Lehe A Sọgan Wleawuna Homẹbibiọ Kọdetọn Dagbenọ lẹ Do
1. Naegbọn homẹbibiọ kọdetọn dagbenọ de do yin nujọnu?
1 Kẹdẹdile owán dagbe núdùdù de tọn nọ zọ́n bọ mẹde nọ to jejeji nado dù núdùdù lọ do, mọ wẹ homẹbibiọ dagbe nọ hùn dotẹnmẹ dote nado dọhodopọ do Biblu ji do niyẹn. Homẹbibiọ kọdetọn dagbenọ lẹ sọgan nọ gbọnvo na nuhe dù tedidi po nudọnamẹ he yé bẹhẹn lẹ po, etomọṣo, homẹbibiọ mọnkọtọn lẹ nọ biọ nulinlẹnpọn po awuwiwle po jẹnukọn dile e nọ yindo na núdùdù vivi de didà. (Howh. 15:28) Etẹwẹ nọ hẹn homẹbibiọ de yin kọdetọn dagbenọ?
2. Nawẹ mí sọgan wleawuna homẹbibiọ ojlofọndotenamẹ tọn de gbọn?
2 Nọ De Hosọ Ojlofọndotenamẹ Tọn Lẹ: Eyin homẹbibiọ mítọn ma fọnjlodotenamẹ, whétọ lọ sọgan doalọtena hodọdopọ lọ. Enẹwutu to whenue a to awuwle, nọ lẹnnupọndo nuhe sọgan fọnjlodotenamẹ to aigba-denamẹ lọ ji lẹ ji. Be mẹhe tin to aigba-denamẹ lọ ji lẹ nọ tindo ojlo to gandudu dagbe, gbẹzan whẹndo tọn ayajẹnọ, kavi lehe awhàn na wá vivọnu do mẹ ya? To paa mẹ, gbẹtọ lẹ nọ jlo nado dọ pọndohlan yetọn, enẹwutu, nọ wleawuna kanbiọ mẹhẹnlẹnnupọn tọn lẹ. Be a sọgan de homẹbibiọ de sọn Lizọnyizọn Ahọluduta Tọn Mítọn mẹ bo yí i zan sọgbe hẹ ninọmẹ aigba-denamẹ towe tọn ya? Be e ma na yọ́n dọ a ni nọ yí delẹ to nuzedonukọnnamẹ lọ lẹ mẹ zan nado basi zepọn to sinsẹ̀n-bibasi whẹndo tọn towe whenu sọn ojlẹ de mẹ jẹ devo mẹ ya?
3. Nawẹ mí sọgan nọ hẹn homẹbibiọ mítọn sọgbe hẹ aṣa po sinsẹ̀n mẹhe tin to aigba-denamẹ mítọn ji lẹ po tọn gbọn?
3 Nọ Lẹnnupọndo Aṣa po Sinsẹ̀n Whétọ lọ Tọn po Ji: To lẹdo delẹ mẹ, whétọ lẹ nọ donukun dọ mí ni yì nuhe hẹn mí wá lọ ji tlọlọ. To lẹdo devo lẹ mẹ, mẹmasi wẹ e nọ yin eyin jonọ de ma kàn dagbemẹninọ whédo lọ tọn biọ bo masọ do mẹhe ewọ yin hia whẹpo do jẹ nuhe hẹn ẹn wá lọ dọ ji. To awà delẹ ji, eyin gbẹtọ lẹ yin ṣọṣi-yitọ, enẹ nọ hẹn yọnbasi na mí nado yí Biblu zan po awuvivo po to homẹbibiọ mítọn mẹ. (Owalọ 2:14-17) Ṣigba, to fie mẹhe ma tin to sinsẹ̀n Klistiani tọn mẹ kavi mẹhe ma tin to sinsẹ̀n depope mẹ lẹ nọ nọ̀, nuyọnẹnnu wẹ e na yin ma nado donù Biblu go to tintan whenu adavo to gọyìpọn whenu.—Owalọ 17:22-31.
4. Ayidonugo tẹwẹ mí dona na hodidọ bẹjẹeji tọn homẹbibiọ mítọn tọn?
4 Hodidọ Bẹjẹeji Tọn Lẹ: Nọ yí sọwhiwhe do wleawuna hodidọ bẹjẹeji tọn towe lẹ. E na yọ́n hugan dọ nuhe a na dọ ni nọ glido bo họnwun. Aliho he mẹ mí nọ dọ hodidọ bẹjẹeji tọn mítọn lẹ te sọ yin nujọnu taun. Nọ dọho po zohunhun po. Eyin a jọmẹ bo nọ konu yẹsẹ, enẹ na dohia dọ a tindo ojlo nujọnu tọn to whétọ lọ mẹ. Ayinamẹ ehelẹ hihodo na gọalọna mí nado nọ wleawuna homẹbibiọ kọdetọn dagbenọ lẹ he na whàn mẹhe to aigba-denamẹ mítọn ji lẹ nado wá dùnú to “tafo Jehovah tọn” ji.—1 Kọl. 10:21.