Adà de He Na Gọalọna Mí to Lizọnyizọn lọ Mẹ
1. Whẹwhinwhẹ́n awe tẹlẹ wutu wẹ adà lọ “Hodọdopọ hẹ Whétọ de” do nọ yin awuwlena?
1 Sọn ojlẹ de mẹ jẹ devo mẹ, adà lọ “Hodọdopọ hẹ Whétọ de” nọ sọawuhia to zinjẹgbonu mẹlẹpo tọn Atọ̀họ̀-Nuhihọ́ lọ Tọn mẹ. Whẹwhinwhẹ́n awe he wutu adà ehe do nọ yin awuwlena wẹ nado ze nuplọnmẹ Biblu tọn lẹ donukọnnamẹ to aliho he dọnmẹdogo de mẹ, podọ nado dohia mí lehe mí sọgan nọ yí zinzin do yihojlẹdohogo hẹ gbẹtọ lẹ do hosọ tangan delẹ ji do. (1 Pita 3:15) Nawẹ mí sọgan yí hosọ he nọ tọ́n to adà ehe mẹ lẹ zan po kọdetọn dagbe po gbọn?
2. Nawẹ mí sọgan yí adà ehe zan to lizọnyizọn mítọn mẹ gbọn?
2 Nọ Yí I Zan to Lizọnyizọn lọ Mẹ: A sọgan nọ ze vọkan Atọ̀họ̀-Nuhihọ́ lọ Tọn he bẹ adà ehe hẹn bo lán to asi we lẹ sẹdo. Eyin whétọ, jlodotọ kavi plọnmẹ Biblu de kàn kanbiọ de sè kavi fọ́n whẹho agọjẹdomẹ tọn de dote he ko yin hodọdeji to adà ehe mẹ, yí vọkan dopo na ẹn bo basi tito nado dọhodopọ hẹ ẹ do e ji. Eyin a ma tindo vọkan zinjẹgbonu he dọhodo hosọ lọ ji lọ tọn, a sọgan yí i sọn jw.org ji.
3. Nawẹ mí sọgan yí adà ehe do dọhodopọ hẹ whétọ de gbọn?
3 Nawẹ a sọgan yí adà ehe do dọhodopọ hẹ mẹde gbọn? Mẹdelẹ nọ biọ to mẹlọ si nado hia adà whétọ lọ tọn daga, bọ yewlẹ nọ hia adà Kunnudetọ lọ tọn. Aliho hodọdopọ tọn ehe yiyizan sọgan tindo kọdetọn dagbe, na e nọ gọalọna whétọ lọ nado gbadopọnna nuyise mítọn lẹ to aliho de mẹ bọ hodọdopọ lọ ma na lẹzun nudindọn.—Deut. 32:2.
4. Nawẹ mí sọgan yí adà ehe do plọnazọ́n mídelẹ gbọn?
4 Nọ Plọnazọ́n Dewe po Mẹdevo lẹ Po: To whenue a to adà ehe hia, nọ doayi wefọ lẹ, apajlẹ lẹ, po aliho hoyijlẹdohogo tọn lẹ po go. Nọ doayi aliho hodọhẹmẹ tọn lọ go. Enẹgodo, nọ wà nudopolọ to lizọnyizọn towe mẹ. (Howh. 1:5; 9:9) Mẹmẹyọnnu de dọmọ: “Adà ehe hihia nọ taidi nupinplọn sọn gbehosọnalitọ numimọnọ de dè, mẹhe nọ yọ́n nuhe e jẹ dọ ni dọ to ojlẹ dopodopo mẹ.”
5. Nawẹ mí sọgan gọalọna plọnmẹ Biblu mítọn lẹ nado wleawuna lizọnyizọn lọ gbọn?
5 Hiẹ sọgan sọ yí adà ehe zan nado gọalọna plọnmẹ Biblu towe lẹ nado nọ wleawuna lizọnyizọn lọ. Nọ hia adà lọ hẹ nuplọntọ lọ bo nọ dike ewọ ni yí adà he yin wẹnlatọ lọ tọn basi. Mọwiwà na gọalọna nuplọntọ towe lẹ nado nọ basi zepọn lehe yé na nọ do nuyise yetọn lẹ hia po zinzin po do tọn. (Kọl. 4:6) Na nugbo tọn, adà ehe yin dopo to aliho voovo he mẹ Jehovah nọ gọalọna mí nado “hẹn lizọnyizọn [mítọn] di to gigọ́ mẹ” te lẹ mẹ.—2 Tim. 4:5.