dawe nukuntọ́nnọ lọ hù. Enẹ wẹ zọ́n bọ e dọ̀n ẹn jẹ olá sọn fie gbẹtọgun lẹ te whẹpo do hẹnazọ̀ngbọna ẹn. (Malku 7:31-35) E nọ hò devi etọn lẹ tọn pọ́n bo ma nọ plọn yé nususu zẹjlẹgo, na e yọ́n dogbó yetọn lẹ wutu. (Joh. 16:12) Mahopọnna dọ Jesu tin to otẹn gigonọ de mẹ to olọn mẹ, e gbẹ́ nọ tindo ojlo nujọnu tọn to gbẹtọ lẹ mẹ. (2 Tim. 4:17) Na mí yin hodotọ Klisti tọn lẹ wutu, mí dona hodo apajlẹ etọn. (1 Pita 2:21; 1 Joh. 3:16, 18) Podọ, mí na tindo kọdetọn dagbe dogọ to lizọnyizọn mítọn mẹ eyin mí nọ hò whétọ lẹ tọn pọ́n bo nọ hẹn ninọmẹ dopodopo yetọn lẹ tọn, hosọ he mẹ yé tindo ojlo te po ahunmẹdunamẹnu yetọn lẹ po do ayiha mẹ. Eyin whétọ lọ doayi e go dọ mí tindo ojlo nujọnu tọn to emi mẹ bọ yanwle mítọn ma yin nado lá owẹ̀n de poun kavi nado ze owe mítọn lẹ namẹ, enẹ sọgan whàn ẹn nado dotoaina mí.
Lehe Mí Sọgan Wàmọ Do:
• Nọ wleawu ganji. Voawu, konu yẹsẹ, bo jọmẹ.
• Nọ doayinugo. Be a mọ nude he dohia dọ mẹlọ tindo ovi lẹ ya? dọ e yiwanna vounvoun kavi whékanlin lẹ ya? kavi be a mọ nude he do sinsẹ̀n he mẹlọ nọ yì hia ya? Enẹ sọgan gọalọna we nado diọalọ na homẹbibiọ towe sọgbe hẹ ninọmẹ etọn.
• Nọ kàn linlẹn whétọ lọ tọn biọ, bo nọ yí sọwhiwhe do dotoaina ẹn kakati nado gbòhódonù na ẹn. Nọ pọ́n whétọ lọ nado dohia dọ a to todoaina ẹn. Nọ dohia dọ a yọ́n pinpẹn nuhe e dọ lẹ tọn, bosọ nọ pà ẹ eyin e biọ domọ. Ma nọ dọnnu blo.
• Nọ diọalọ. Eyin e biọ domọ, nọ diọalọ na nuzedonukọnnamẹ towe sọgbe hẹ nuhe to ahunmẹduna mẹlọ. Ehe sọgan bọawu hugan nuhe a lẹn, na hosọ voovo lẹ ji wẹ alọnuwe pẹvi, alọnuwe, po linlinnamẹwe mítọn lẹ po nọ dọhodo. Eyin a mọdọ ojlẹ he mẹ a wá whétọ lọ dè ma yọ́n na ẹn, vlavo na alọnu etọn ján wutu, hò etọn pọ́n bo nọ glido.
Tẹ́n Ehe Pọ́n to Osun lọ Mẹ:
• To sinsẹ̀n-bibasi whẹndo tọn mìtọn whenu kavi to lizọnyizọn lọ mẹ, nọ basi zepọn he biọ dọ wẹnlatọ de ni diọalọ na nuzedonukọnnamẹ etọn sọgbe hẹ nuhe whétọ de dọ.
• To opli sinsẹ̀nzọn kunnudegbe tọn delẹ whenu, mẹmẹsunnu he to anadena opli lọ sọgan dọhodo lehe mí na do ojlo nujọnu tọn hia whétọ lẹ do ji kavi basi wadohia voovo lẹ do adà ehe ji.