Hẹn Lizọnyizọn Towe Pọnte Dogọ—Ojlo Finfọndote Na Mẹhe Tindo Aṣa Nado Nọ Hia Linlinnamẹwe Mítọn Lẹ

Nuhewutu E Do Yin Nujọnu: Mẹsusu he nọ yiwanna linlinnamẹwe mítọn lẹ hihia ma nọ jlo na plọn Biblu hẹ mí. Vlavo yé nọ mọdọ emi ko tindo sinsẹ̀n emitọn kavi nọ lẹndọ emi ma sọgan mọ whenu nado plọnnu. Etomọṣo, dile yé to linlinnamẹwe mítọn lẹ hia to gbesisọ mẹ, yé sọgan wleawuna ojlo vẹkuvẹku na Ohó Jiwheyẹwhe tọn. (1 Pita 2:2) Hosọ tangan de sọgan whàn yé kavi ninọmẹ yetọn lẹ sọgan diọ. Dlapọn kleun bibasi na yé whẹwhẹ sọgan zọ́n bọ yé na voawu hẹ mí dogọ bọ mí na penugo nado yọ́n nuhe mẹ yé nọ tindo ojlo te lẹ po ahunmẹdunamẹnu yetọn lẹ po. To godo mẹ, plọnmẹ Biblu de sọgan bẹjẹeji.

Lehe Mí Sọgan Wàmọ Do:

To osun dopodopo mẹ, nọ de whenu dovo nado ze Atọ̀họ̀-Nuhihọ́ lọ Tọn po Réveillez-vous! osun lọ tọn po yì na mẹlọ. A sọgan yì e dè to ojlẹ devo lẹ mẹ to osun lọ gblamẹ nado fọ́n ojlo etọn dote gando hosọ de he tin to linlinnamẹwe he a zejo na ẹn lọ mẹ go kavi nado yí owe he mí to zizedonukọnnamẹ to osun lọ mẹ na ẹn. Nọ basi kandai dagbe lẹ.—Pọ́n Lizọnyizọn Ahọluduta Tọn Mítọn, janvier 2014, w. 3.
Nọ wleawuna dlapọn dopodopo. Kakati nado nọ ze linlinnamẹwe lẹ jo poun bo dedo, nọ dọ̀n whétọ lọ biọ hodọdopọ de mẹ bo tẹnpọn nado wleawuna haṣinṣan dagbe de hẹ ẹ. Gbọnmọ dali, e na bọawuna we nado fọnjlodote na ẹn.
Nọ to aṣeji gando dotẹnmẹ hundote lẹ nado bẹ oplọn Biblu tọn de jẹeji go. Eyin mẹhe a nọ bẹ linlinnamẹwe lẹ yì na whẹwhẹ de kàn nuhe Biblu dọ do hosọ tangan de ji sè we, hẹn nuplọnmẹwe de he mẹ gblọndo lọ te wá na ẹn bo gbadopọnna gblọndo lọ hẹ ẹ. Whẹpo a na tlọ́n e dè, fọ́n kanbiọ devo he tindo kanṣiṣa hẹ kanbiọ etọn dote bo gbadopọnna ẹn to gọyìpọn he bọdego whenu. Eyin a nọ yí Biblu kavi dopo to nuplọnmẹwe mítọn lẹ mẹ zan nado tindo hodọdopọ gbesisọ tọn podọ to aliho kannukannu tọn mẹ hẹ mẹde, etlẹ yin na nukunwhiwhe kleun delẹ, a ko to anadena plọnmẹ Biblu de niyẹn. Be hiẹ ko ze alọnuwe lọ Wẹndagbe de donukọnna whétọ lọ kavi do lehe oplọn Biblu tọn nọ yì do hia ẹ to kleun mẹ ya? Be hiẹ ko do video lọ lẹ Naegbọn Mí Dona Plọn Biblu? po Nawẹ Mí Nọ Plọn Biblu hẹ Mẹ Gbọn? po hia ẹ ya? Eyin mẹlọ ma tlẹ kẹalọyi dai nado plọnnu, ninọmẹ lẹ nọ diọ. Be e ma na yin nuyọnẹnnu dọ hiẹ ni vọ́ tẹnpọn ya?

Tẹ́n Ehe Pọ́n to Osun lọ Mẹ:

Basi todohukanji mẹhe a sọgan nọ ze linlinnamẹwe lẹ yì na to sunmẹsunmẹ tọn. Ze linlinnamẹwe osun lọ tọn lẹ yì na yé bo dọna yé dọ a na ze zinjẹgbonu osun he ja lọ tọn lẹ wá na yé.