Hosọ Yọyọ Delẹ Nado Bẹ Plọnmẹ Biblu lẹ Jẹeji
1. Hosọ yọyọ tẹlẹ wẹ na sọawuhia to Atọ̀họ̀-Nuhihọ́ lọ Tọn gbonutọ lẹ tọn mẹ, podọ na lẹndai tẹ?
1 Hosọ yọyọ he na gọalọna mí nado bẹ plọnmẹ Biblu lẹ jẹeji delẹ na jẹ awusọhia ji to Atọ̀họ̀-Nuhihọ́ lọ Tọn gbonutọ lẹ tọn mẹ. Ehe na bẹjẹeji po zinjẹgbonu avril-juin tọn po. Hosọ etọn wẹ “Plọnnu sọn Ohó Jiwheyẹwhe Tọn Mẹ.” Na jide tọn, dile etlẹ yindọ mẹdelẹ na yiwanna nado nọ hia dopodopo hosọ ehelẹ tọn to aigba-denamẹ mítọn ji, hosọ lọ lẹ yin awuwlena titengbe nado nọ dọhodopọ hẹ whétọ lẹ.
2. Etẹwẹ yin delẹ to adà he hosọ ehelẹ bẹhẹn lẹ mẹ?
2 Adà He Hosọ lọ lẹ Na Bẹhẹn Lẹ: Hosọ po hóvila lọ lẹ po yin awuwlena taidi kanbiọ nado na dotẹnmẹ whétọ lẹ nado tindo mahẹ to hodọdopọ lọ mẹ. Na whétọ lẹ nido plọnnu sọn Ohó Jiwheyẹwhe tọn mẹ tlọlọ, wefọ tangan lẹ yin dide, ṣigba nuhe wefọ lọ lẹ bẹhẹn ma yin kinkan do hukan lọ lẹ mẹ. Hukan lọ lẹ whègli na yé nido sọgan yin dogbapọnna tlọlọ to họntonu. Hosọ dopodopo dlẹnalọdo owe Biblu Plọn Mí, ehe na gọalọna mí nado dlẹnkanna nupinplọn lọ biọ owe lọ mẹ eyin e yọnbasi.
3. To whenue mí to yẹwhehodọ sọn whédegbè jẹ whédegbè, nawẹ mí sọgan yí hosọ ehelẹ zan nado bẹ plọnmẹ Biblu de jẹeji to họntonu gbọn?
3 Lehe Mí Na Yí Yé Zan Do: To whenue hiẹ to linlinnamẹwe lẹ zedonukọnnamẹ, a sọgan kàn kanbiọ ojlofọndotenamẹ tọn de sè do linlẹn tangan hosọ lọ tọn ji. Di apajlẹ, zinjẹgbonu avril-juin tọn dọhodo nuhọakuẹ-yinyin Biblu tọn ji. Hiẹ sọgan kanse dọ: “Be hiẹ nọ pọ́n Biblu hlan taidi Ohó Jiwheyẹwhe tọn ya kavi taidi owe dagbe de poun? [Jotẹnna gblọndo.] N’tindo onú titengbe de he n’jlo na dohia we do hosọ ehe ji.” Dlẹnalọdo kanbiọ tintan lọ bo hia hukan tintan bosọ hia wefọ he yin dide lọ. Vọ́ kanbiọ lọ hia bo biọ to whétọ lọ si nado na gblọndo. Gbadopọnna hukan devo lẹ dogọ eyin e yọnbasi, bo yí kanbiọ hukan lọ lẹ tọn zan na hodọdopọ. Whẹpo hiẹ na tọ́n sọn finẹ, dọ́n ayidonugo etọn wá kanbiọ he bọdego ji bo basi tito dagbe nado lẹkọyi bo dọhodeji hẹ ẹ. Nọ lẹkọyi to sẹmẹsẹmẹ nado gbadopọnna hukan devo lẹ hẹ ẹ kakajẹ whenue a na hẹn zinjẹgbonu he bọdego wá na ẹn. Aliho devo wẹ nado ze plọnmẹ Biblu donukọnna whétọ lọ tlọlọ. Enẹgodo, yí hosọ linlinnamẹwe lọ tọn zan nado do lehe oplọn de nọ yin bibasi do hia ẹ.
4. Nawẹ mí sọgan yí hosọ ehelẹ zan to whenue mí to gọyìpọn lẹ basi gbọn?
4 Hiẹ sọgan sọ yí hosọ yọyọ ehelẹ zan po kọdetọn dagbe po to aliho linlinnamẹwe mimá tọn po gọyìpọn towe devo lẹ po mẹ. Hiẹ sọgan dọ poun dọ: “Adà yọyọ de tin to Atọ̀họ̀-Nuhihọ́ lọ Tọn mẹ todin. Gbọ ma do lehe e nọ yin yiyizan do hia we.” Odẹ̀ mítọn wẹ yindọ hosọ yọyọ ehelẹ na gọalọna mẹsusu nado “wá oyọnẹn he pegan nugbo tọn kọ̀n.”—1 Tim. 2:4.