Hẹn Lizọnyizọn Towe Pọnte Dogọ—Awuwiwlena Homẹbibiọ Mítọn

Nuhewutu E Do Yin Nujọnu: Eyin homẹbibiọ mítọn ma fọnjlodotenamẹ, whétọ lọ sọgan doalọtena hodọdopọ lọ whẹpo mí na tlẹ do yì nuagokun lọ ji. Enẹwutu, wẹnlatọ susu nọ pọ́n homẹbibiọ yetọn hlan taidi adà titengbe hugan nuzedonukọnnamẹ yetọn lẹ tọn. Na nuzedonukọnnamẹ he nọ yin awuwlena do Lizọnyizọn Ahọluduta Tọn Mítọn po alọnuwe Zindonukọn to Hodọdopọ Biblu Tọn lẹ Mẹ po mẹ lẹ ma nọ bẹ homẹbibiọ gigọ́ hẹn to whepoponu wutu, enẹ na gọalọna mí nado nọ diọalọ. Eyin nuzedonukọnnamẹ de tlẹ bẹ homẹbibiọ gigọ́ hẹn, wẹnlatọ lẹ sọgan diọ ẹ do alọ yetọn ji kavi wleawuna yetọn titi. Gbọnmọ dali, mí na tindo kọdetọn dagbe dogọ eyin mí nọ yí sọwhiwhe do wleawuna homẹbibiọ mítọn lẹ kakati nado nọ dọ nudepope he wá tamẹ na mí poun to whenue mí jẹ whétọ de dè.—Howh. 15:28.

Lehe Mí Sọgan Wàmọ Do:

• Nọ de hosọ he ji a na dọhodo. Hosọ lọ dona sinai do owe he a jlo na zedonukọnnamẹ ji bosọ dona fọnjlodotena mẹhe to aigba-denamẹ mìtọn ji lẹ.

• Nọ yí sọwhiwhe do wleawuna nuhe a na dọ to whenue a na ko dọnudo whétọ lọ sọgbe hẹ aṣa lẹdo lọ tọn godo. A sọgan dọmọ: “N’wá mì dè na . . . ,” “Mẹsusu wẹ nọ yin ahunmẹduna gando . . . go,” “E na jlo mi nado yọ́n pọndohlan mìtọn gando . . . go,” po mọmọ po sọyi. Hodidọ he whègli bo bọawu lẹ nọ saba gọalọ taun. Wẹnlatọ delẹ nọ de nado plọn homẹbibiọ yetọn do tamẹ.

• Na whétọ lẹ nido sọgan tindo ojlo to hodọdopọ lọ mẹ, nọ wleawuna kanbiọ he na zọ́n bọ yé na dọ pọndohlan yetọn tọ́n lẹ. (Mat. 17:25) Flindọ, e sọgan ko to nulẹnpọn do whẹho devo lẹ ji whẹpo a do wá, enẹwutu kanbiọ towe ma dona gẹdẹ gbau kavi gbàhundona ẹn.

Tẹ́n Ehe Pọ́n to Osun lọ Mẹ:

• Mì de whenu dovo to sinsẹ̀n-bibasi whẹndo tọn whenu nado wleawuna homẹbibiọ mìtọn lẹ bo basi zepọn yetọn.

• To lizọnyizọn lọ mẹ, nọ dọ homẹbibiọ he a wleawuna lẹ na wẹnlatọ devo lẹ. (Howh. 27:17) Nọ diọ homẹbibiọ towe eyin e ma tindo kọdetọn dagbe.