Aliho Yọ́n-Na-Yizan de Nado Bẹ Plọnmẹ Biblu lẹ Jẹeji
1. Naegbọn titobasinanu lọ to tulina mí sọn ojlẹ dindẹn die nado nọ ze linlinnamẹwe lẹ yì na mẹhe tindo aṣa nado nọ hia owe mítọn lẹ?
1 Mẹsusu wẹ ma nọ jlo dọ mí ni plọn Biblu hẹ yé, ṣigba yé nọ yiwanna linlinnamẹwe mítọn lẹ hihia. Enẹwutu, sọn ojlẹ dindẹn die gbọ́n wẹ titobasinanu Jehovah tọn to tulina wẹnlatọ lẹ nado nọ ze linlinnamẹwe osun dopodopo tọn yì na mẹhe tindo aṣa nado nọ hia owe mítọn lẹ. To paa mẹ, dile gbẹtọ lẹ to linlinnamẹwe mítọn lẹ hia whẹwhẹ, yé nọ wá wleawuna ojlo vẹkuvẹku na Ohó Jiwheyẹwhe tọn. (1 Pita 2:2) Dile ojlẹ to yìyì, yé sọgan wá hia nude he na whàn yé bọ yé na kẹalọyi plọnmẹ Biblu de.
2. Nawẹ mí sọgan hẹn ojlo mẹhe tindo aṣa nado nọ yí linlinnamẹwe mítọn lẹ tọn jideji gbọn?
2 Nọ “Húsinna” Okún Nugbo lọ Tọn Lẹ: Kakati nado nọ ze linlinnamẹwe lẹ na whétọ lọ poun bo lẹkọ, nọ tẹnpọn nado bẹ hodọdopọ de jẹeji bo wleawuna haṣinṣan de hẹ ẹ. Mọwiwà na gọalọna we nado yọ́n ninọmẹ etọn, nuhe mẹ e nọ tindo ojlo te lẹ, po nuyise etọn lẹ po, bo na hẹn we penugo nado yí zinzin do dọho hẹ ẹ. (Howh. 16:23) Nọ wleawu jẹnukọnna dlapọn dopodopo. Eyin e yọnbasi, nọ yí ojlẹ kleun de zan nado zinnudo nuagokun de po wefọ he nọgodona ẹn de po ji sọn linlinnamẹwe lọ lẹ mẹ, nado sọgan húsinna okún nugbo lọ tọn depope he na ko tin to ahun etọn mẹ. (1 Kọl. 3:6) Nọ basi kandai azán dlapọn dopodopo, owe he a jodona ẹn, gọna hosọ po wefọ he mì gbadopọnna lẹ po tọn.
3. Whla nẹmu wẹ mí dona nọ lẹkọyi mẹhe tindo aṣa nado nọ yí linlinnamẹwe mítọn lẹ dè?
3 Whla Nẹmu Wẹ Mí Dona Nọ Lẹkọyi Yé Dè? A dona nọ lẹkọyi yé dè whladopo to osun dopo mẹ nado ze linlinnamẹwe yọyọ lẹ yì na yé. Etomọṣo, sọgbe hẹ ninọmẹ towe po ojlo he mẹlọ tindo po, a sọgan nọ yì dla ẹ pọ́n hugan whladopo. Di apajlẹ, to whenue e ko yì osẹ dopo kavi awe bọ a jo linlinnamẹwe lọ lẹ do na mẹlọ godo, a sọgan lẹkọyi e dè bo dọmọ: “N’zẹ̀ gbọn fi bleun nado do nude hia mì sọn linlinnamẹwe he n’yí na mì lọ lẹ mẹ.” Enẹ na fọnjlodotena mẹlọ nado hia hosọ tangan de. Ṣigba, eyin e ko hia hosọ lọ, a sọgan kàn nuhe e lẹn gandego sè e bo dọhodeji hẹ ẹ to kleun mẹ. Kavi eyin ewọ nọ yiwanna owe mítọn lẹ hihia, a sọgan lẹkọyi e dè bo yí alọnuwe pẹvi, alọnuwe, kavi owe he mí to zizedonukọnnamẹ to osun lọ mẹ na ẹn.
4. Etẹwẹ mí sọgan nọ wà sọn ojlẹ de mẹ jẹ devo mẹ nado yọnẹn eyin mẹhe tindo aṣa nado nọ yí linlinnamẹwe mítọn lẹ tindo ojlo nado plọn Biblu?
4 Ma nọte dọ whétọ lọ lọsu ni biọ to asi we nado plọn Biblu hẹ ẹ blo. Ze afọdide tintan. Eyin e ma tlẹ kẹalọyi plọnmẹ Biblu de dai, sọn ojlẹ de mẹ jẹ devo mẹ, a gbẹ́ sọgan nọ do adà lọ “Kanbiọ Sinai Do Biblu Ji” sọn Atọ̀họ̀-Nuhihọ́ lọ Tọn mẹ hia ẹ bo pọ́n eyin e na tindo ojlo nado dọhodopọ hẹ we do e ji. Vlavo a sọgan bẹ plọnmẹ Biblu họntonu tọn de jẹeji hẹ ẹ. Ṣigba, eyin a ma penugo nado bẹ oplọn de jẹeji hẹ ẹ, a sọgan zindonukọn nado to linlinnamẹwe lẹ hẹnwa na ẹn nado sọgan hẹn ojlo etọn dote.