Nọ Do Ojlo Hia to Azọ́nwatọgbẹ́ Towe Mẹ — WESẸDOTẸN INTẸNẸT JI TỌN Watchtower Tọn

Nọ Do Ojlo Hia to Azọ́nwatọgbẹ́ Towe Mẹ

1. Eyin mí to azọ́nwa po wẹnlatọ de po to lizọnyizọn lọ mẹ, nawẹ mí sọgan hodo apajlẹ apọsteli Paulu tọn gbọn?

¹ Apọsteli Paulu nọ pọ́n whenu he e nọ yizan hẹ yisenọ hatọ lẹ hlan taidi dotẹnmẹ hundote “tulinina ode awetọ” tọn. (Lom. 1:12) Eyin hiẹ po wẹnlatọ de po to azọ́nwa to lizọnyizọn lọ mẹ, be a nọ yí ojlẹ enẹ zan nado na ẹn tuli podọ nado gọalọna ẹn ya? Be e ma na yọ́n dọ a ni nọ dọhodopọ hẹ ẹ do nuhe gọalọna we nado yin wẹnlatọ kọdetọn dagbenọ de ji ya?

2. Nawẹ mí sọgan hẹn azọ́nwatọgbẹ́ mítọn deji to lizọnyizọn lọ mẹ gbọn, podọ naegbọn enẹ do yin nujọnu?

² Nọ Hẹn Ẹn Deji: Wẹnlatọ delẹ nọ dibu, podọ nukunmẹ kavi kọnugbè yetọn sọgan do enẹ hia. Mí sọgan hẹn yé deji, eyin mí nọ pà yé po ahundopo po. Aliho devo tẹlẹ mẹ wẹ mí sọgan sọ wàmọ te? Nugopọntọ tomẹyitọ de nọ saba dọ lehe ewọ lọsu nọ dibu do po lehe e nọ hodẹ̀ nado duto obu ji do po na azọ́nwatọgbẹ́ etọn. To whenue mẹmẹsunnu de to nuhe nọ gọalọna ẹn nado gboadọ dọ, e dọmọ: “N’nọ bẹjẹeji po nukiko yẹsẹ de po. To whedelẹnu, e nọ biọ dọ ma hodẹ̀ nado sọgan wàmọ.” Be nude ko gọalọna we nado duto obu ji to lizọnyizọn lọ mẹ ya? Dọ ẹ na azọ́nwatọgbẹ́ towe.

3. Nawẹ mí sọgan gọalọna azọ́nwatọgbẹ́ mítọn nado tindo kọdetọn dagbe dogọ to lizọnyizọn lọ mẹ gbọn?

³ Nọ Dọhodo Nuzedonukọnnamẹ Towe lẹ Ji: Be hiẹ ko doayi e go dọ homẹbibiọ kavi kanbiọ kleun de he gando nuhe jọ to lẹdo lọ mẹ de go yiyizan nado bẹ hodọdopọ jẹeji nọ tindo kọdetọn dagbe ya? Be hiẹ ko diọ nuzedonukọnnamẹ de do alọ towe ji bo yí i zan po kọdetọn dagbe po ya? Dọ ẹ na azọ́nwatọgbẹ́ towe. (Howh. 27:17) To whenue mì jei gọyìpọn towe de, a sọgan dọ nuhe yin yanwle towe gando gọyìpọn lọ go po lehe a jlo na jẹ e kọ̀n do po na ẹn. To plọnmẹ Biblu de godo, a sọgan dọ nuhewutu a yí nuagokun, wefọ, kavi aliho mẹpinplọn tọn de zan to oplọn lọ whenu na azọ́nwatọgbẹ́ towe.

4. Naegbọn mí dona nọ tindo ojlo to alọgigọna wẹnlatọ hatọ mítọn lẹ mẹ?

⁴ Gbọnvona dọ wẹndagbe-jlatọ owhe kanweko tintan tọn lẹ nọ tindo ojlo to alọgigọna mayisenọ lẹ mẹ, yé sọ nọ ylọ tulinina ode awetọ po yedelẹ hinhẹn lodo po dọ nujọnu. (Owalọ 11:23; 15:32) Apọsteli Paulu plọnazọ́n jọja Timoti bosọ na ẹn tuli nado má nuhe e plọn lẹ hẹ mẹdevo lẹ. (2 Tim. 2:2) Eyin mí ma nọ wọnji nado wà dagbe na Klistiani hatọ lẹ to lizọnyizọn lọ mẹ, mí na yidogọna ayajẹ po kọdetọn dagbe yetọn po bo nasọ hẹn homẹ Otọ́ olọn mẹ tọn mítọn tọn hùn.—Heb. 13:15, 16.