Hẹn Lizọnyizọn Towe Pọnte Dogọ—Alọgigọna Azọ́nwatọgbẹ́ Towe — WESẸDOTẸN INTẸNẸT JI TỌN Watchtower Tọn

Hẹn Lizọnyizọn Towe Pọnte Dogọ—Alọgigọna Azọ́nwatọgbẹ́ Towe

Nuhewutu E Do Yin Nujọnu: Jesu yọnẹn dọ nujọnu wẹ e yin nado nọ dọyẹwheho hẹ azọ́nwatọgbẹ́ de. Enẹwutu, to whenue e to devi etọn 70 lọ lẹ dohlan nado yì dọyẹwheho, e má yé awe awe. (Luku 10:1) Azọ́nwatọgbẹ́ de sọgan gọalọ to whenue wẹnlatọ hatọ etọn pehẹ nuhahun sinsinyẹn de kavi ma yọ́n lehe e na na gblọndo whétọ de do. (Yẹwh. 4:9, 10) E sọgan má numimọ etọn hẹ mẹhe po e po to azọ́nwa, podọ to whedelẹnu tlẹ sọgan na ayinamẹ de he na gọalọna mẹlọ nado lẹzun wẹnlatọ kọdetọn dagbenọ de. (Howh. 27:17) E sọ sọgan na tuli awetọ etọn gbọn hodidọ mẹjlọdote tọn lẹ dali dile yé tọ́n sọn ohọ̀n de kọ̀n jei devo kọ̀n.—Flp. 4:8.

Lehe Mí Sọgan Wàmọ Do:

• Nọ na ayidonugo azọ́nwatọgbẹ́ towe to whenue e to kunnude. (Jak. 1:19) To whenue e to wefọ de hia, nọ hodo e to Biblu towe mẹ. Enẹ na zọ́n bọ a na penugo nado gọalọna ẹn eyin e wá biọ domọ.

• Nọ yí wuntuntun zan nado yọ́n whenue e jẹ dọ a ni dọho. (Howh. 25:11) Eyin a hodo wẹnlatọ de yì plọnmẹ Biblu etọn, zẹẹmẹ towe lẹ sọn ojlẹ de mẹ jẹ devo mẹ na wà dagbe taun. Etomọṣo, eyin mì to yẹwhehodọ sọn whédegbè jẹ whédegbè, azọ́nwatọgbẹ́ towe na jlo dọ a ni na emi dotẹnmẹ nado dọho eyin ewọ wẹ to nuzedonukọnnamẹ basi. Eyin wẹnlatọ yọyọ de wẹ, kavi dọ ewọ ma yọ́n lehe e na na gblọndo na kanbiọ kavi agọjẹdonu de do, e họnwun dọ e na yọ́n pinpẹn alọgọ towe tọn taun. Ṣigba, eyin a to azọ́nwa hẹ wẹnlatọ de to lizọnyizọn whédegbè jẹ whédegbè tọn, gọyìpọn kavi plọnmẹ Biblu de whenu, ma nọ gbòhódonù na ẹn kavi bẹ hosọ devo pete jẹeji blo.

• Nọ má numimọ towe lẹ hẹ ẹ. To whedelẹnu, eyin a sọgan na ayinamẹ de he na gọalọna azọ́nwatọgbẹ́ towe nado tindo kọdetọn dagbe dogọ to lizọnyizọn lọ mẹ, ma whleawu nado wàmọ blo. (Howh. 3:27) To ojlẹ he sọgbe mẹ, a sọgan dọmọ: “Aliho devo tẹ wẹ a lẹndọ yè gán yizan?” kavi “Be n’sọgan na we ayinamẹ de ya?” kavi “Nuhe n’nọ tẹnpọn nado wà die.” Hẹn do ayiha mẹ dọ, dile etlẹ yindọ homẹ mẹdelẹ tọn nọ hùn nado mọ ayinamẹ yí to ninọmẹ delẹ mẹ, yé sọ sọgan yin hinhẹn gbọjọ eyin yè nọ to hodọdo nuṣiwa yetọn lẹpo ji na yé.

Tẹ́n Ehe Pọ́n to Osun lọ Mẹ:

• To azọ́nwiwa hẹ wẹnlatọ de to lizọnyizọn lọ mẹ godo, dọ nuhe ewọ dọ kavi wà bọ e gọalọna we taun na ẹn.