Alọnuwe Pẹvi He Yin Awuwlena to Aliho Vonọtaun mẹ Lẹ!
1. Azọ́nwanu he mí na yizan to lizọnyizọn lọ mẹ tẹlẹ wẹ yin awuwlena to aliho vonọtaun de mẹ?
1 To Plidopọ Agbegbe 2013 tọn he hosọ etọn yin ‘Ohó Jiwheyẹwhe Tọn Wẹ Nugbo!’ ji, alọnuwe pẹvi yọyọ atọ́n delẹ yin didetọn. To godo mẹ, Linlin Ahọluduta Tọn Sọha 38tọ he hosọ etọn yin “Be Oṣiọ lẹ Sọgan Gọwá Nọgbẹ̀ Nugbonugbo Ya?” wá yin yiyidogọ alọnuwe pẹvi enẹlẹ. Alọnuwe pẹvi ṣidopo ehe lẹpo wẹ yin awuwlena to aliho vonọtaun de mẹ. Naegbọn yé do yin awuwlena to aliho enẹ mẹ? Nawẹ mí sọgan yí alọnuwe pẹvi ehelẹ zan po kọdetọn dagbe po to lizọnyizọn whédegbè jẹ whédegbè tọn mẹ gbọn?
2. Naegbọn alọnuwe pẹvi lọ lẹ do yin awuwlena to aliho vonọtaun de mẹ?
2 Naegbọn Yé Do Yin Awuwlena Domọ?: Kọdetọn dagbe tintindo to lizọnyizọn whédegbè jẹ whédegbè tọn mẹ nọ saba bẹ afọdide ẹnẹ ehelẹ hẹn: (1) Kàn kanbiọ mẹhẹnlẹnnupọn tọn de sè nado bẹ hodọdopọ jẹeji. (2) Hia wefọ de bo dọhodeji hẹ whétọ lọ. (3) Yí owe de na ẹn nado hia. (4) Fọ́n kanbiọ he ji mì na dọhodo to whedevonu de dote bo basi tito nado lẹkọwa. Aliho he mẹ alọnuwe pẹvi ehelẹ yin awuwlena te na hẹn bọawuna mí nado hodo afọdide ẹnẹ ehe lẹpo.
3. Nawẹ mí sọgan ze dopo to alọnuwe pẹvi lọ lẹ mẹ donukọnnamẹ to lizọnyizọn lọ mẹ gbọn?
3 Lehe Mí Na Yí Yé Zan Do: (1) To nudidọ do whétọ lọ godo, do kanbiọ mẹhẹnlẹnnupọn tọn he tin to wepa lọ ji lẹ hia ẹ bo kàn linlẹn etọn sè. (2) Hùn alọnuwe pẹvi lọ bo gbadopọnna adà lọ “Nuhe Biblu Dọ.” Eyin e yọnbasi, hia wefọ lọ sọn Biblu mẹ tlọlọ. Eyin alọnu whétọ lọ tọn vò, dọho hẹ ẹ do adà lọ “Ale He Enẹ Sọgan Hẹnwa Na We” ji. (3) Yí alọnuwe pẹvi lọ na ẹn bo na ẹn tuli nado hia adà he pò lẹ. (4) Whẹpo a na yì, do kanbiọ he tin to adà lọ “Etẹ A Lẹn?” glọ hia ẹ, bo basi tito nado lẹkọwa nado dọho hẹ ẹ do gblọndo he Biblu na ji.
4. To whenue mẹde do ojlo hia, etẹwẹ mí sọgan dọ to gọyìpọn lọ whenu?
4 Gọyìpọn lọ bibasi sọ bọawu taun. Yí wefọ he yin dide do godo alọnuwe pẹvi lọ tọn lẹ zan nado na gblọndo na kanbiọ he a kanse to dlapọn towe tintan whenu. Whẹpo a na yì, dlẹnalọdo yẹdide alọnuwe Wẹndagbe de tọn he tin to alọnuwe pẹvi lọ ji bo do alọnuwe lọ po nupinplọn etọn he bẹ nudọnamẹ dogọ hẹn gando hodidọ mìtọn go po hia whétọ lọ, enẹgodo yí alọnuwe lọ na ẹn. Eyin e kẹalọyi alọnuwe lọ, basi tito nado dọhodeji hẹ ẹ to dlapọn he na bọdego whenu. A ko bẹ plọnmẹ Biblu de jẹeji niyẹn! Kavi kakati nado ze alọnuwe lọ donukọnna ẹn, a sọgan ze alọnuwe pẹvi devo na ẹn bo basi tito nado dọhodeji hẹ ẹ to dlapọn he na bọdego whenu.
5. Adà tẹwẹ alọnuwe pẹvi lẹ nọ yiwà to lizọnyizọn mítọn mẹ?
5 Sọn owhe 130 linlán die wẹ mí ko to alọnuwe pẹvi lẹ yizan to lizọnyizọn mítọn mẹ. Dile etlẹ yindọ tedidi po gbigblo yetọn po nọ gbọnvo, azọ́nwanu dagbe de wẹ yé nọ yin na mí to lizọnyizọn lọ mẹ. Mì gbọ mí ni yí azọ́nwanu vonọtaun ehelẹ zan ganji bo zindonukọn nado to oyọnẹn Biblu tọn hẹn gbayipe lẹdo aihọn pé.—Howh. 15:7a.